إشراقات
> اللحمة غليت.. ياعم الحاج.. دبرنى أعمل إيه؟!
- بلاش لكاكة ياخى.. وإطفح فراخ.. ماله الفراخ كخه.. وﻻ كخه؟!
> طيب والفراخ هيه كمان غليت.. يابا الحاج.. قولى أطفح الولاد إيه؟!
- اتنيل على عين أهلك.. انت وهمه وكلوا سمك..!!
> طيب والسمك هو الآخر غلى.. وبقت أسعاره نار.. دبرنى يا وزير!!
- خلاص بقى مابدهاش بقى.. كلوا بعضكم إنت والولاد.. وأحمدوا ربكم إنكم مش عايشين.. فى سوريا والعراق وليبيا!!
> بس الناس هناك ف البلاد دى.. لاقيين ياكلوا أحسن مننا!!
- خلاص يا روح خالتك.. قدم على طلب هجرة.. وأنا هزكيك عند داعش!!
> تنفق الدولة 85 جنيه، على كل مسجون يومياً.. كطعام وشراب وحراسة وغيرها!!
> الغريب فى الأمر.. أنها لو أنفقت عليه نصف هذا المبلغ.. قبل السجن.. ما كانش إتسجن من أساسه!!
> يا ترى مفيش شركة تأمين، تؤمن على المرتب، ضد التبخر، أو السرقة، أو الإستغلال
> قصة قرأتها وأعجبتنى تقول:
-فى لحظة مكاشفة نادرة، سأل الملك وزيره،
لماذا تسرق نصف الأجر الذى ادفعه لخدم القصر مع أنك غير محتاج له؟
ابتسم الوزير وقال:
يا مولاى أن أعطيتهم أجرهم كاملاً فقد يصبحون أغنياء يوماً ما، ويرفضون العمل كخدم لكم، لذلك أعطيهم من الأجر ما يجبرهم على العمل كخدم طوال حياتهم.
ابتسم الملك وقال:
اعرف ذلك جيداً، ولذلك أتركك تسرقهم دون أى اعتراض.
شرفاء.. وأرباب سوابق!!
> للأسف.. وصلنا لمرحلة من الإسفاف.. فى إدارة شئون البلاد .. حتى أصبح لقب «مواطنين شرفاء».. هو الذى يطلق على مجموعة من البلطحية المأجورين وأرباب السوابق.. وبعض المحامين فاقدى الذمة والدين.. والذين تستأجرهم الداخلية لتأديب وإرهاب خصومها.. ورفع القضايا على المفكرين من أصحاب الرأى والرؤى.. ولإهدار حقوق البلاد والعباد!!
ورأيناهم كثيراً أمام نقابة الصحفيين.. أثناء الأزمة الشهيرة العام الماضى.. وقد تطاولوا على كبار الكتاب وسبوهم!!
> يعنى.. يعنى.. حتى «الشرف».. اهدروا قيمته ومعناه!!
مصر النهاردة.. محتاجة لـ«ضبط زوايا».. والإزاز الأمامى.. مشبر حبتين!!
النتش.. أسلوب حياة
> واضح كده أن «أبوالعربى» اتجوز من كل محافظات مصر، وخلف صبيان وبنات!
ذئاب.. الفيس بوك!!
> دنيا الفيس فيها العجب.. فيها شيخ المنصر اللى عامل فيها حامى الحمى.. وفيها اللص اللى بتقمص شخصية مكافح الفساد.. فيها القواد اللى سايق فيها الشرف وبيرتدى زى الواعظ.. فيها اللى بيدعى البراءة وهو شيطان رجيم.. وفيها الداعرة الى تحولت بين يوم وليلة الى داعية!
باختصار دنيا الفيس فيها القليل من الملائكة.. والكثير من شياطين الإنس.. خدوا بالكم قبل فوات الأوان.. وإياكم تنخدعوا فيهم!!