رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

من القلب إلى القلب (2)

الناس فى بلدنا مصر، مش حاسين ليه بنفسهم

العيب فى إللى حاكمهم؟ وَلّا فى نفسهم؟

ليل نهار يلعنوا فى إللى ما عندهوش ضمير

وإللى بيخون ويكذب، وما بيعملش خير

هُمّا مين إللى بيشتموهم؟ مش كانوا منهم؟!

مِن أى أرض جُم؟ مش نفس جنسهم؟!

مين بيشتم مين؟ ومين يخون مين؟!

إللى مش عاجبه أهله، ما تدفهوش شمسهم.

الناس فى بلدنا مصر، مش حاسين ليه بنفسهم؟

كل واحد عارف أكيد، جواه حاجة ناقصة

مش لازم ينشغل بالناس ويستقصى

هُوَّ مين كان نبي؟ ومين معصوم م الغلط؟

مين مِشِى فى طريق ناعم مافيهوش زلط

لكن بقت الهواية، التفتيش فى العيوب

ومحاسبة النوايا، على كم الذنوب

لإمتى نعيش فى غم؟ فى الدنيا حاجات أهم

تِفرِض على الناس يشوفوا، الأول نفسهم

ويبقوا جزء مِنَّك، ويحسوك وتحِسِّهُم.

الناس فى بلدنا مصر، مش حاسين ليه بنفسهم

حاولت أفهم الدُنيا ماشية إزّاى وما فهمتِش

حاولت أكون زَى اللى بأشوفهم نجوم وِما كُنتِش

حاولت أحسِبها بالأيام بالأحلام بالمظبوط وبالمفروض وبالعقل والمنطق

لكنّى لَقيت الحِسبة فى الآخر

مَكاسِب جد وما لها حَد وِشُهرة ومَجد

لِلِّى يِضِل ويَستَحِل واللى يِغِش وبيِنتِش