رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

إشراقات

الأهلى طلع منصور.. والزمالك خرج مقهور!

جميع «الشياطين» تصفد فى رمضان.. إلا «الشياطين الحمر»!

مبروك للأهلى.. شكرًا للمصرى!

بعد ضياع الدورى.. خرج مرتضى منصور من مباراة المصرى.. وهو يردد.. الله يخرب بيت أمك يا رمضاااان!

رد عليه مشجع وقال.. يا عم حرام عليك.. أنت هتكفر ولا إيه.. فيه حد يشتم رمضان!

خلع مرتضى حذاءه.. وانهال ضربًا على المشجع.. وصرخ فيه.. أنا قصدى رمضان صبحى يا ابن (.....)!

بعد فوز الأهلى بالدورى.. ترددت أنباء عن هروب «شمهورش» ساحر نادى الزمالك.. خوفًا من رد فعل مرتضى منصور.. الذى اكتشف أن «شوشو» كان عميلاً مزدوجاً للأهلوية.. يقبض من الزمالك.. ويلعب لمصلحة الأهلى!

النهارده بس.. اكتشفت سبب احتكار الأهلى للبطولات!

فقد اتضح أن مطعم النادى.. لا يقدم إلى لاعبيه.. إلا (اللحمة الحمرا)!

فى حين أن مطعم الزمالك.. لا يقدم إلى لاعبيه.. إلا الفراخ (اللحمة البيضا)!

عشان كده الأهلى بيحصد البطوﻻت.. والزمالك قاعد جنبه بيكاكى!

صديقى الإعلامى «الزملكاوى» فؤاد أبوهميلة.. كاتب بوست حزين وباكى من كلمتين على صفحته.. بيقول فيه «سنظل أوفياء»!

أكيد.. أكيد يا فؤش.. قصدك طبعًا.. أوفياء للمركز التانى!

من فترة قال مرتضى منصور.. إن الدورى جاله فى المنام.. وقاله أنا بحبكم ومش عايز أروح الأهلى!

اتضح النهارده أن صاحبنا إياه.. ما كانش متغطى كويس.. لأن اللى جاله فى المنام فعلاً مش الدورى.. ده المركز التانى.. المركز المفضل للزملكاوية!

ربنا.. ما يقطعلكوا عادة.. يا مرتضى باشا!

طول عمرها «منطقة القناة».. بوابة العبور لمصر.. والنهارده أصبحت.. بوابة العبور للدورى!

بصراحة.. ومن غير زعل كده.. الأهلى قلبها «دخلة بلدى» النهاردة!

طب اعقلوها إنتوا يا جماعة.. فريق رئيسه «طاهر».. وكابتنه «غالى».. ونجمه الأول اسمه «رمضان».. إزاااى يخسر الدورى!

خلاص يا جماعة عيب كده.. مرتضى منصور.. جاب فتوى م المفتى بتقول.. «الضرب فى الميت حراااام»!

بما أننا فى الشهر الفضيل.. أتمنى من الأهلى.. أن يزكى عن نفسه.. ويفوت للزمالك لقاء القمة القادم.. عشان بصراحة كده حراااام!

آخر بوست عشان حبايبى الزملكاوية.. ما يزعلوش منى:

الأهلى طلع منصووووور.. والزمالك خرج مقهوووور!