شواكيش
> بعد كارثة «مركب الوراق» الريس «حنفى» بطل فيلم «ابن حميدو» بيقولكم: «حافظوا على المركب نورماندى تو».. وطبعاً كلمته مش هتنزل الشط أبداً!!
> كارثة «المركب المنكوب».. وضعت محافظ أهرامات الجيزة خالد العادلى على «وش المية»!!
> حركة قيادات الشرطة الأخيرة «شد أجزاء» والجدع اللى يقرب!!
> خريجو التعليم الحكومى «فرز تالت» والصحة العامة فى «غرفة الإنعاش».. وطبعاً الحكومة فى «البلالة»!!
> حكومتنا التقشفية لو مزنوقة فى «مليار جنيه» ترفع الدعم.. ولو مزنوقة فى «عشرة مليار» تنفض جيوب الغلابة.. ما هى كدة الحكومة متعودة دايماً «تاخد وتنكر»!!
> الكلام «المشفر» لوزير «إدينى رنة» خالد نجم مش هاجيب سرعة «النت» مع تصاعد حملة شباب «ثورة الإنترنت» والمطالبة بإقـــالته على «نت السرعة»!!
> على رأى زميلنا أبوالعباس محمد «وما البلد إلا كوبرى كبير».. طبعاً أوله مطلع «الدائرى» وآخره منزل «الدائرى بلس»!!
> الإعلامى الساخر باسم يوسف طِلع «أهلاوى» ورغم ذلك هنـأ «الزملهوية ع الدورى»!!
> على مسئولية وزير السكاشن السيد عبدالخالق: «لا نية لإلغاء التعليم المفتوح».. وعلى مسئولية الزعيم عادل إمام: «العلم لا يكيل إلا بالبتنجان»!!
> بعد ضبط الراقصتين «شاكيرا» خريجة آداب ألمانى و«برديس» خريجة كلية التجارة.. تذكرت إفيه «بتشتغل رقاصة وبترقص».. وطبعاً فى بلد شهادات!!
> ماسبيرو لا يحتاج إلى «هيكلة» ولكنه يحتاج إلى «هشتكة».. وصباح الخير يا أم العواجز!!
> بمناسبة علاوة «يوليو» نُهدى أغنية «شعبولا فون»: تعالى يا علاوة.. ارجعى يا علاوة.. دى الحكومة سايبنا نشحت وبتاكل عيش السرايا.. وإيييييه!!
> بالمناسبة.. الموظفون فى دواوين الحكومة رفعوا استغاثة «علاوة يوليو وضيعّها»!!
> أغلى حاجة فى حكومتنا «المكوكية» وزرائها دهب عيار أربعة وعشرين.. وأدائهم «دهب صينى»!!
> لو الإخوان بطلوا يحلموا بعودة المخلوع «مرسى» مكنش ده حالهم.. قتل ومرعة وقلة صنعة!!
> من وحى أفلامنا السينمائية: (حياتى متبهدلة) من (نوم التلات) خاصة أن الحكومة تتخذ قراراتها من (حارة مزنوقة) ومشربة الشعب (سكر مُر)!!
> دعوة «جبهة الإبداع» لإقالة وزير الثقافة عبدالواحد النبوى تحت تهديد «فيها لمثقفيها»!!
> على رأى الكاتب والسيناريست وحيد حامد: «على عادل إمام أن يكون لديه شجاعة الاعتزال».. وطبعاً الكبير كبير!!
> التصنيف العُمرى لأفلام السينما هذه الأيام: ضحك ولعب وحب وتحرش!!
> إلى العقيد نشوى محمود: الضرب فى المتحرش حلال.. ولكن كله ضرب فى ضرب مفيش «شلوت»؟!
> ارفعوا أُكف الدعاء لعنان السماء: اللهم إغرق وزراء حكومتنا فى بحر الديون.. وأحرق جيوبهم بنارالأسعار.. قولوا: يا رب المستضعفين!!
آَخِر شَوْكَشَة
> > فى مصر.. فينا اللى مكفينا.. واللى مكفينا حكومة ملهاش فينا.. غير بطاقة التموين والعيش الحاف اللى مش مكفينا.. وبكرة هتصرف لينا البنزين فى أزايز وهتولع الأسعار فينا.. يا عينى على الغلابة اللى كحوا تُراب من زمانينا.. ويا عينى ع الحكومة اللى مستكترة الغلا علينا.. وحسبى ع الحكومة العجبى!!