حسام حبيب: مش عايز أرجع لشيرين أنا في سجن وعايز أتحرر منه

حرص الفنان حسام حبيب على التعليق بشأن اتهامات شيرين عبد الوهاب له بسرقتها، والتربح من أعمالها وحفلاتها ومحاولة الإيقاع بينها بين ابنتها. 

وأكد حسام حبيب قائلا: ""الموضوع مش بالعافية أنا مش عايز أرجع، وأنا اللي في سجن وعايز أتحرر منه، أنا اللي تعبت وأستحملت إهانات بقالى سنين على حاجات محصلتش، وعمري ما أشتكيت ولا أتكلمت ولا دافعت عن نفسي عشان ميطلعش شكلها وحش، بس خلاص كدا أنا فاض بيا، وكل حاجة هتتقال للناس زي ماحصلت بظبط، أنا عمري ماطلعت أسرار حد برا ولا عمري ماكنت هعمل كدا".

وأضاف حسام حبيب: "شيرين عبد الوهاب دمها بقا تقيل والمرة دي بجد هحبسها، وهي خرجت النهاردة وقالت الكلام دا لأنها عماله تتصل بيا لحد إمبارح بليل عشان نرجع لبعض، وأنا مبردش عليها، عشان انا رافض نرجع تاني بعد كل اللي حصل أخر مرة لما الأمر وصل للنيابة والحوار كبر، وفي الأخر عشان أنا زهقت عملتلها بلوك".

وأضاف حسام حبيب قائلًا: "طبعا أنا خجلان من كل اللي بيحصل، ومش عارف أقول أية عن اللي بيحصل، بس والله العظيم أنا بريء من اللي بيحصل، ممكن يكون دا حصل عشان خاطر هي بتحاول تتصل بيا بقالها يومين تلاتة وأنا مبردش عليها، الورقة اللي شيرين بتقول بيها أنها حولت ليا مبلغ مالي، مكتوب فيها غرض التحويل لزوج، فأول حاجة كدا هو أنا زوجها !!، ثانيا حتى لو كنت الزوج وهي بتدلعني بالمبلغ دا إزاي تخرج تقول أني عايز أموتها، يا هي بتكدب لما قالت اننا اطلقنا يا هى بتكدب على البنك وقالت أني زوجها وحولتلي".

تصريحات شيرين عن حسام حبيب 

وقالت شيرين عبد الوهاب إن حسام حبيب يمارس الابتزاز ضدها، ويستخدم ابنتها كأداة لتهديدها بحسب وصف التصريحات، ولذلك تستغيث بالجمهور وبالدولة المصرية لمساعدتها. 

ووصفت شيرين عبد الوهاب حياتها مع حسام حبيب على أنها قصة معاناة استمرت على مدار أكثر من 6 سنوات، تدمرت معها نفسيا بفعل متعمد منه. 

واتهمت شيرين عبد الوهاب حسام حبيب في تصريحات أخرى، بسرقة أموالها وسيارتها وساعتين، والذهب الخاص بها، وحولت له مبلغ 200 ألف دولار من حسابها البنكي للتخلص من ابتزازه. 

وكان تصدر المطرب حسام حبيب التريند على جوجل وإكس ومواقع التواصل الاجتماعي، وذلك بعد خناقته مع طليقته النجمة شيرين عبد الوهاب وتقديمها بلاغ ضده، تتهمه من خلاله بالتعدى عليها بالضرب في فيلتها بالتجمع الخامس.

وعلق حسام حبيب على البلاغ الذي قدمته شيرين عبد الوهاب قائلًا: «التحقيقات مازالت مستمرة وفي شهود وخلال الساعات المقبلة سوف يظهر كل شئ، والله العظيم أنا ممدتش ايدي عليها هي اللي معورة نفسها بطفاية ضربتها في دماغها ومعورة رجليها بمقص».