ريم أحمد عن فيديو فادي خفاجة: زعلانة عليه.. بس مش قادرة أساعده
علقت الفنانة “ريم أحمد” على واقعة فيديو الفنان “فادي خفاجة” على تطبيق تيك توك، الذى كان يشكو فيه من عدم قدرته على المشاركة في أعمال فنية جديدة بطريقة غريبة.
ريم أحمد: فادى خفاجة قهرنى:
قالت الفنانة “ريم أحمد” خلال حوارها مع الإعلامية مروة صبري، في برنامج "قعدة ستات"، المذاع عبر قناة ألفا: "زعلانة طبعًا على فادي، لما طلع قال في الفيديو إنه محتاج فلوس ومعندوش اختيار، وإنه خريج معهد فنون مسرحية ونقابي، دي حاجة تقهر وإحساس صعب جدًا، وزعلت على الدرجة اللي وصل لها".
كشفت “ريم أحمد” عن سبب عدم تواصلها مع “فادي خفاجة” بعد الفيديو، بالرغم من عملهما معًا لفترة طويلة في مسلسل "يوميات ونيس"، قائلة: “مقدرتش أعمل كده، لأن مش من حقي أحكم على حد، وأنا مش عارفة ظروفه، ولو حطيت نفسي في موضع الحكم أبقى ظالمة زي الناس اللي إتكلمت عليه وشوهت سمعته وسمعتنا، إحنا الأربعة من مسلسل ”ونيس" إتشتمنا شتائم غير لائقة من لجان".
وتابعت: “لو كان في إيدي حاجة كنت كلمته، لكن مفيش في إيدي حاجة أقدر أساعده بيها، وردًا على سؤال على تواصلت مع الفنان الكبير محمد صبحي لمحاولة مساعدة فادي خفاجة، قالت ريم أحمد: “إتكلمنا وأستاذ ”محمد صبحي” بيكلم فادي كتير".
ووجهت “ريم أحمد” في النهاية رسالة لفادي خفاجة قالت فيها: "أتمنى يعرف يخرج من الكبوة اللي هو فيها، إحنا كلنا بنتحط في المواقف دي، وهو خانته اللحظة في نظري، لكن ألتمس لأخي مليون عذر".
وكان “فادي خفاجة” فاجأ متابعيه بانهياره على "تيك توك" في بث مباشر، بسبب عدم عرض أعمال فنية عليه خلال الفترة الماضية.
وظهر “فادي خفاجة” في حالة انهيار وهو يتحدث عن لجوئه إلى جولات تيك توك بسبب عدم عرض أعمال فنية عليه، وقال: "اضطررت أدخل في جولات تيك توك لأني مش لاقي شغل، والفنانة وفاء عامر حاولت كتير تجيبني معاها في أعمال فنية، لكن مفيش فايدة، قاعد في البيت من غير شغل".
لكنه قدم اعتذاره لمتابعيه في سبتمبر الماضي، بعد انهياره في بث مباشر، قال “فادي خفاجة”، خلال مداخلة هاتفية مع الإعلامي تامر أمين، في برنامج "آخر النهار"، المذاع على قناة النهار: "أنا مش قادر أقول حاجة غير إني كنت في لحظة ضعف وبرجو الناس زي ما شايفين إني فنان أنا إنسان ولو رجع بيا الوقت مش هعمل الفيديو ومش عارف أنا عملته إزاي، وأنا بأسعى بقالي كتير طول الوقت الناس بتقولي أنت فين إحنا متربيين على ونيس".