ع الطاير
الصورة النمطية للفلاحين واللى كنا بنشوفها فى السينما والمسلسلات التليفزيونية، انتهت من زمان وأصبحت ذكريات من زمن فات، وبعد أن تطورت أدوات الفلاحة ودخل الفلاح المصرى زمن تكنولوجيا المعلومات أصبح الموبايل والأجهزة الذكية التابلت والآى باد من مستلزمات الفلاح، وبعد أن كنا ندرس فى الابتدائية أن أبو قردان صديق الفلاح أصبح الآن الموبايل صديق الفلاح.
والحكاية ببساطة أن وزارة الاتصالات وتكنولوجيا المعلومات بالتعاون مع وزارة الزراعة وضعوا الفلاح المصرى مباشرة فى قلب التكنولوجيا والذكاء الاصطناعى وإنترنت الأشياء، وكما يقول وزير الاتصالات عمرو طلعت إنه بالفعل يتم تنفيذ العديد من المشروعات بالتعاون مع قطاعات الدولة المختلفة لتبنى أحدث التكنولوجيات العالمية، وفى قطاع الزراعة كان لا بد من استخدام تكنولوجيا المعلومات واستخدام تكنولوجيا الذكاء الاصطناعى فى مجالات عديدة منها الحصر الزراعى باستخدام البصمة الطيفية، وكذلك لمساعدة المزارعين فى مجالات عملية التنبؤ بالطقس وزيادة كفاءة ترشيد استهلاك مياه الرى.
أيضا يتم تطوير البوابة الإلكترونية لوزارة الزراعة لتكون مرآة الوزارة فى الداخل والخارج، وتعكس الجهود التى تقوم بها والأنشطة والخدمات التى تقدمها للمواطنين وأيضا تطوير الإرشاد الزراعى باستخدام التكنولوجيا الحديثة من خلال التليفون المحمول «موبايل أبلكيشن» لمساعدة الفلاحين فى المعاملات الزراعية ومكافحة الآفات والحشرات ومواعيد الزراعة والرى والحصاد، بالإضافة إلى استخدام الذكاء الاصطناعى فى الحصر الإلكترونى الدقيق للأنشطة الزراعية والحيوانية الأمر الذى يسهم فى توفير المعلومات الصحيحة لاتخاذ القرار المناسب.
يعنى إيه الكلام ده أقولك يعنى كل حاجة دلوقتى بقت تكنولوجيا فى تكنولوجيا، حتى الفلاحة طيب دى حاجة كويسة طبعا لأن الحياة بتتغير والدنيا كلها رايحة إلى الذكاء الاصطناعى وعلوم البيانات الرقمية.
طيب ده معناه إيه هل الإنتاج يزيد ونوعية الخضار والفاكهة والمحاصيل تبقى أحسن كتير أقولك سر إن فى دول كتير بتستخدم التكنولوجيا فى الزراعة من سنين فاتت وبتحقق طفرات إنتاجية ومعجزات يعنى ممكن تزرع من غير تربة، يعنى على الحيطة مثلا وممكن تزرع من غير إفراط فى استخدام المياه ومن غير أسمدة ومبيدات، ويمكن تنتج كمان فاكهة وخضار أورجانيك باختصار كده يعنى التكنولوجيا دى حاجة حلوة أوى وما دخلت فى شيء إلا جعلته أفضل وأكثر راحة وأعظم فائدة وإذا مش مصدق انظر حولك وراجع أيام زمان وشوف إزاى قدرت التكنولوجيا تختصر الزمن وتقدم الراحة والرفاهية والخدمات وقريبا جدا سيتغير نوع العمل وتقريبا كده سيختفى العمل اليدوى والمشقة والتعب وكل شيء سيكون توماتيكى توماتيكى.