ع الطاير
انت وحظك بقى لو الشريحة بتاعتك نظيفة والنت قوى والباقة بتاعتك غالية يمكن يبقى عندك ذكاء اصطناعى وتبقى إنسان آلى وفى نفس الوقت بنى آدم يعنى ميكس كدة من الآلة والبشر.
يمكن حد يقول لى إيه اللخبطة دى بقى ويعنى إيه تبقى إنسان روبوت وفى نفس الوقت بنى آدم أقولك مش كدة وبس ده كمان ممكن تبقى إنسان خالى من الهموم والمشاعر السلبية المدمرة وكمان يمكن خالى الدسم يعنى ممكن تخس بسرعة وممكن لو مش قادر تمشى تتحول لبطل فى العدو باختصار كده ممكن تتحول لهركليز أو يعنى سبايدر أو بات مان من الآخر عندك قوة خارقة ومهارات فائقة حاجة كدة ايشى خيال يا ناس.
والحكاية ببساطة وعلى بلاطة إن فى شخص مالتى ملياردير أمريكى اسمه إيلون ماسك فاجأ الدنيا كلها باختراع شريحة صغيرة كده تتزرع فى الراس وتربط مخ الإنسان بالكمبيوتر أو الموبايل، وفى مؤتمر صحفى عالمى أزال الرجل كل الحدود بين الواقع والخيال واستعرض اختراعه اللى بالفعل قام بتجربته على الخنازير والقردة وقال إن الشريحة دى تقدر تمحى كل الخطوط الفاصلة بين الإنسانية والتكنولوجيا وتقدر تضيف إلى عقولنا الضعيفة قدرات خاصة.
كمان ممكن الشريحة اللى بحجم العملة المعدنية تعالج أى عطب أصاب المخ وبالتالى الجسد يعنى وكما يقول المخترع إن الاختراع ده أو الشريحة يعنى يقدر بها الإنسان المريض يستعيد الوظيفة الحسية والحركية يعنى لو عنده شلل يقوم يجرى ومش بس كده ده ممكن كمان علاج الاضطرابات العصبية وتعالج أمراض مثل الأرق والاكتئاب والصرع وألزهايمر والخرف وإصابات الحبل الشوكي، وكمان ممكن الشريحة المعجزة تقيس درجة حرارة المريض وضغطه وحركته، وتحذر من النوبات القلبية والسكتة الدماغية.
طيب السؤال بقى هو لازم أحط دماغى فى الشاحن عشان أشحن الشريحة دي.. الراجل جاوب على السؤال الساذج وقال إنها ستوفر بطارية شحنها يكفى يوم كامل ويتيح للمستخدمين إعادة الشحن توماتيكى أثناء نومهم.
شايف يا مان الدنيا رايحة فين؟
على فكرة الكلام ده كبير أوى ويبدو أن سنة 2020 دى مش معدية غير لما نشوف معجزات لم تخطر على بال أحد وربنا يعديها على خير بقى.