فى آخر السنة

اهرب من الناس السلبية اللى كل ما تشوفها متلاقيش منهم غير الشكوى، والهم، اللى محتواهم فارغ، اللى معندهمش ما يثرى كيانك، اللى معندهمش جديد، اللى دايماً بيحشوا عقلك الباطن بالمشاكل والفشل واليأس، اللى بتعتبر وجودهم ذنب فى حياتك بيرهقك، بيسيب أثر مبيروحش، خلى عقلك الباطن مليان بناس بتديك أمل، ناس علاقتها بتضيف لك، ناس متقلش معاك، ناس متخذلكش، ناس من نوعية الحالمين، المبتكرين، المتفائلين، اللى عندهم حل لكل شىء، اللى مبيعترفوش بالأزمات وبيعتبروا إن كل نهار جديد بيحمل روح جديدة، ناسية اللى فات ومستعده تتعامل مع اللى جاى، متخليش سقطة موقف او ذلة لسان، او حتى سوء تقدير يحبسك جوه جدران من صنعك انت، حطم الجدران دى واتبع النور اللى انت موش شايفه بسبب تراكمات عقلك الباطن، عشان وقت ما عقلك الباطن يحب يستدعى، تلاقيه بيستدعى مشاهد وذكريات كلها حلوة، كلها سعيدة، حتى لو هى مجرد ذكريات، احرص عليها، خلى عقلك يحفظ منها الحلو بس، ذكريات مافيهاش سلبية ولا إخفاق، مافيهاش ندم على ما فاتك، ولا ألم من حاجة ضاعت.

احنا بس اللى بنبدل مواقعنا، فبنجاور أشياء أخرى وبنشوف من زاوية مختلفة وبنلاقى ناس تانية موش لازم تكون بتشبهنا، لكن بتوافقنا، فلا تترك أثراً سيئاً لدى أحد، فلا يستدعى عقله إلا ذكرى سيئة، ولا تسمح بأن يترك أحدهم ذاك الأثر لديك، أصل مافيش حاجة بتروح حتى لو كانت هى كل الروح.