«السيسى»: طرح شركة قناة السويس فى البورصة للمصريين فقط

الانتهاء من مشكلة المستلزمات والبضائع بالموانئ خلال أسبوعين

طرح قانون الأحوال الشخصية للحوار المجتمعى قبل إقراره

 

افتتح الرئيس عبدالفتاح السيسى أمس مصنعى إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبورواش فى محافظة الجيزة.

وأكد السيسى أن البنوك ستغطى المطلوب بالدولار لصالح الاعتمادات خلال مدة من 3 أو4 أيام.

كما شدد الرئيس على أهمية الانتهاء سريعاً من الإفراج عن البضائع بالموانئ. وقال: «بالنسبة لموضوع المستلزمات بالموانئ، أرجو أن نطلق هذا الأمر بتغطية إعلامية والناس تشوف حجم المواد اللى هتخرج من الموانئ خلال الأسبوعين اللى جايين دول، علشان يبقى الحمد لله أنهينا المشكلة دى».

وعن جهود الدولة فى الحفاظ على الأسعار، قال السيسى: «بقول للمثقفين والإعلاميين وغيرهم.. كل كلمة ممكن تبقى عنوان كبير.. إنتو فاهمين أن المنتجات الزراعية أو المواد الغذائية تزيد مرتين وثلاثة.. مين يستحمل ده؟.. والبلد إزاى تواجه الحالة دى؟.. وهى ماسكة ما أمكن أن الأسعار ما تزيدش».

وعن قانون الأحوال الشخصية الجديد، قال الرئيس: «لما اتكلمنا عن قانون الأحوال الشخصية قولنا شوية ملامح للقانون.. والنخبة اللى اشتغلت فيه مطمئنين أنهم خدوا كل وجهات النظر، وتم طرحها لأن الناس كانت بتشوف الكلام ده على منصة القضاء على مدى 30 سنة وأكثر».

وأضاف: «لما اتكلمنا عن الملامح الرئيسية ده مش معناه أنكم ما تعملوش حسابكم فى الحوار حوله.. لازم تعملوا حوار مجتمعى للقانون.. وزير العدل موجود معانا يكلمنا عن القانون الجديد».

وعن إنشاء صندوق جديد ضمن قانون الأحوال الشخصية الجديد، أوضح السيسى: «قولت النهارده نعمل صندوق.. جاى تتجوز حط مبلغ للصندوق.. ومش كبير أوى.. اللى يقدر على جواز يقدر يعمل ويشارك فى الصندوق.. ولا تقعدوا تتخانقوا على الفرش والتكاليف.. لا ده مبلغ مش كتير.. وأنا كدولة اتفقت مع الدكتور مصطفى مدبولى رئيس الوزراء.. نحط قد ما يجيب الصندوق.. مليار قصاده مليار.. مليارين هنحط مليارين.. تأمين أولادنا فى كل شىء.. ده النقاش.. انتوا بتتكلموا عن نسبة طلاق».

وحول إنشاء صندوق لدعم الأسرة ضمن مشروع قانون الأحوال الشخصية الجديد، قال السيسى: «ليه بنعمل الفكرة دى.. أنا بقول النهارده مش عاوزين أى أسرة والاختلاف وارد.. لما الاختلاف وارد فيه فترة زمنية وقت الاختلاف.. من يتكفل بالأبناء.. هما زعلانين ومش عاوزين يصرفوا.. طب مين اللى يصرف على الأولاد.. هل يضيع الأبناء؟!.. دول ولاد مصر.. صندوق دعم الأسرة فى الأوقات الحرجة.. وقولنا الدعم الحكومى يسهم فيه بقدر ما يسهم فيه المتزوجين».

وأكد الرئيس ضرورة تكاتف الجميع خلال الفترة الحالية، مضيفاً: «بقول الكلام ده علشان كلنا نتكاتف.. حد يقول ده فرصة نعلى الأسعار وما فيش دولار.. الوقت ده يبرز فيه حرصنا على الناس.. وما نغليش الحاجة على الناس.. بنتكلم فى أكل وشرب وحاجات أخرى.. وبنعمل مصنع يوفر 700 ألف طن إنتاج مصرى نلبى مطالب السوق ولو فيه فرصة للتصدير للخارج».

وكشف السيسى أن أرباح قناة السويس منذ

عام 1975 بلغت نحو 220 مليار دولار، موضحاً: «بتكلم عن الافتتاح الجديد سنة 75 قناة السويس جابت 220 مليار دولار، لو حد كان شال 10% من الرقم ده وحطه فى صندوق كان زمان النهاردة بنتكلم معايا 50 مليار دولار.. لكن يدخل يعمل تطوير فى القناة ما عملوش.. يدخل مع حد مشروعات ما عملوش.. عاوز يعمل خدمة مجتمعية متقدمة لمدن القناة ما فيش.. قلت له لا ما ينفعش الكلام ده».

وأضاف الرئيس: «جه وزير المالية ورئيس الوزراء.. لا يا أفندم والنبى إرحمنا والفلوس اللى هتخصمها علشان الصندوق مش هنقدر، قلت له يا دكتور مصطفى افتكر لما جيت أنت والمهندس شريف إسماعيل وقلت الفلوس بتاعتك ما تتحولش وقلت خليها عندك فى وعاء، وكنت متحمس للفكرة، وجه المهندس شريف ووزير المالية قلت لهم اسمعوا كلامى وهتشوفوا، دلوقتى وزارة الإسكان بقت بتشتغل بـ 8 مليارات جنيه فى الشهر.. وزارة الإسكان وهيئة المجتمعات بتشتغل بـ 8 مليارات جنيه فى الشهر، بلد عايزة مليون وحدة سكنية فى السنة يبقى الوزارة دى تعملها 400 ألف والقطاع الخاص يعمل شوية كمان معاه علشان ميبقاش اللى إحنا شايفينه فى العشوائيات».

وعن طرح شركة قناة السويس فى البورصة، قال الرئيس: «قلنا طرح شركة قناة السويس فى بورصة للمصريين فقط.. علشان كلها من المصريين فقط وتشترى الأسهم دى.. فيه فرق أن أقول دخلها كده وأنه عندها أموال سايلة نحو 200-300 مليار.. ده حاجة تانية.. ده مستوى أكثر من الموجود».

وأضاف الرئيس: «الناس عاوزة تعرف وتطمن أنه ما يكونش فيه حاجة غلط أو هاتبقى غلط».. مش هنقول إن كل من اتكلم إنه مغرض.. وفيه ناس خايفة.. والخوف بقى سمة موجودة عندنا.. ومش مصدقين أن إحنا ممكن نعمل، وإن شاء الله هنعمل وهنعمل».

وأضاف: «الصناديق دى كلها ما حدش يصرف جنيه إلا لما يقول لى.. وإنتو متعرفوش أنا فى الفلوس عامل إزاى».