تامر حسني يوجه رسالة للمحبطين (شيلت طوب)
يعد الفنان تامر حسني من النجوم الداعمين دائمًا للشباب، وبين حين وآخر يحرص على تقديم عدد من النصائح لرفع الحالة المعنوية لدى جمهوره ومتابعيه.
اقرأ ايضاً .. تزامناً مع "في جمال كده".. تامر حسني يطرح "نفس النهاية"
وحرص نجم الجيل الفنان تامر حسني على توجيه رسالة خاصة للشباب الذين يعانون من مشكلات نفسية التي سببتها لهم متاعب الحياة، وذلك بعد قرأته لمجموعة كبيرة من التعليقات السلبية من قبل فئة عمرية من الشباب.
وجاءت رسالة تامر حسني كالآتي:" وكتب عبر حسابه الرسمي بموقع التواصل الاجتماعي "فيسبوك":" قرأت معظم التعليقات على قد ما قدرت على اخر بوست ليا، وفهمت أكتر حاجتين من تعليقاتهم عاملين إحباط لمعظمكم (اليأس من النجاح، احباط المقربين)، و بعضكم واصل لفقدان الامل و الشغف و بعضكم فاقد الامل في الحياه نفسها”.
وتابع:" هطلب طلب منكم قبل اي شيء افتكروا معاناتي في بدايتي و ظروفي الصعبه من غير اب و منغير اي فلوس و بنزل اشتغل في الشوارع من عامل بنزينه لسوبر ماركت لفاعل، يعني اللي بيبنوا العمارات بطلع طوب واسمنت عشان أرجع بيتي لامي الغلبانة بأي خمسة جنية بالإضافة لمرتب النادي لما كنت بلعب كوره كان مرتبي ٢٢ جنيه في الشهر منهم بقى تحويشة الميه والكهربا وعمليات أخويا عشان كان عيان لفتره كبيره كنت بعمل المستحيل فعلاً عشان أمي و أخويا و عشان أوصل لهدفي، كان جوايا سعي دائم لطريقين الكوره و الغناء”.
وقال تامر حسني:" و بقول دا عشان ناس كتير عايز انصحها بالخطه البديله عشان لو الحلم مجاش يكون في غيره زي ما انا كان نفسي ابقى لاعب كوره و الكوره مش ليا والانديه كلها مشوني رغم تفوقي كنت بسأل نفسي ليه الابواب كلها بتتقفل في وشي اتاريها بتتقفل عشان توجهني لمسار اخر و لما آمنت بكده فهمت قدام ان ربنا كان شايلي الاحسن ليا بس ساعتها مكنتش فاهم”.
واستكمل: "واللي بيسأل نفسه دلوقتي يعني انا اكمل في حلمي ولا اشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر
وأضاف تامر حسني:" وبالنسبه للمحبطين هيفضلوا موجودين انت اللي بتسمعلهم وانت اللي بتسمح انك تتأثر بيهم، امنع دا فوراً متبقاش السبب في اذية نفسك متتشدش غير لكل جميل و لكل ايجابي هتلاقي كل الحلو بيجيلك ومتعملش العكس عشان هيجيلك برضو، عشان كدا بقولك انت السبب دايماً قول يارب و اجتهد و افهم ان الراحه المطلقه في الجنه بس و احنا على الارض، ربنا قال انه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم اصعب و وصلوا يبقى الموضوع فينا ".
واختتم تامر حسني قائلاً:” متبقاش اكبر عدو لنفسك ، انت السبب ، خد قرار صارم فوراً في التغير و النهوض و النجاح ، والله هتوصل متسمعش غير لقلبك و سلم قلبك للّي خلقه و توكل على الله “.
يذكر أن اخر أعمال تامر حسني السينمائية، فيلم "بحبك"، والذي يعرض حاليًا بجميع دور العرض، وتدور أحداثه في إطار كوميدي ورومانسي، وتدور أحداثه حول صدق التعبير عن الحب بين الرجل والمرأة، ما يجعل الأحداث محيرة جدا.
ويشارك في العمل الكثيرمن نجوم الفن وأبرزهم"هنا الزاهد، والفنان حمدي الميرغني، والفنانة مدحت تيخة، وشهد الشاطر، وعالية راشد".