حنان شوقي مهاجمة محمد رمضان: مش فنان وبيقلد أحمد زكي

 قالت الفنانة حنان شوقي، إن "الفنان أحمد زكي أقوى فنيًا وتمثيليًا من الفنان عادل إمام، بينما الفنان عادل إمام يمتلك كاريزما ربانية"، معقبة: "ربنا مدهاله إنه لو عمل أي حاجة بتكون حلوة".

 وأضافت حنان شوقي، خلال لقائها مع برنامج "نص الكلام"، المعروض على فضائية "النهار"، أن الفنانة يسرا أفضل فنانات جيلها، قائلة: "يسرا ذكية ومن الستات القوية في الحياة، وبتعرف تعدي حواجز كتيرة في شغلها، عاملة زي الفرسة التي بتنط وتعدي الحواجز من غير ما تحسب أي حاجة".

 ونوهت "شوقي"، أن الفنانة تارا عماد لديها الذوق الخاص بها، معقبة: "لذيذة وروشة"، مضيفة أن الفنان كريم عبدالعزيز هو "نمبر وان" وليس محمد رمضان.

وتابعت: "لما شوفت كريم عبدالعزيز بيمثل في رمضان، حسيت إن نور الشريف لسة مامتش، ولا أحمد زكي مات، كريم عبدالعزيز بيشيل الوسط الفني على ايديه، الوسط الفني تقيل بـ كريم عبدالعزيز".

وأردفت: "أنا مش بتابع أي حاجة لـ محمد رمضان، لأنه مش صادق، وعلى الرغم من إن عنده كاريزما إلا أن

هو اللي بيبوظ نفسه، لأنه طول الوقت بيقلد أحمد زكي حتى في بلعان الريق".

 وأوضحت: "بأكره محمد رمضان لأني مبحبش الإنسان اللي بيجور على إنسان آخر، وياخد بونط على السوشيال ميديا، ويضيع حياة بني آدم تاني، ده مش اسمه فنان".

 وأشارت إلى: "لو اتطلب مني أشتغل مع محمد رمضان، مش هشتغل معاه حتى لو إدوني ملايين الملايين، لأنه هو اللي بيعمل كده في نفسه، وبيصعب عليا، لأن الغرور ساعات مش بيخلي صاحبه يعرف يتحكم فيها بعد كده".

 واختتمت: "خليه ينزل يشوف الجمهور بيقول عليه إيه، خليه يقعد مع ابن الطيار بس، أنا بحب محمد رمضان البني آدم، بس بكره أفعال محمد رمضان".