بالفيديو.. عمرو أديب: إيه الكفر والافترا ده.. هنستورد الرز بتاعنا من برا

شن الإعلامي عمرو أديب هجومًا حادًا على بعض التجار بسبب أزمة الأرز، وإعلان الحكومة عن قرارها باستيراده من الخارج لسد احتياجات السوق قبل شهر رمضان المبارك.

وقال "أديب" خلال برنامجه "القاهرة اليوم" المعروض على فضائية "اليوم": "إحنا بنتتج رز بيكفينا يكاد يكون من المحاصيل القليلة اللي بتكفينا، ومظنش في محصول تاني، وأوقات كتير بنصدره، وله شهرة كبيرة في منطقة الشرق الأوسط، ونوعه مختلف عن أي رز تاني، إحنا الوحيدين اللي عندنا الرز الكيمونو ده بتاعنا".

وتابع، "إحنا سمعنا عن الناس اللي بتاجر في الدولار، لكن لو قولتلكوا إن في مصريين غير شرفاء، اشتروا الرز وشالوه وعطشوا السوق لحد ما ارتفع سعره وابتدوا يبعوه، هل متخيلين حد يتاجر في الوفرة مش الندرة، متخيلين الكفر والافترا، بيتاجر في سلعة متوفرة".

وأضاف، "حصل أغرب حاجة في التاريخ متحصلش غير في مصر، من حوالى شهر نزل ناس لموا الرز اللي في السوق وملوا مخازن رز بس، دول كانوا عارفين إنه هيتم رفع الحظر عن تصدير الرز، فأول ما الحظر اترفع صدروا الرز بتاع الغلابة بالدولار".

واستطرد قائلًا: "المصيبة أن الدولة مضطرة إنها تستورد 80 ألف طن رز، الدولة بتستورد رز في الغالب هو بتاعنا وهي دي النكتة، والله الرز اللي هيستوردوا ده هو اللي احنا صدرناه، اللي بيعملوا كده كفره ولازم يتعدموا".

شاهد الفيديو..