سحور على آهات عم نجاتي!!

هو و هى

الخميس, 18 أغسطس 2011 16:00
سحور على آهات عم نجاتي!!
بقلم :عمرو عكاشه ورانيا صالح

"الله يمسيك بالخير ياعم نجاتى" جمله بكررها كل يوم قبل السحور لما بفتكر صوته وهو بينادى.. "اصحى يانايم .. وحد الدايم ..إصحى ياعبده .. اصحى ياسينه" .. مش عارف ليه بقى له أكتر من اسبوع مش بيجى.. لعل المانع خير .. بس الغريبة انه من يوم ما مشى والفلوس اللى معايا مفيش فيها بركه ..

 

كل يوم ارجع البيت وانا معايا فكه فى جيبى ..إشى خمسه جنيه صحيحه ..على 3 جنيه ورق.. على 2 جنيه فضه من بتوع اليومين دول.. ده غير 10جنيه مستخبية كده ولاّ كده.. لكن الشئ الغريب أنى أجى انزل الصبح واحط أيدى فى جيبى بكل حماس .. ملاقيش غير الـ 2 جنيه الفكه .. أقول أمال ازاى امبارح كان بيتهيألى أن جيبى مليان فلوس .. يمكن تخاريف صيام.. بعدها أروح الشغل.. وأول ماأخلص وأنا راجع اشترى طلبات البيت بعد مافك 50جنيه .. أبقى متأكد ان معايا ف جيبى حوالى 32 جنيه ونص.. باقى الخمسين ..ورقة بعشرين وورقتين بخمسة و2 جنيه ونص فكة.... لكن آجى تانى يوم يتكرر اللى حصل اليوم اللى قبله.. وألاقى ورقة بخمسة جنيه بس ومعاها جنيه فضة يتيم!!

 

صوته بيلبش جتتي

 وبعدين لاحظت حاجه غريبه .. كل ما اجيب سيرة عم نجاتى المسحراتى قدام سنية ألاقيها تقولى .."جاته نيله الموكوس .. راجل صوته عالى عامل زى زمارة القطر"!! ..ابتسم قدامها واقول في نفسى" بقى هو اللى موكوس برضه؟ .. وهو اللى صوته زى زمارة القطر .. أمال أنتى تبقى أيه؟!" .. بعدها ألاقيها بتقولى .. "انت بتقول حاجة؟" .. أرد عليها .." لا ياحياتى .. أنا بقول أن عندك حق!!"

حاولت كذا مرة أعرف ايه اللى بيحصل للفلوس اللى ف جيبى .. مش عارف .. طب وليه سنية بتكرهه كده مع إنه راجل طيب .. مش فاهم!! .. بس الشئ الغريب إنى لاحظت إن الست سنية حرمى المصون بقت تشترى حاجات أكثر من الأول.. إشى عقد .. برفان . سلاسل فضه.. وحاجات كثير مش

عارف بتجيبها منين مع إنها كانت ليل نهار تشكتى إن مصروف البيت مش بيكفى ..

سألت على عم نجاتى عرفت ان المسكين مصاب وراقد فى المستشفى بقاله أسبوع .. قلت أروح أزوره واكسب فيه ثواب، بعد الفطار صليت التراويح وطلعت جرى ع المستشفى.. أول مارحت لقيت دماغه مربوطه بشاش كتير..رحت قايله" خير ياعم نجاتى .. ألف سلامة عليك...الواحد مش عارف يتسحر من غيرك ..وحشنى صوتك اللى كان بيرن فى ودانى كل يوم"..

رد عليا المسكين وقالى " الله يسلمك ياعبده افندى" .. بعدها دخلت فى الموضوع على طول وسألته .. "ايه اللى حصل" .. فقال "ابدا .. كنت كل مأعدى جنب بيتكم عشان انادى وأقول اصحى يانايم ..اسمع صوت واحده بتقول ..الله يخرب بيتك حتصحى الراجل ..الظاهر ولا مؤاخذه كانت بتسرق حاجه من هدوم جوزها" ..وراح مكمل " آه لو اعرف مين الوليه دى اللى رمت قُلّة الميه على راسى!!!".

بقلم: عمرو عكاشة


 

 المحروس وعصمت المسحراتي!

الستات غلابه والرجاله دول قطيعه ولا بيحسوا..أنا حضراتكم في رمضان بابقى الشيف عصمت..شيف لتلاتين يوم فطار وسحور..وشي في وش البوتاجاز..لغاية ما قرب يبهت عليا.. وبابقى كمان عم عصمت المسحراتي..

ماهو البيه المحروس عاملني منبه..لازم اصحيه عشان يتسحر.. وحضرته ليه طقوس عشان يرضى يصحى..لازم أبدأ اصحيه قبل الميعاد بساعتين عشان البيه ما بيقومش من أول مره!! كل ربع ساعه لازم احاول تاني وتالت وعاشر لغاية ما نفسي ينقطع.. وشويه أدادي فيه واحايله وشويه ازعق وادعي عليه وعلى كل الرجاله اللي زيه!!

ووقعتي مهببه لو صحي ولقاني لسه بحضر في السحور..لازم يقوم م السرير ع الأكل عدل.. طبق فول بالزيت ده أساسي ومفيش مانع اسخن بواقي الأكل اللي كان ع الفطار، يمكن نفسه تيجي لحاجه منها.. وطبعا طبق بيض

أومليت معتبر.. وجبنه تلاجة وبراميلي.. وجنبهم شويه تحابيش من بتنجان مخلل وطرشي وبصل..آه بصل.. مستغربين ليه؟.. البصل ع السحور ده الأنتيم بتاع المحروس مايقدرش يعيش من غيره!!

الضرب في النايم حرام

وفي يوم.. بعد المحروس ما حلى وهو أساسا ما بيبطلش أكل من ساعة الفطار.. قال يقوم ياخد قيلولة كل يوم، وطبعا مانسيش يسمم بدني وهو بيقولي: "بقولك إيه أنا داخل افرد ضهري.. يبقى يومك قطران لو ضاع عليا السحور!!"..رديت عليه وأنا شايطه: "بقولك ايه يا محروس انا مش شغاله عندك ، وبعدين انا بتطلع روحي عشان تصحى.. وافرض ماصحتش اعملك ايه!!

" لقيته رادد: "نعم نعم نعم..ايه ما صحتش دي..ادلقي عليا جردلين ميه..اعملي أي حاجه..انت عايزاني اصوم وانا على لحم بطني.. شوفوا الوليه!!"

دخل البيه ينام بعد ما حط جنبه ازازتين ميه.. كل ما يتقلب ياخدله رضعه منهم ويكمل نوم تاني!!

وبدأ القرف اليومي.. بحس اني على حلبة المصارعه الحره.. ضرب المنبه بتاعي قبل السحور بساعتين قومت على طول اصحيه وطبعا زي العاده ما بيتحركش، وساعات يشوح بإيديه أو يديني بونيه وهو بيقول هششششش...

جربت تاني بعدها بعشر دقايق وقعدت اهز فيه..إلا والاقيلكم طاااااخ.. ضرب إيدي ولا كأنه بيضرب ناموسه!! واموت واعرف ظبط ايديه ازاي وهو مغمض عنيه.. بس استغرب ليه إذا كان وهو مغمض بيمد إيديه ياخدله رضعه من إزازه الميه ويكمل نوم تاني..!!

بعدها بربع ساعه بدأت الجوله التانيه.. لبست جردل فوق دماغي وجبت عصاية المقشة وقعدت اهزه بيها وانا محافظه على مسافه بيني وبينه.. في ثانيه كان خاطف العصايا واداني بيها على دماغي وأخدله رضعه من الإزازه ورجع نام !!

هو أي نعم الجردل عمل الواجب بس الضربة سمعت في وداني.. بصراحة المرة دي قرفت من أم الشغلانة دي.. قلت خلاص أفرد انا كمان شويه ربع ولا نص ساعه ماهو لسه بدري.. وساعتها لو ماصحاش أبقى أدلق عليه جردلين ميه يمكن يفطس وارتاح!!

محستش بنفسي إلا وبجعوره انفتحت ع الرابع.. قمت مفزوعه أتاري راحت عليا نومه والمحروس واقف قدام الشباك باصص ع السما ومتنح.. وأول ما شافني قدامه راح شاخط: "إيه يا وليه اللي انا شايفه ده..انطقي..دي الدنيا نور!!"..بصراحه اتلبشت لما شفته هايج زي التور ورحت راده بتلقائيه من الخضه: "ما انت ما ارضتش تصحى ولا اللي متخدر..حتى جردلين الميه معملوش معاك حاجه!!"..قعد يفتش في هدومه ويقول: "ايه يا وليه انتي هتعمليهم عليا..ماانا ناشف اهو!!"..رحت راده عليه: "اسكت..مش انت طلعت من اياهم..اللي بيعدي البحر ولا يتبلش!!"

بقلم: رانيا صالح

موضوعات ذات صلة:

عازم معزوم.. مع سنية ومحروس مديون!

في رمضان.. الموز هو الحل!!