رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

زنكلوني والمحروس عينيهم زايغه!!

هو و هى

الخميس, 07 يوليو 2011 12:12


مش عارف أعمل إيه في الولية سنيه المفترية..عاملة زي العمل الردي..ليل نهار تراقبني..وانا نازل الشغل..وانا في الشغل..حتى لما أرجع البيت وانا بتفرج ع التلفزيون..كل شوية تقولي.."اقلب القناة يا منيل..عمال تتفرج ع البنات الحلوة على MBC4"!! ماكدبش عليكم انا فعلا بعمل كده..ما انا معذور برضه..شوال البطاطا اللي اسمه سنية مكانش كده ساعة ما اتجوزنا..الولية المهفوفة دي كان اسمها "سوسو"!! وكل اصحابها كانوا بينادوها بالإسم ده..طبعا اتخدعت ووقعت ولا حدش سمى عليا!!..وبعدين بعد الجواز لقيت الغزال..ابتدى يتحول لفيل..ومش فيل عادي.."الفيل فلافيلو" كمان!! ليل نهار تاكل محشي وصواني بتنجان واشي حواوشي وكنافة بالسمنه البلدي..طب ابص لها ازاي يا عالم؟! وأول ما اقولها يا سنيه لازم تخسى شوية..مش هينفع كده تروح قايله.."جرى ايه ياروح خالتك..انت نسيت نفسك ولا ايه.."..المهم انها قالت الجملة دي وهي ماسكة ساطور وبتبص لي نظره مش طبيعيه..والادهى انها كانت ماسكه في ايديها التانيه أكياس بلاستيك سوده!

مش شايف أيها ست

من بعدها قررت اتفرج على الحلقات الأجنبيه عشان اشوف الكائنات المنقرضه دي اللي اسمها ستات حلوة!!..المشكلة ان سنية مصممة ان اعاكسها واغازلها..طب ازاي بس يا عالم..وانا كمان مصيبتي اني مابعرفش اكدب..كان يوم اسود لما طلبت مني اغني لها اغنيه عاطفيه..مادريتش بنفسي وانا بقول "الفيل ابو زلومه..عامل لحبيبته عزومه..جاب لها لحمة مفرومة..اكلت صبحت عيانه"..طبعا ما لحقتش اكمل..لقيت سنيه بتصرخ فيا ولا الطرزان في زمانه.."هو مين الفيل ده يا روح خالتك.."
المشكله مش في صوت سنية وصريخها بس..المصيبة في ايديها الطرشة اللي دايماً تسبق لسانها وطبعا ايديها اللهم صلي ع النبي..كل ايد لوحدها 10 كيلو..وهي مش بتراعي..ده الاتحاد الدولي للمصارعه الحره عمره ما بينزل مصارع في وزن الذبابه قصاد مصارع في وزن الديك..مابالكم بمصارع وزن الناموسه قصاد مصارع وزن الفيل..طبعا النتيجة محسومة!!
مكانش فيه قدامي حد اشتكي له إلا الأستاذ "سلكاوي" صاحبي في المصلحة اللي كل مره يوديني في داهيه بنصايحه المهببه..لكن اعمل ايه..امري لله مفيش حد قدامي الا هو..مش بيبخل عليا بالنصيحة..اول ما حكيت له راح مشمر كمامه ومنزل النضاره على طرف مناخيره وقال.."شوف يا سيد زنكلوني..انت جيت للشخص المناسب..مشكلتك حلها عندي..انت تروح مدينة 6 أكتوبر أو قدام اي جامعة خاصة..هتلافي بنات زي العسل..لأ وايه..مال وجمال ووسط غزال..مش لازم تعاكس..انا عارفك راجل مؤدب وغلبان..كفاية بس تشوف ان فيه حاجه اسمها ستات بجد..مش شوال بطاطا زي سنيه!!"
طبعا ما كدبتش خبر..وطلعت على اول جامعه خاصه..لقيت 4 بنات زي القمر ماشيين يضحكوا..قلت يا سلام..ايوه كده..اتفرج ع الحاجات الحلوه دي..بس الغريبه انهم اول ما شافوني واحده فيهم قالت.."ياختي عليه وعلى جماله.." والتانيه قالت.."ايه يا واد العسل ده"..والتالته قالت.."هو القمر بيطلع بالنهار ولا ايه يا بنات" والرابعة قالت "ده ولا الكتكوت اللي لسه طالع من البيضه..يا اخواتي ع الكتكوت!!" طبعا انا سمعت كده من هنا..والدم ضرب في نافوخي من هنا ووقعت ع الأرض من الدوخة..الغريبة انى وانا دايخ سمعتهم بيقولوا كلام غريب..واحدة فيهم مسكت التليفون وقالت"أيوة يا مدام سنية...كله تمام...تعالى استلمى البضاعة..ماتنسيش الحلاوة( 5000 )جنيه بالتمام والكمال...كل جنيه ينطح جنيه!!"
طبعا بكلمكم دلوقتى وانا مربوط فى رجل السرير بأتخن حبل شفته فى حياتى..المشكلة انى سامع كركبة برة..مش عارف الولية المجنونة دى بتجهز لإيه...!!!!!"

بقلم :عمرو عكاشة


ميمي شلاطه!

الرجالة دول دايما بطرانين وعنيهم فارغة..مهما تعمل الست مننا ولا يطمر فيهم..كنت رايحه مع المحروس البنك..وقاعدين مستنيين دورنا..وفات ييجي نص ساعة لغاية ما نادوا على رقمنا..استقبلتنا واحده زي القمر..طول ورشاقة متقولوش مانيكان..حاجة كده ما بنشوفهاش غير في التليفزيون..ولا ريحة البرفان اللي حاطاه..يجنن..طبعا عملت نفسي ولا شايفاها اصلا..ولا شامه حاجه!
بس حسيت اني في نص هدومي لما لقيت المحروس مشالش عينيه من عليها ومتنح..وهي لما لقته كده طنشته وقعدت تاخد مني البيانات..وفجأه تقريبا البنك كله سمعه وهي بيقولها: "لأ..سوسو..لأ..متقوليش!!!"..بصت له وهي مرتبكه ومش فاهمة هو قصده ايه..بدأ يبربش بعينيه ويقول بصوته الجهوري "ايه يا سوسو..مش ممكن تكوني مش عارفاني..ده لو العالم كله مش عارفني..يستحيل انتي!!!"..وتقريبا كنا فرجة..كل موظفين البنك بالعملا اللي قدامهم سابوا اللي في ايديهم وباصين ناحيتنا..ردت عليه وهي بتحاول تكون لطيفة "معلهش..هو انا اعرف حضرتك؟!!"..راح المحروس مقاطعها "ايه يا سوسو..نسيتي ميمي"..هنا اتنطرت من مكانها وهي مش مصدقة "ميمي!!!..لأ مش ممكن..ميمي شلاطه..معقوله بعد السنين دي كلها..بس شكلك يعني اتغير خالص!!!"...سألها "عشان يعني النظاره؟"...شاورت على راسها وهي بتقول "مش النظاره بس.." قالها "قصدك الصلعة..ما انت اكيد عارفه اللي بيفكروا كتير تملي بيحصلهم كده"..راحت سألاه بخبث "ويا ترى يا ميمي زي ما انت شقي
ولا اتهديت"؟!!
مش عارفه اوصلكم احساسي وقتها كان عامل ازاي وانا قاعده في وسطهم وهما بيسترجعوا ذكريات زمان..كنت حاسه اني عايزه اولع فيهم هما الاتنين..أو اولع في نفسي..واللي هيموتني ان المحروس اللي دايما قالب سحنته..فرد بوزه وقعد يدندن طول الطريق واحنا راجعين البيت..
قررت انكد عليه فقلت له "بس تعرف هي طويله زياده وحلاوتها دي صناعي"..راح ملعب لي حواجبه وهو بيقول "العبي غيرها..اش فهمك انت في صنف الحريم..سوسو دي لعلمك كانت فتاة احلامي ايام الجامعة..شوفتي ازاي كانت هتتجنن من الفرحة لما شافتني"..رديت عليه وانا باجز على سناني "لأ مخدتش بالي يا..مي مي...الا قولي..هو سعادتك طلعت ميمي ايه؟"
المحروس ولا شلاطه دخل في مود تاني اليومين دول..تقريبا سرحان على طول...وعمال يسمع "اهواك" لعبد الحليم وشغال اعذار عشان يروح البنك ويشوف اللي ما تتسمى..مره قال ايه..كارت الايه تي ام بتاعه مش شغال..فتروح سوسو معاه لغاية المكنه تلاقيه شغال زي الفل فتقوله بدلع: "ايه يا ميمي ماهو شغال اهه!!" فيروح عامل نفسه مستغرب ويقول: "غريبه..اشتغل ازاي؟ ده طلع روحي"!! ومره قال ايه..نسي الباسوورد بتاعه..ومره نسي رصيده فيه كام..ومره بيستفسر عن القروض والفوايد..ومره قال ايه..عايز يتأكد عنوان بيته مكتوب صح..وفي كل مره يصر انه يتعامل معاها هي شخصياً حتى لو فيه موظفين تانيين فاضيين!

الفتك..والبيه جوزها
وكل مره اشوفه خارج يتحجج عشان يروح البنك..متعرفوش ايه اللي بيحصل لي..بحس بالدم بيغلي في عروقي..وهاموت واعمل اي حاجه تعطله عن الخروج..ان شالله اديله على دماغه بايد المقشه..ما كدبش عليكم انا متخيلتش ان ييجي اليوم واغير ع المحروس..على ايه؟..على حلاوة صلعته ولا كرشه المفرود قدامه مترين..بس معرفش ليه العفاريت بتنطط قدامي اول ما احس ان الموضوع فيه سوسو..الصنف اياه..المستورد!
وفي يوم لقيته لابس البدله اللي حيلته اللي اصلا مش بيهوب ناحيتها الا لما يكون رايح فرح..ولقيته حاطت ورده دبلانه في جيب الجاكته وقال ايه رايح البنك..اتجننت والفار لعب في عبي وفكرت اروح وراه وارشهم الاتنين بفليت..اول ما دخل المحروس البنك استقبلته سوسو بحراره ودلع..بس اعتذرت له المره دي انها مشغوله لشوشتها..قالها وهو بيبربش بعينيه: "ومالو يا سوسو..استناكي..لو طلبت استناكي العمر كله"!! المحروس قعد يستناها وعنيه منزلتش من عليها وشغال دندنه وكان حاسس ان النهارده يوم سعده وانه كويس انها طلبت منه يستناها لما تخلص عشان يعرف يقعد معاها براحته!!
وبعد ييجي اربع ساعات انتظار..المحروس شاف واحد كده بيه طول وعرض وشياكه بيقول لسوسو: "جاهزه يا حبيبتي"...قالت له "ايوه يا روحي"...وحطوا ايديهم في ايدين بعض وهما ماشيين..وهما خارجين من البنك البيه المحترم لاحظ المحروس باصص عليهم ومتنح فسألها: "هو في حد مستنيكي؟"..قالت له "سيبك..ده واحد عقله شلاطه"..المحروس ولا اللي اخدله زلطه في عينه فسأل اللي جنبه "هو يطلع مين ده؟!!"...قاله "هو انت متعرفش؟!!..ده البيه مدير البنك..جوزها"!!
بقلم: رانيا صالح

موضوعات ذات صلة

الست حلالوفا.. والمحروس نيولوك!!

جوازة الندامة في عصر التحولات

مع سنية.. آخرة الشعر علقة!

أشتاتا أشتوت .. حاسد ولا محسود!

"فيس توك.. فيس بوق" سنيه ومحروس أون لاين!