محشي سنية .. وجرعة محروس

هو و هى

الأربعاء, 02 مايو 2012 14:04
محشي سنية .. وجرعة محروس
كتب:عمرو عكاشة- رانيا صالح

من يوم ما اتجوزت مقصوفة الرقبة اللى اسمها سنية دى وانا حاسس انى متجوز حلّة محشى !!..مستغربين ليه؟..أيوة حلّة محشى..ماهو انا بشوف حلة المحشى اكتر ما بشوف سنية..لأن الهانم هوايتها المحشى بكل أنواعه..إشى محشى ورق عنب..وإشى محشى بتنجان..وإشى محشى كوسة..وطبعاً محشى الكرنب..

لدرجة ان سنية نفسها من كتر أكل محشى الكرنب بقت عبارة عن كرنبة متحركة ..

حتى لما كنت أروح معاها السوق...أسمع تعليقات البياعين بيتهامسوا..مين الست اللى عاملة زى الكرنبة اللى جنب الراجل ده..ولاّ يوم ما طلبت منى أشترى كرنب واحنا فى السوق..قالت لى.."انت ياراجل انت..روح هز طولك واشترى لنا كرنب أعمله محشى على ما أجيب الطماطم"..ولما رحت أشترى الكرنب لقيت الراجل بيقولى.."الكرنب كله صغير..وبعدين يا استاذ فيه حد يبقى عنده كرنبة كبيرة كده ويدوّر على كرنب صغير؟!"

محشي العيد

وطبعاً المحشى بقى واحد من اهل البيت..تلاقيه فى كل الأعياد...العيد الصغير بتاع الكحك..تعمل فيه محشى..ليه؟..تقول الكحك ده للفطار...لكن فى الغدا لازم تاكلوا محشى..وطبعاً العيد الكبير لازم تعمل محشى جنب اللحمة والمرقة !!..حتى شم النسيم ماسابتهوش...عملت فيه محشى !!..تخيلوا !!!!!!...سنية وصلت للعالمية ولموسوعة جينيس بمحشى الفسيخ والرنجة...عمركوا سمعتوا عن محشى فسيخ؟.

حتى كمان عيد تحرير سينا..ولما سألتها "إيه علاقة المحشى بتحرير سيناء يا سنية؟"..ردت عليّا .."أصل شبه جزيرة سينا دى لو بصيت عليها فى الخريطة هتلاقيها عاملة زى المحشى !!"

تعبت فى حياتى..خاصة ان سنية استاذة فى العزومات..وكل شوية تعمل حلل محشى..لكن اللى جننى إنى رجعت فى يوم لقيت مفيش مكان اقعد فيه..كرنب فى الصالة..حلل فاضية وحلل فيها رز وصلصة على كراسى الصالة.. قلت لها "يا سنية حرام عليكى أروح فين منك ومن المحشى..حرام كده..أنا نفسى أتغدى وانام شوية بعد الضهر"..لقيتها بترد.."جرى ايه يا زنكلونى يابن

بهية..انا رايحة دش بارتى عند واحدة من جاراتى..وكل واحدة فينا هتعمل صنف..اللى هتعمل صينية بطاطس..واللى هتعمل رز...واللى هتعمل كنافة...لكن انا بقى تخصص محشى"..رديت "ربنا يوفقك يا سنية يا نور عنية"..وبعدها قلت فى سرّى" دش بارتى؟..الله يرحم ابوكى اللى كان بياكل على الطبلية!!"..لقيتها ردت"بتبرطم تقول ايه يا موكوس.. خد لك رغيف حاف قرقض فيه ونام...مش ناقصة عطلة !!"

أخدتها من أصيرها ورحت آخد رغيف أقرقض فيه..حاكم سنية دى لمّا بتحكّم رأيها فى حاجة..يبقى لازم تتعمل..لو قالت آكل عيش حاف...يبقى لازم آكل..ده غير ان إيديها زى المرزبّة ربنا ما يورّيكوا !!!المهم دخلت انام..بس كانت احلى نومة...حلمت ان فيه واحدة حلوة قدامى..وريحتها تفتح النفس..وأحلى حاجة فيها انها كانت دافية..مش تلاجة زى سنية..بصراحة مادريتش بنفسى الا وانا ببوسها كتير...لكن للأسف..الحلو مايكملش..صحيت على الولية سنية زمارة القطر وهى بتصرخ فيّا وبتقول.." اصحى يا منيل...بتعمل ايه فى حلّة المحشى اللى شلتها من ع النار وحطيتها جنبك ع السرير ؟!!!!!!" 
 

بقلم: عمرو عكاشة


المحروس وجرعة الجبنة الرومي!

بحب اوي الجبنه الرومي ويا سلام بقى لو في قلب عيش فينو سخن لسه طالع من الفرن..ويا سلام بقى لو جنبه زتون أخضر..وكوباية شاي دبل..ده بقى المزاج بتاعي..بتكيف بيه..

بس الحقيقه المره..مش بس انا العاشقة للجبنه الرومي..كل ما اشترى الجبنه من هنا..الاقيها اتنسفت!..يبقى كويس لو لحقت منها سندويتش ولا اتنين.. تقولوش فار قاعد جوه التلاجه..وليه ابعد بعيد..هو فيه عندي فار فعلا بس بره التلاجه..اللي هو المحروس جوزي..بيموت في الجبنه الرومي زي

عنيه..بس يشتريها لأ!

لما فاض بيه رحت قايله: "بص يا محروس انا فاض بيه..خليك راجل مرّة واشترى انت المره الجايه الجبنه الرومي"..لقيته ولا اللي سمع له شتيمه وكان في ايده سندويتش طول دراعه ماليه جبنه رومي وزتون اخضر..راح سابه من ايده بعصبية وقام هو بيقول: "شوفوا الولية!!!!..بتبصلي في اللقمة اللي باكلها..سديتي نفسي الله يسد نفسك يا بعيده"..لسه بقرب امسك السندويتش كان في ثانية لاطشه وهو بيبصلي شذراً وبيقول: "هاأوو..العبي غيرها يا شاطرة"..وراح قاضم قضمه كبيره عشان يغيظني!!

بصراحه أنا فعلا ولعت.. اصلي لو هاشتري كل يوم جبنه رومي الميزانية هتخرم معايا..والبيه مفيش مره يحنن قلبه ويشتري هو..رحت شاريه جبنه بيضه وقلت اهي شغاله وبتعمر مش زي الرومي..وهو اكيد لما يشتاق هيجيب الرومي..ويبقى كده حطيته قدام الأمر الواقع..

وفعلا بقالنا اسبوع ما دخلتش بيتنا الجبنه الرومي..لقيت المحروس في يوم دخل عليا المطبخ وفتح التلاجه وقعد يفتش فيها ولا المباحث..وبعد ما جابها الأرض سألني وهو بيشخط "مخبياها فين..ردي..انطقي..عارفه يومك اسود لو لقيتها انا..فطلعيها من نفسك احسنلك"..طبعا عملت هبله وانا بقوله "سلامة عقلك يا محروس هي ايه دي؟"..طبعا لانه فاهم اني فاهمه ساب المطبخ وهو بينفخ..

محتاجة الجرعة

اتبسطت اوي وحسيت ان رد فعله ده معناه انه قرب يسلم..ما اكيد الرومي عملت اجدعها شغل وبقى محتاج للجرعه..ياسلااام يا ما نفسي افتح التلاجه قريب الاقي الرومي قدامي..حتى التلاجه ملهاش طعم من غيرها..وبصراحه انا كمان خلاص قربت اسلم..حاسه اني محتاجه انا كمان الجرعه وبسرعه..

الغريبه ان مر اسبوع اتنين تلاته ولا حس ولا خبر..والمحروس آخر انبساط ولا باين عليه اصلا ان فيه حاجه ناقصاه..مابقاش عندي امل خالص انه هيشتري حاجه..ده اللي جنني انه بقى يقوم يعمل سندويتشات جبنه بيضه وما بيسألش عن الرومي خالص..كأنها اختفت من قاموس حياته!! بصراحه سلمت نمر..وحسيت ان مش معقول احرم نفسي من حاجه بحبها عشان البيه..فعديت بعد الشغل على عم محمود البقال اللي تحت البيت اشتري منه تمن رومي..فلقيته قايل: "ايوه كده يا مدام عصمت..دانا قعدت يجي شهر اقنع في محروس بيه انه لما يشتري بالكيلو اوفر واحسن ما يعدي عليا كل يوم اعمله سندويتش جبنه رومي"!!

بقلم:رانيا صالح

موضوعات ذات صلة:

سنية بالخيار.. وحمارمحروس!!