شريف مدكور يتعرض لانتقادات حادة بسبب لبس المحجبات (شاهد)

 تعرض الإعلامي شريف مدكور، لحملة كبيرة من الانتقادات على مواقع التواصل الاجتماعي، بعد نشره فيديو بالأمس بتحديد قواعد لظهور المحجبات معه على الشاشة، الأمر الذي جعل البعض يشك في نيته، بينما البعض الآخر أيده في هذ الرأي.

 

 اقرأ أيضًا .. شريف مدكور يضع قواعد للبس المحجبات التي تظهر معه على الشاشة (شاهد)

 

 

 ترصد بوابة الوفد الإلكترونية بعض وجهات النظر والتعليقات التي انتقدت دعوة مدكور للحجاب، وهى كالآتى:

 

 "أنا مش عارفة ايه توجهك، ولا ايه مرجعيتك، ولا ايه غرضك ولن اتدخل في نيتك، بس كلامك سليم جدًا وأنت بتقول الدليل من قول النبي صلى الله عليه وسلم، أنه لا يصف ولا يشف، وده الصح للمحجبات سواء ارتضوا أو لأ، ده الدين الصح، فربنا يرزقك الإخلاص والصدق والثواب إنك تكون عملت دعوة للستات يوسعوا لبسهم، زي ماقلت، عشان ربنا.. و فعلًا لما بنشتغل مع الأجانب هم نفسهم بيسألونا هو ليه في ناس لابسة كده، في مغطي وفي كاشف وفي محترم وفي إسفاف، والله هم نفسهم بياخدوا عننا فكرة إننا ملخبطين و مالناش ماسك".

 

 

 "وأنت مالك يا شريف؟ يخصك في ايه الستات تلبس ايه ولا تقلع ايه؟ .. قاعد بتنظر وتدي رأي في شئ ما يخصكش خالص ليه؟ وبتقعد تعيط بعد كده لما حد يشتمك أو يتدخل في حياتك الشخصية! ندخل؟ ولا عيب؟".

 

 "بص أنا بحترمك جدًا وبقدرك جدًا وربنا يعلم وعارفة إنك على قدر من الثقافة والتدين وطلعت قبل كده وقولت إنك بتحب جدًا تغسل الموتى كثواب وبجد أنا بدعيلك ربنا يشفيك ويباركلك بس لو تسمحلي كأخت في الله أنا في حاجة بحس إنها بتدايقني منك واسفة جدًا لو تعليقي هيدايقك بس اعتبرني أختك في الله أنا بزعل جدًا لما حضرتك بترقص في فقرة من فقرات برنامجك وبحس أن ده ممكن يشوه من قدر جمال قلبك وأخلاقك وأنت حد تستاهل الخير كله وإنك تكون مثل لأي حد، أنا بعتذر لو تعليقي هيضايق حضرتك".

 

 

 وكان الإعلامي شريف مدكور، وضع قواعد عدة للبس السيدات التي تظهر معه في برنامجه على الهواء، قائلًا: "أي واحدة محجبة تدخل عندي وتطلع تصور لازم

تكون لابسة ما لا يصف ولا يشف، لأن أنا بعرض برنامج وشاشة وبوري صورة المصريين".

 

 وتابع "مدكور" خلال فيديو نشره على صفحته الرسمية على الفيسبوك: "بقيت ألاحظ أن بيجييلي ضيوف محجبات لابسين طرحة مغطيين راسهم ولابسين بدي وهم ممتلئات شوية، وكل جسمهم متفصل، وبنطلون ضيق جدًا وجزمة بكعب كبيرة وميكب كامل ورموش كبيرة".

 

 وواصل الإعلامي حديث، قائلًا: "كل واحد حر في لبسه، وعمري ما هاتدخل في شؤون حد، لكن بالنسبالي ده مش هيطلع على الشاشة، فحطيت قواعد إن أي سيدة محجبة تظهر عندي في البرنامج، لازم تكون لابسة فضفاض ومش ألوان صاخبة، ولو هتلبس بنطلون يكون واسع".

 

 وأضاف: "ساعات بشوف محجبات بييجوا لي في البرنامج لابسين حاجات مجسمة، مش بتلبسها اللي مش محجبة، وبدأ يحصل مشاكل والضيوف تتخانق معانا ويزعلوا، لكن على الشاشة مش هطلع صور بلدي أو ديني، حد يقول إيه ده".

 

 واختتم حديثه، قائلًا: "في بعض المذيعات والإعلاميات المحجبات بيطلعوا على الشاشة بيبقوا حاطين ميكب كتير أوي ورموش تقيلة كتيرة أوي، وهم واجهة والناس بتقلدهم، ونيتي الحفاظ على الشكل، ويا إما نتحجب ويكون فيه التزام ونستغنى عن بعض الحاجات عشان ربنا، وعشان الثواب، لكن هنتدلع في النص ما تقوليش إنه فرض، ساعتها قل لي إنه فضيلة، لأن الفرض يكون فيه التزام وما بيبقاش فيه شكل استفزازي".

 

 

 فيديو .. شريف مدكور : "إصابتي بالسرطان هدية حلوة من ربنا"