بالفيديو.. أسامة كمال: والد السيسي مكنش رئيس وأبويا مكنش إعلامي

افتتح الإعلامي أسامة كمال، مقدمة برنامج " مساء dmc"، قائلا: "فى مصر بنقول ابن الظابط ظابط وابن القاضى قاضى وابن الدكتور دكتور وابن الفنان فنان، ده ما ينطبقش على ناس كتير، والد الرئيس عبدالفتاح السيسى، مش ظابط زى ماكلنا عارفين". 

 

وقال "كمال" خلال برنامج " مساء dmc"، الذي يبث على شاشة "dmc"، مساء اليوم الأربعاء: "والد المهندس مصطفى مدبولى مش مهندس زى ما كل الناس عارفين، وعشان محدش يقول أسامة كمال بيدافع عن مين، أحب أقولكم إن أبويا رحمة الله عليه، ما كانش إعلامي مش زي ما كل الناس عارفين".

 

وتابع: "مش صحيح أن كل ظابط ابوه ظابط، ولا صحيح أن كل دكتور ابوه دكتور. طب آيه الصح؟ الصح فى مصر، أن كل واحد مش بيتقبل فى شغلانة بيقول الواسطة والصح إن كل واحد بيتقدم لشغلانة بيشوف إنه احق بيها، هو فقط لا غير".

 

وواصل: "الصح كمان إن معظم المهن الكويسة فى مصر محتاجة واسطة، ومش لازم تبقى فاشل عشان تحتاج واسطة، إنما الواسطة فى مصر، اللى هي الباب المفتوح والواسع للرشوة، مجرد طريق للى يقدر عليه عشان ياخد حقه، وبرضه ما يمنعش أنها ممكن توصلك فتاخد حق غيرك".

 

وتسائل الإعلامي قائلًا: "ليه الناس بتمسك فى فكرة إن ابن الظابط ظابط وابن الدكتور دكتور رغم أن غيرهم مواطنين من حقهم يتقدموا لشغل أى وظيفة طالما عندهم مؤهلاتها، ورغم إن جهات كتير فى مصر عملت لنفسها قانون أو سنت لنفسها سنة إسمها حق أبناء العاملين فى التعيين".

شاهد الفيديو: