ياسمين عز لـ مذيعة شهيرة.. لو ممغوصة من نجاحنا خدي مسكن
![ياسمين عز](/themes/alwafd/assets/images/no.jpg)
أثارت المذيعة الشابة ياسمين عز كعادتها الجدل مساء أمس بظهورها الأول عقب فترة من توقف برنامجها "كلام الناس" المذاع على قناة mbc مصر.
وبغموض ودون توجيه مباشر شنت الإعلامية في بداية حلقتها هجوم حاد بألفاظ لم تكن مألوفة للجميع على إحدى المذيعات دون ذكر اسمها، بسبب حديثها عن كرامة المرأة بعد الزواج.
وقالت ياسمين: "الحمدلله أن ربنا شغلني بنفسي مش بغيري وده اللي مخليني مبسوطة، قالوا لنا زمان حكمة رائعة، يا محلى المبسوطة قدام المشعوطة".
وتابعت: "طبعا المبسوطة دي كلنا عارفينها، أما المشعوطة دي هتقولولي يا ياسمين يعني ايه مشعوطة يعني متشعوطة كده، لا على حامي ولا بارد، مفلفلة كدة اللهم احفظنا".
وأردفت قائلة: " وأنا لما آجي اتكلم عن الكرامة بين الزوج والزوجة، هو أنتي زوجة؟ طيب لما أتكلم عن الرجل والست، هل أنتي ست؟ هو انتي ست من اللي أنا أقصدها، أبدا إطلاقا خالص، فشوفي إذا أنتي ممغوصة بنجاحنا خدي مسكن، وإذا أنتي مشعوطة من كلامنا خدي مهدئ".
وأضافت عز: "انتي حابة تكوني زي الراجل كوني حابة تكوني ند بند وراس براس عوزي، حابة تكوني مسترجلة حبي، في كل الأحوال النوعية دي بتوع الصوت العالي والردح للرجالة والتحريض على خراب البيوت، حاسبينها على القسم الرجالي، فلما تجيلك واحدة مشعوطة معقدة مُحرضة، تجاربها فاشلة، وليكن من جماعة الست تبات بره بيتها من غير إذن جوزها، ومن غير ظابط ولا رابط".
وواصلت قائلة: " الهاجس اللي بيكون في حياة المريض اللي عنده تجربة فاشلة، فعايز يخلي كل الستات فاشلة زيه، فتتشعوط أوي من جملتي إن مفيش كرامة بين الزوجين، ومن كتر الشعوطة تاخد الجملة بتاعتي وتعمل حكايات وروايات ونعمل منها حلقات".
ووجهت السؤال للمذيعة قائلة : "إيه دخلك بالمتجوزين أنا مش عارفة ؟ إيه حشرك بين المتهنيين مش فاهمة ؟ إيه علاقتك بالحنية والبنات المتهنية، المنطقة دي محظورة ماتجيش هنا تاني، المنطقة دي كلها دلع حنية ستات متهنية، لو جيتي هنا تتحرقي يا ماما".
وأردفت ياسمين عز: "إذا أنتي ممغوصة من حالك، وإذا انتي مشعوطة إحنا مالنا، حاشرة نفسك معانا ليه؟ مركزة معانا ليه؟ كرامتنا وإحنا حرين فيها، إجوازنا وإحنا حرين فيهم، انما لو شطبتي أو خلصتي المحتوى دوري تاني، يمكن تلاقي عقدتين تجوزيهم لبعض يخلفوا عقدة صغيرة، تكملي بها المحتوى وتخربي باقي البيوت العمرانة، دي مش مشكلتنا ولا محتوانا".
وحذرت عز المذيعة قائلة: "ولكن لو مالقتيش من عندنا ماتنقشيش، ولو مالقتيش من محتوانا ماتغشيش، وعلى شغل غيرك ماتشتغليش، وعن صوت الجهل وأنتي أهله ماتتكلميش، وفي الدين ماتفتيش وعن رضا الرجال ماتحلميش، وإذا قلتوا عن الرجل لا يجوز، مينفعش نرجع نغازل ونقول يجوز، عموما بشكل عام أي حاجة فيها جوز إطلعي منها".
واختتمت عز هجومها قائلة: "عارفين مرة قلتلكم كده من دق الباب لقى الجواب، وفي قانون بتاع نيوتن زمان كنا بندرسه بتاع الفعل ورد الفعل، بيقول لكل فعل رد فعل معاكس له في الاتجاه، مضاعف له في القوة، محذرا له من الرجعة، وإن عدتم عدنا وإن قلتم قلنا".
وبعد انتشار حديثها على مواقع التواصل الاجتماعي توالت التعليقات المرجحة أنها توجه هجومها للمذيعة رضوى الشربيني والتي اشتهرت بهجومها على الرجال، مطالبة السيدات بالسعي للحصول على حقوقهم دون الرضوخ للزوج.
(اقرأ أيضا) نصيحة ياسمين عز للفتيات.. أنا خايفة أطل لأغطي على الكل