بعد بكائه على الهواء| حلا شيحة تهاجم والدها دفاعا عن زوجها: مصدومة فيك أنا مش مخطوفة ومعز محترم

هاجمت الفنانة حلا شيحة والدها الفنان التشكيلي أحمد شيحة رداً على ما قاله عن زوجها معز مسعود بشأن اختطافه لها، لتدافع عنه برسالة شديدة اللهجة أثارت سخط جمهورها ومتابعيها، وذلك عبر حسابها الشخصي بموقع تبادل الصور والفيديوهات "انستجرام".

 

اقرأ أيضاً..

(فيديو) أول تعليق ناري من تامر حسني على تصريحات حلا شيحة ضده وتبرؤها من أحضانه في فيلم "مش أنا"

 

حلا شيحة تهاجم والدها: جوزي مش بتاع ستات وانت عارف كده كويس

وشاركت "حلا" صورة زوجها معز مسعود وأرفقتها بتعليق جاء فيه: "الحقيقة مصدومة من الكلام اللي والدي قاله عن زوجي اللي اتجوزته بكامل ارادتي و الحمد لله لقيت معاه كل المعاني الجميلة من احترام ورجولة وشهامة نادرة الايام دي، وانا لم يخطفني احد كما قال والدي و الكلام ده لا يصح ابداً".

 

وتابعت: "انا بحب زوجي و سعيدة بحبه ليا و بنحترم بعض و معز بيحترم رايي و بيقدر مشاعري و بالعكس هو دائما بيهدّيني .. وطبعا بيساندني ويشجعني لاني زوجته و حبيبته.. وهو اكبر بكتير من كل الكلام اللي بيتقال عليه و افتراءات مش صحيحة و هو ابعد ما يكون عنها".

 

 

حلا شيحة دفاعا عن زوجها: هو خلاص اي حد يتكلم بلغة الدين لازم يبقي متطرف او اخواني

وأردفت كلامها قائلة: "لن اسمح لاحد الكلام عنه و لن اسمح بأي تصور خاطئ عنه بأي شكل من الاشكال معز طول عمره له رؤيته الواضحة في الدين و حتي في الفن و هو ليس مع اي جماعة او فئة معينة هو يمثل نفسه و له افكاره وارائه العلمية و الدينية المختلفة الجميلة و ليس لاحد ان يصنفه او يضعه في اي قالب فقط لأن هواه لا يوافق ما يمثله معز".

 

واستكملت دفاعها عن زوجها بقولها: "هو في ايه في بلدنا الايام دي بنحارب و نصارع في بعض و عايشين في قصص وهمية من نسج خيالنا عن بعض .. هو خلاص اي حد يتكلم بلغة الدين لازم يبقي متطرف او اخواني هو مبقاش في مسلمين وسطيين طبيعين هو ليه كل انواع الهجوم ده علي اي حد".

 

 

حلا شيحة لوالدها: ميصحش كلامك على معز وانا الحمدلله سعيدة في حياتي معاه

وعن كلام والدها عنها وعن زوجها أضافت قائلة: "انا زعلانة من والدي جداً لانه يعرف معز كويس جدا و قعدوا مع بعض كتير ووالدي يحبه جدا و شاف منه كل خير ومعز زيي اتجوز ١٤ سنة من عمره و كان مستقر في حياته و عنده ثلاث اولاد ربنا يخليهمله جمال ماشاء الله و عمره ما كان بتاع ستات زي ما بيتقال كلام لايليق ابدا و في الاخر زيي لم يكمل جوازه و حدث الطلاق و كلنا معرضين لده طبيعي انه كان بيحاول زي اي راجل محترم انه يلاقي استقرار في حياته في الحلال و متوفقش اكتر من مرة و دي مش حاجة تعيب أي حد".

 

وأضافت: "والحمد لله اتقابلنا و تلاقينا لان ظروفنا قريبة جدا و عندي اولاد مثله و اولادنا شبه بعض الحمد لله و استقرينا احنا الاتنين ليه ده يزعل الناس بدل ما ندعي لبعض بالخير

بقينا نتصيد لبعض ونخوض في اعراض بعض هو حصل في مجتمعنا ده احنا جرالنا ايه".

 

واختتمت "حلا" رسالتها لوالدها قائلة: "في الاخر بوجه كلمة لوالدي الحبيب ان لا يصح ابدا كلامك مع كامل احترامي لك و للجميع .. انا الحمد لله سعيدة في حياتي و مع زوج اتشرف انه زوجي و بعتز بيه و احنا اصدقاء قبل ان نكون أزواج و كل كلمة اكتبها و قلتها نابعة مني و انا متدينة بطبعي زي اي ست مصرية بتحب دينها وده لا يعيبني .. وتديني اللي بدأ من اكتر من ١٥ سنة من المنطقي ان معز مش هو سببه..مش محتاجة حد يخطفني او يكتب عني او يوجهني.. هذا كلام لا يليق .دعوا الخلق للخالق و كل واحد يخليه في حاله .وياريت نسمع من بعض بدل ما نسمع عن بعض .احسنوا الظن".

 

 

والد حلا شيحة يبكي على الهواء: بنتي مخطوفة وأنا بقول الكلام ده على كامل مسؤوليتي كأب

وجاء ذلك بعد ساعات قليلة من مداخلة الفنان التشكيلي أحمد شيحة مع الإعلامي عمرو أديب ببرنامج "الحكاية" المذاع عبر قناة mbc مصر الفضائية، حيث تحدث باكياً بشأن تصريحات ابنته الأخيرة عن مشاهدها بفيلمها الأخير "مش أنا"، لافتاً إلى أنه لديه شكوك بأن زوجها أجبرها على الإدلاء بتلك التصريحات.

 

وعن رأيه في تلك التصريحات قال: "أثناء تصوير الفيلم كانت سعيدة بيه جدا، وكانت بتقول لي هيبقى فيلم هايل وهيحقق نجاح كبير".

 

 

وتابع: "بعد الفترة اللي انقطعت فيها خارج مصر عشان ولادها والمدارس، بدأت يحصل عليها تغييرات أنا بقيت قلقان .. بدأ التصريح ده، وأنا أشك إن حلا كانت الدافع وراءه لسبب بسيط، لأن الفيلم نزل ونجح، ما الجدوى إن أنا أعمل هذا الكلام بشكل مجاني وأحرك الدنيا ضدي."

 

واستكمل حديثه رداً على سؤال الاعلامي محمد الباز قائلاً: "أنا حاسس ان بنتي مخطوفة بالفعل، وأنا حزين جدا لهذا الاختطاف، لأن حلا فنانة حب الفن عندها عميق إلى أبعد الحدود .. بنتي بتكتب الكلام ده تحت تأثير معز مسعود وأنا بقول الكلام ده على كامل مسؤوليتي كأب."