عايز اصيف في مارينا..... مرة من نفسي

مقالات القراء

الخميس, 16 ديسمبر 2010 15:09
Amr Omar

اكيد كل اللى بيرحب بقرار غلق المحلات مبكرا من الناس المرتاحة او اللى مش ناعية هم حاجة ولا عليها لا قروض ولا جمعيات ولا اى حاجة من دى ولا حاسة بحاجة...اى نعم الارزاق بالله بس بدل ما تجروا علشان تحددوا ساعات العمل وتخربوا بيوت الناس الشقيانة اللى وراها هم ما يتلم واللى عليه ايجارات عالية واللى عنده حد عيان واللى

عايز يعمل عمليه واللى واللى؟؟؟؟اعملوا لنا تامين عدل وعالجونا صح واعملوا لنا معاش كويس وامنوا لنا حياتنا وشيلوا الاشغالات والناس المخالفة والمتهربين من الضرايب وخلافه واشغالات الطرق والمرور يتعدل وعاملونا باحترام وبعدين قولوا اوروبا وامريكا....هوا احنا بنفتح ونروح بعد نص الليل طمع فى الفلوس والغنى ما نفس
اغلب التجار او اصحاب المحلات يروحوا ويرتاحوا فى ايام زى ايام البرد دى اللى احنا فيها بس اللى رماك على المر قال اللى امر منه....وليا رجاء بس عند الناس اللى مشجعة الموضوع ده البهوات اللى مش حاسين بحاجة ولا عارفين حاجة عن الشقاء والتعب وظروف المعيشة...وارجوكم سيبونى افتح طول النهار والليل عشان احوش اصلى محتاج اوى اصيف فى مارينا السنة دى او حتى بورتو السخنة وادفع قسط الفيلا بتاعة الرحاب واقلب عربيتى ال127 واخليها 4X4

أهم الاخبار