دعوة لمحافظ كفر الشيخ قرية روينة والثورة
دعوة لمحافظ كفر الشيخ قرية روينة والثورة
عقد مجلس برلمان المصطبة جلسته الأسبوعية في مندرة الفلاح الفصيح بقرية روينة بمحافظة كفر الشيخ وسط الأهل والأحباب بمناسبة شهر رمضان المبارك وعيد الفطر أعاده الله علي الأمة المصرية وهي في أحسن حال بعد أن استردت كرامتها وعزتها.
شيخ المجلس: حضرات الإخوة الأحباب طبعاً مفيش بيت في مصر كلها إلا وبيتابع الأحداث وواضح أن كل الشعب مشترك في الحوار ولنسمع آراءكم.
الفلاح الفصيح: حضرات الأعضاء أنه من دواعي سروري أن أجلس وسطكم وأسمع حكاية ما قمتم به من أجل روينة قريتنا جميعاً اللي أصبحت يضرب بها المثل.
العضو الفلفوس: حضرات الإخوة الضيوف إن قريتنا تبعد عن عاصمة المحافظة تلاتة كيلو مترات وأقصد محافظة كفر الشيخ وكانت قريتنا مثلها مثل كل القري في الجمهورية تملؤها الزبالة اللي أصبحت علامة من علامات مدن الجمهورية كلها ولكن هيأ لشعب مصر بعد أن طفح الكيل وقام بثورته العظيمة واجتمعنا شباب القرية من مهندسين وأطباء وصيادلة وفنيين وقلنا إن الثورة مش في القاهرة، فالثورة في كل مكان في الجمهورية وثورة معناها الرفض لكل شيء وحش يضر بالبلد، وأول حاجة فكرنا فيها هو الزبالة اللي كانت من علامات القطر كله، واجتمعنا إحنا الشعب وكل واحد دفع اللي فيه النصيب واستأجرنا معدات وكانت هبة قوية وأصبحت شوارع قريتنا أنضف من شوارع العاصمة عندكم ولم نكتف بكل ده قمنا كلنا لازم نغير شكل القرية فاشترينا أشجار ظل وزينة وزرعناها في الشوارع واتجهنا لمداخل القرية
العضو النمرود: إحنا كلنا في قارب واحد والثورة ثورتنا إحنا أهل القري والحضر ومفيش حد قبل الثورة كان بيهتم بينا وكل همهم مصالحهم وإحنا بنطالب المحافظة وأقصد المحافظ وأتباعه إنه يعمل لنا زيارة ويكون معاه التليفزيون علشان يصور اللي عملناه علشان غيرنا يعمل زينا وكمان يعطي قرية روينة وسام ويعتبرها القرية النموذجية وياريت كده رئيس الوزراء يشرفنا ويشوف جيل الثورة وطموحاته.
العضو زعيط: يا جماعة أنتم نسيتم حاجة مهمة خالص وهي إن الناس لازم تعرف قرية روينة كانت إيه وأصبحت إيه، فمثلاً أصبح عندنا حوالي تلاتين من حملة الماجستير ومعني كده إن فيه ألوف من الجامعيين والمهم هو أن يعرف الجميع ما هي روينة وقيمة شبابها وأهلها فلابد من زيارة السيد المحافظ ويعمل مؤتمر ويقعد معانا ويكلمنا عن رأيه في بلدنا وأهل بلدنا وتحيا الثورة.
شيخ المجلس: كفاية كده النهاردة والباقي بعد العيد إن شاء الله.
الفلاح الفصيح