رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

«الطرابيلي» كشف المستور

مقالات الرأى

الثلاثاء, 28 أبريل 2015 19:23
بقلم عثمان أبوزيد

 

عقد مجلس برلمان المصطبة جلسته الأسبوعية لمناقشة الكارثة اللي كشفها الصحفي القدير عباس الطرابيلي في جرنان الوفد بمناسبة فسيخ شم النسيم وكشف فيه المستخبي.
الرئيس: طبعا عرفتم إننا عايشين ناكل ونشرب وخلاص لكن بناكل منين مش مهم ولكن الأستاذ الطرابيلي كشف المستور والموضوع مطروح عليكم.

العضو الفلفوس: والله ربنا هيحاسب حكام مصر السابقين لأنهم سابوا البلد تاكل بالاستيراد من الفول لغاية الهدمة اللي بنلبسها ومنهم لله.
العضو زعيط: أنا مش عارف إيه فايدة الكليات الزراعية اللي بيطلع منها ألوف المهندسين ومع كده كل أكلنا مستورد والله

ربنا حينتقم من حكامنا السابقين.
العضو معيط: والله دي كارثة لأن عندنا الأرض والمية ومع ذلك بنستورد أكلنا ولبسنا فلازم ولابد من عمل خطة لوقف المهزلة دي.
العضو النمرود: أنا من رأيي إن الحكومة تفتح باب الهجرة للصحراء الشرقية والغربية علي أساس خمسة فدادين لكل أسرة وتعطيه قرض لعمل البنية التحتية ومهلة خمس سنين للاستصلاح.
العضو نطاط الحيط: أنا من رأيي إن الحكومة تقفل باب الوظايف نهائيا لمدة عشر سنين ماعدا الصحة والخدمات
الضرورية زي الكهربا والمية والباقي اللي عاوز وظيفة يروح الصحرا وياخد قرض علي أن يسدده في عشر سنين علشان يشعر إنه إنسان مرتاح.
العضو بلهول: كلام الأستاذ الطرابيلي يوجع وجه في وقته فلازم ولابد من وقفة صارمة لأن احنا عايشين كل حياتنا علي الاستيراد وناقص نستورد هواء في قزايز علشان نكمل الحلقة أو نستورد بشر عندهم خبرة لتعمير الصحرا وأصبحت بلادهم جنة.
العضو الفلحوص: مين يصدق إن إحنا بنستورد الحاجات اللي بناكلها من بلاد فيها الحر لا يطاق وبلاد فيها بلح في الشتا ومع كده بتنتج كل أكلنا وإحنا شاطرين في القعاد علي القهاوي والنوادي وطق الحنك.
الرئيس: والله ما قاله الاستاذ عباس إلا للتاريخ ويقول اصحا يا نايم.

الفلحا الفصيح
 

ا