الأنبا شنودة حي

عقد مجلس برلمان المصطبة جلسة طارئة لتحية المواطن المصري الصميم البابا شنودة بمناسبة سفره الطويل اللي مش حايرجع منه تاني.

العضو الفلفوس: حضرات الاخوة المصريين مسلمين ونصارى لقد غادر الديار مواطن مصري صميم ابن تراب مصر وقبل سفره ترك لنا تراثاً ومبادئ من يخالفها فهو ليس بمصري فقد كان عموداً من أعمدة الوطنية المصرية اللي حاتفضل على مر السنين والأيام والأجيال من يحيد عنها فهو غير مصري وكان صمام أمان لهذا البلد اللي عاش فيه ووضع حجر الأساس لوحدة أبناء بلده من مسلمين ونصاري فله منا أهل مصر كل تحية ووفاء لمبادئه.
العضو النمرود: أنا عاوز أقول شهادة لوجه الله إن المواطن شنودة كان قائداً ماهراً أدار دفة الوطن الواحد بكل مهارة ووطنية ووضع قواعد، وأسس الوحدة الوطنية وكشف ألاعيب أهل الفتنة الطائفية وأفشل أهل السوء من داخل مصر وخارجها وأثبت للعالم أجمع أن شعب مصر شعب واحد لا يمكن أبداً الوقيعة بين أبنائه وذلك كله بفضل حنكته وذكائه فتحية له حيث يكون ولروحه الطاهرة كل المحبة.
العضو زعيط: أنا عاوز أقول إن شنودة ده كان عنده بعد نظر لأن رسولنا الكريم محمد بن عبدالله صلاة الله عليه قال لعمرو بن العاص ستجد شعباً واحداً في رباط إلى يوم الدين ومما أكد ذلك زواجه من قبطية يعني كده مفيش حاجة اسمها مسلم وقبطي إلا في العبادة وهذا شأن المواطن بين العبد وربه وعلى كل حال خابت أحلام الدساسين والخونة أعداء الوطن في أنهم يفرقوا بيننا بفضل وعي وبصيرة وحنكة الشهيد شنودة رحمة الله عليه وأسكنه فسيح جناته.
العضو معيط: والله يا جماعة الراجل شنودة أدى الأمانة وربنا سخره علشان يحافظ على العيش والملح اللي بين أبناء الوطن الواحد وعمل القواعد اللي مفروض يمشي عليها خلفه اللي بعده وكان لأعداء البلد من الداخل والخارج زي عربية المطافي كل ما يحاولوا يولعوا فيها نار يقوم على طول يطفيها في بدايتها وعلشان كده كلنا من كبير وصغير بيحبه ويحترمه وكله قاعد له في تاريخه الأبيض الناصع.
العضو نطاط الحيط: والله يا جماعة أنا صعبان عليه اللي حايمسك مكانه لأنه الله يرحمه كان عامل حيطة، حيطة صد لكل الفتن والوقيعة بين أبناء الوطن ووضع قواعد لازم نمشي كلنا عليها ونحافظ عليها لأننا أبناء وطن واحد وأرض واحدة وسماء واحدة ونيل واحد وجيران في المعيشة والشغل وحتى الهوا اللي بنشمه واحد وعلى اللي عاوز يعمل فتنة يروح يشوف بلد تانية لأن شنودة حط الأساس والمبنى طلع على وش الأرض فرحمة الله عليه.
شيخ المجلس: إحنا قلنا اللي في قلوبنا ونسأل الله أن يلهم خليفته الصواب والعيش على سكة شنودة.
الفلاح الفصيح
عثمان أبو زيد