رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

على المصطبة

بأى حال عدت يا عيد

مقالات الرأى

السبت, 05 نوفمبر 2011 00:57
بقلم : عثمان أبو زيد

استأنف مجلس برلمان المصطبة جلساته الأسبوعية بعد غياب المجلس الأسبوع اللي فات.
شيخ المجلس: حضرات الإخوة الأعضاء يعتذر الزميل الفلاح الفصيح عن غيابه الجلسة اللي فاتت لأنه كان عضو اللجنة العليا اللي أشرفت علي الانتخابات التاريخية لنقيب وأعضاء مجلس نقابة الصحفيين

واللي تعتبر تاريخية لأنها أول انتخابات في عهد الحرية وانطلاق المهنة من أسر النظم الحاكمة، وبهذه المناسبة لمجلسكم الموقر الشرف العظيم أن يشارك أمين سر المجلس كعضو فاعل في الإشراف علي هذه الانتخابات ضمن عشرين صحفي من شيوخ ووطني المهنة وهو أخوكم الفلاح الفصيح، كما نشكر لأسرة المحافظات بصحيفة الوفد وعلى رأسها الصحفي القدير فتوح عمارة أن أتاح لنا فرصة نشر انطباعنا عن هذه الانتخابات التاريخية ونفتح باب المناقشة.
العضو الفلفوس: حضرات الإخوة أنا والله ومعي ملايين البشر بنستغرب ونتعجب من اللي بيحصل في بلدنا مصر العزيزة ومش لاقي سبب واحد يبرر لي اللي بيحصل والشيء الملفت أن أول عيد يمر علي ثورتنا الغالية ويحصل اللي بنشوفه ونسمعه.
العضو النمرود: أنا عاوز أقول كلمتين لوجه

الله، وهي أن الناس كانت في كبت وقهر وفقر طول السنين اللي فاتت لدرجة أن الناس خلاص جه عليها وقت استسلمت لقدرها وفجأة جرى الدم في عروقهم وعرق النخوة والشهامة والوطنية ظهر وخرج الناس من غير تدبير غير أنها مستعدة للموت من أجل إسقاط النظام بكامله ولم تستسلم وأصرت علي موقفها حتي الموت وفعلاً تحقق لها الحلم ومن غير تنظيم تحركت كل طائفة لتطالب بحقها في حياة دون وعي أو تفكير أو تنظيم وده مربط الفرس.
العضو زعيط: أنا عاوز أقول العيد علي الأبواب وده أول عيد نفرح فيه بحريتنا وكرامتنا، ومش عارف ليه أهلنا بيعملوا مظاهرات غير منظمة وفيها همجية وساعات ضرب وخبط وتهديد ووعيد وأنا خايف من المندسين وسطهم اللي ضاعت مكاسبهم ونفوذهم وأقول لهم اتقوا الله في وطنكم.
العضو معيط: يا جماعة عاوزين نفرح بأول عيد يمر علي
ثورتنا الحبيبة وكفاية كده وانتظروا لغاية ما تتضح الأمور والحمد لله إحنا أهل المصطبة متماسكين ومترابطين ومؤجلين طلباتنا لغاية الأمور ما تستقر في الدولة ونرجوكم يا أهل الحضر توقفوا الهيجان بتاعكم ومطالبكم لغاية البلد ما تترتب فيها الأمور وبعدين كل وحد يطالب بحقه.
العضو نطاط الحيط: يا جماعة لا تخافوا من اللي بيحصل ده لأنه في النهاية حاينتهي علي خير لأن مفيش ولا واحد عاوز يخرب ويدمر البلد واللي بيحصل ده نهايته معروفة ودول شوية ناس ضاعت مصالحهم بيستغلوا عواطف الشعب النقية، وفي النهاية نقبهم علي شونة لأن مصر خلاص مش حاترجع للورا أبداً طالما فيها ناس أحرار زيكم وأنتم الأغلبية اللي بيقولوا عليها أغلبية صامتة لكن عند النزال تظهر معادن الرجال.
العضو بهلول: عاوز أقول يا أهل مصر: اتقوا الله في بلدكم وحافظوا عليها من الفتن ما ظهر منها وما بطن لأن في النهاية حايقع عليكم إما النجاح وإما الرخاء وإما الفشل والضياع وبما أنكم أهل أرض الأنبياء فلن يخذلكم الله أبداً ويأتي العيد وقد هدأت النفوس.
شيخ المجلس: حقاً إخواني أنه أول عيد علي ثورتنا العظيمة فليمد كل منا يده لأخيه ويسلم عليه ويهنئه بالعيد وحفظ الله مصر مسلميها وأقباطها من الفتن ما ظهر منها وما بطن وكل عيد وثورتنا بخير.

------
الفلاح الفصيح
عثمان أبو زيد