شواكيش

زمن الشـيكولاتة!!

محمد زكي

الأحد, 22 مارس 2015 22:49
محمـد زكى


 

< بعد موافقة مجلس الوزراء على عودة الدورى بدون جمهور .. قاعدين ليه ما تقوموا تشجعوا؟!

< وزير الضلمة واللمبة السهارى محمد شاكر فلت من مقصلة التعديل الوزاري الأخير ونغنيله: «النور النور معلوم يا للى عليك الدور»!!
< وزير التربية والكشكول محب الرافعى لا يحتــــاج فى الوقت الحالي إلى «دروس خصوصية» ولكنه يحتاج الى «مجموعات تقوية»!!
< بعد موجة العنف فى المدارس.. التلامذة رفعوا تهديد: «مطوتك فى جيبك وشفرتك تحت لسانك.. والآي باد فاتح على فيلم وش إجرام»!!
< الوزير محمد يوسف داخل ورش التعليم الفنى «كومندا وشـــايل شواكيشه»!!
< مبروووك براءة وزير الداخــلية الأســــبق حبيب العــادلى فى قضــــية «الكِذب غير المشروع».. عقبال مهرجان «البرتعة للجميع»!!
< وزير الداخلية مجدى عبد الغفار رفع شعار «الإرهاب ع الحصار ومفيش فى الأمن هزار» واللى عايز يجرب.بييجى بجد!!
< قاتل الناشطة «شيماء الصباغ» طلع ضابط شرطة.. نبوس إيدنا «وش وضهر» اللى مطلعش «ضابط

كومبارس»!!
< بمناسبة اليوم العالمى للسعادة.. اضحك علشان صورة «السيلفى» تطلع حلوووووة!!
< 200 ألف جنيه خسائر إلغاء حفل الراقصة «صافيناز» بالغربية.. وده غير «النقوط» ورقصنى يااااا
< احتفلنا بعيد الأم على أغنية «ست الحبايب يا حبيبة».. وهنحتفل بعيد الربيع اللى جاى على أغنية «الدنيا ربيع.. والإعدام لبديع.. وقفلى على كل المواضيع»!!
< فى إندونيسيا اشترى منزل واحصل على الزوجة مجاناً.. وفى مصر اتجوز بفلوسك واتنيل بنيلة!!
< الفنان محمد صبحى اقترح تعبين «السبكى» وزيراً للثقافة على طريقة «اللحمة يا معلم»!!
< «مرسى» فى سجن برج العرب يعشق أكل البط بالفريك.. علشان كده كورال الإخوان المفاجيع بيغنلوه: «أكلك منين يا بطة أكلك منين»!
< الإعلامية رانيا بدوى قالت ع الهوا : «عمّار يا مشمش» وبعد الهوا المشاهدين بيقولها: «باااى باااى يا
مشمش»!!
< بمناسبة مهرجان «حاوى» الدولى بالإسكندرية.. قرب قرب وشوف المحافظ «الأمريكانى» ع المكشوف!!
< الفنانة هالة فاخر فى برنامجها «هات من الآخر» تغزلت فى محافظ الأسكندرية «التاتو» على طريقة «يا واد يا حِليوة يا بو بدلة كِريمة»!!
< على فكرة زوجة المحافظ إياه تحدت الجميع بزيارة مكتبة الأسكندرية على طريقة «اللى مش عاجبه زياراتى.. يمسح البلاطى»!!
< بمناسبة دعوة الإعلامي تامر أمين للمصريين بالاستحمام كل يوم.. نُهدى أغنية: «يا خارج من باب الحمام وكل خد عليه بوسة»!!
< عمرو موسى رئيس لجنة الخمسين وصف المشهد الحالى بـ «العك السياسى».. ولا نجيب المضابط تنقرى!!
< العملية الانتخابية عادت بنا الى «المربع صفر» بينما رجع مرشحو البرلمان إلى «الطريق الصحراوي»!!
< الإعلامى الحنجورى جابر بن القرموطى بخّر مصر من «إخوان الشياطين» رافعاً مبخرة «يا إخوان العاجل.. كفاية مولوتوف وقنابل»!!
< فى السيرك السياسى.. بنتفرج على القرداتى.. وبنضحك على الأراجور.. وبنرقص تانجو مع البلياتشو.. وكله يدلع نفسه!!
< نحن نعيش فى زمن الشيكولاتة.. وعلى رأى أغنية السندريلا سعاد حسنى: «الشيكولاتة ساحت راحت مطرح ما راحت»!!
آخر شـوكشة
< طريق الاقتراب من أصحاب السُلطة.. تنافق.. تتوغل.. تنتشر.. لدرجة أن تحتقر نفسك.. وتخسر احترام الآخرين!!

[email protected]

ا