سن إبرة

محمد الشربيني

الأربعاء, 13 أبريل 2011 11:58
بقلم :محمد الشربينى

 

صاحبى الذى أثق فيه ثقة المصريين فى الرئيس مبارك الآن .. قال لى  إن دول أمريكا وبريطانيا وروسيا اخترعت  3 برامج كمبيوتر تستخدمها أجهزة مخابراتها لتحليل الرسائل الصوتية. البرنامج الأمريكى يقدم صورة فيديو لحال المتحدث وقت التسجيل ، وتحليل لمدى صدق ما ورد على لسانه . والبرنامج البريطانى شبيه بالأمريكى لكنه أقل منه كفاءة . أما البرنامج الروسى فهو بلا أى صور ولكن يقدم نسخة طبق الأصل مما كان المتحدث يريد أن يقوله ويمكن فهمه من بين السطور . وزعم صاحبى اللدود أنه يمتلك نسخة من البرامج الثلاثة وأنه عرض عليها الرسالة الصوتية التى بثتها قناة العربية للمدعوق حسنى مبارك فكانت النتيجة مذهلة ..!

البرنامج الأمريكى قدم صورة فيديو للرئيس المخلوع وهو يرقص أثناء تسجيل الكلمة ،

ويضحك بشكل هيستيرى على كل واحد أهبل ح يصدق تخاريف اللص العجوز . وفى تقرير مصاحب للفيديو أكد البرنامج أن ما قاله فى الرسالة لا يختلف عما تقوله زكية الشغالة عندما تضبطها تسرق خزين المطبخ وتحلفلك بالله أنها كانت ح تشيلهولك أمانة فى ثلاجتها !!

البرنامج البريطانى قدم فيديو مخالفا تماما .. ظهر فيه مبارك بدون أسنان ، وشعره أبيض غير ناصع لون قطن التنجيد الردئ أخر درجة ، وبوذه شبرين قدام . لكنه تميز عن البرنامج الأمريكى فى أنه أظهر صورة لشخص أخر فى التسجيل ، لم يستطع صديقى التحقق من ملامحه بسبب رداءة الصورة ، لكنه استخدم خاصية فى البرنامج

تسمح بالسؤال عن الاحتمالات الخاصة بالأشخاص الموجودين فى الفيديو ، فجاءت الإجابة : " ده الحمار اللى كتب له الكلمتين البايخين اللى طرشهم فى التسجيل " !!

جاء البرنامج الروسى بدون صور طبعا ، وقدم نسخة بديلة لما كان يريد أن يقوله المخلوع وجاء نصه كالتالى : ( ياشعب مصر .. أنا راجل شريف .. صحيح سهلت لكل اللى حواليا سرقة البلد بحالها ومالها وبهدلت كل أحوالها .. لكن والله ده ما كان عشان أغتنى أنا والعيال وأمهم .. ده كان لوجه الشيطان وأعوانه .. لكن الملعون إبليس ضحك عليا وحط الفلوس بإسمى واسم العائلة فى البنوك ، و اضطريت أستخدم "صبى صلاح نصر" و "رئيس وزراء البنبونى"  طوال الشهرين اللى فاتوا فى إصلاح خطأ إبليس ، وفعلا نجحوا يمسحوا أى أثر لتتبع الثروة ، وهى موجودة فى الحفظ والصون ، أمانة لكم عندى ، بشرط ترجعوا زى ما كنتم قبل 25 يناير !! وإلا ح أخليهالكم .. خراب يادنيا خراب ) !!