(الرئيس التوافقى)..؟!

كله ح يلبس الطرطور.. ما تستعجلوش وما تتزاحموش.. الطراطير ح تبقى بالهبل.. من غير طابور ومجانًا.. واحتمال تبقى بسعر رمزى.. يعنى حاجة ببلاش كدة زى حبوب منع الحمل.. دة حتى حبوب منع الحمل مش ح يبقى لها لزوم.. ما الطراطير اللى ح يوزعوها علينا ح تمنع المروءة والشهامة والرجولة من أصله.. وبكدة ح نحل مشكلتين بطرطور واحد.. كرسى الرئاسة وزيادة السكان..!!

أيوة يا سيدى.. انت ما سمعتش عن المحاولات الحثيثة (الحثيثة فى البسيسة) التى تبذل حاليًا للبحث عن طرطور كبير يتم الاتفاق عليه لكى يرشحه عصبة من الأشرار رئيسًا للبلاد تحت اسم (الرئيس التوافقى)..؟! أكيد سمعت واحتمال تكون من الناس الطيبين (مشيها الطيبين) اللى صدقوا حكاية توافقى دى.. أو من الناس المصحصحين نص نص وسموه (الرئيس التواطئى).. لكنى أتمنى أن نسمى الأسماء بمسمياتها ونقول الحقيقة: إن هناك عصابة من الأشرار تريد أن تحكم هذا البلد من خلف الستار وهداها تفكيرها الشيطانى لاختيار طرطور تجتمع عليه الفئة الباغية وتسوقه لدى الشعب باعتباره شجيع السيما الذى سيخلص مصر من أزمتها ليكون الرئيس القادم..

وطبعا عندهم أمل الناس تشرب المقلب وتلبس الطرطور القادم إليها تحت شعار: (الطرطور هو الحل)..!!
أبسطهالك.. فاكر محجوب عبدالدايم فى (القاهرة 30) اللى جوزوه البنت الحلوة الغلبانة على الورق عشان يكون غطاء لعلاقتها الأثمة مع دولة رئيس الوزراء.. أهو الرئيس التوافقى أو التواطئى ح يبقى محجوب عبد الدايم بس فى (القاهرة 2012).. عشان يغتصبوا همة البلد وسيادته يبقى الرئيس اسما!!
عمومًا دعنا ننتظر ونرى من هو مرشح الرئاسة الذى سيرضى أن يلعب دور محجوب عبد الدايم الجديد.. أو يقبل أن يكون الرئيس الطرطور!!

طرف الخيط:
صدق أو لا تصدق: الدكتور عمرو عبد السميع وأحمد موسى يتصدران اليوم صفوف الثوار فى مؤسسة الأهرام!... مش بعيد يطلع حبيب العادلى هو القائد الحقيقى للثورة!!