رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

اســمــــحــوا لــــى

أسئلة حائرة ومشروعة

فاطمة المعدول

الأربعاء, 31 يوليو 2013 01:15
بقلم : فاطمة المعدول

أسئلة كثيرة تدور فى مصر والإعلام والعالم الغربى والعربى..  نعرض  بعضا منها مثل..
<< مين اللى ثورة بجد 25 يناير والا30 يونية؟  ولا هما انقلاب؟
وهل هذا مهم؟.. واحنا  كنا اتفقنا بعد أكثر من (60 سنة) على ماحدث (23 يوليو) كان انقلابا وإلا ثورة؟
<< الاندفاع والحب الشديد للفريق السيسي

هل هو البحث عن مخلص؟
هل هو الرعب من الإخوان؟
والا الحب من أول نظرة بينه وبين الشعب
طبعا كلهم
<< هل الشعب المصري  يعشق الحكم العسكري أو البيادة؟
وانتوا مالكو؟
ونسيتوا إن سعد زغلول كان زعيما ولم يكن عسكريا وكذلك مصطفى النحاس
<< هل ماحدث عودة إلى (عام54) أي  حكم الفرد
ياريت  مش ارحم من حكم الجماعة .
<< هوه فيه علاقة بين رطانة المثقفين ومسك العصاية من المنتصف وبين..المعونات الأجنبية؟ العيش خارج مصر؟ أو القلب الرهيف الخفيف؟
متهيأ لى كلهم على بعض!!
<< هو ليه الاخوان بالرغم من تخلفهم الشديد فى كل شئ استطاعوا أن يسيطروا على الإعلام الخارجى...وينشروا أكاذيبهم..
هل  لأن الحداد وولده بيتكلموا انجليزي لبلب؟
والا دافعين فلوس كتيرة لشركات علاقات عامة وإعلام؟
والا الإعلام الحكومى المترهل وأصبح ديناصور مريضا فى طريقه للانقراض..واحنا مش واخدين بالنا؟
والا الإعلام الغربى مضلل وفاسد وزعلان على أوباما  يا

ولداه؟
<<  ليه يا تري ابراهيم عيسي  بيستضيف عسيلى كل أسبوع؟
هل لأن أفكارعسيلى  نيره ! وجديدة جدا ! وماحدش يعرفها غيره؟
أو لأنه لتيف ؟
والاحب يغيظ بيه الإخوان؟
طب واحنا ذنبنا إيه؟
<< هوه ليه الأستاذ عبد الرحيم بيهاجم البرادعى؟
يا تري لحساب شفيق؟ والا هى هواية يمارسها فى أوقات فراغه؟
انا شخصيا محتارة!!
<< هوه رابعة مسجد والا اعتصام والا  موقع عسكري؟
  طبعا موقع عسكري لجند الله جيش الجماعة المختارة
ما هى مواقع الجيش المصري فى مصر الجديدة ومدينة نصر ..اشمعنى الجماعة.
وإذا كان الجيش المصري عنده السيسى..
جيش الجماعة لديه قيادات عسكرية فذة مثل  (الفيلد مارشال محمد عبد المقصود) (والمشير البلتاجى) وقائد الإشارة (عصام العريان) وغيرهم..؟
<< الإخوان تنظيم يقوده مين بالظبط ..
حسن البنا؟ والا سيد قطب ؟ والا الأمريكان؟ والا أردوجان؟؟
الله أعلم.