رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

رئيس رايح جاي.... زجل سياسي

عمرو عماد

الاثنين, 09 أبريل 2012 12:13
بقلم عمرو عماد

<< أنا هترشح... لأ مش هترشح ...  و النهاردة بكلمة وبكرة بكلمة  وكأنه  بيتمرجح  يا عالم أنا بعلن انسحابي  سامحوني أنا هرجع في كلامي أنا سلفي وأنا أخواني وأنا جاي أتصور وراجع لمكاني وأنا  مش فلة يا فندم  أنا واحد تاني

<<<   ألعب ولف ودور وخرب  في الدستور  وأكسر ألف سور مسكت كل شيء  وفشلت في كل شيء  وبكرة الأيام هتفضح المستور  ولآخر مرة  يا عالم  أنا المصري مش طرطور ولو انكسرت   النهاردة  بكرة  بإذن الله 

منصور

<< ودوري الرئاسة بدأ والكل نزل الملعب ومبارك قاعد فرحان  الخطة  أترسمت   والكل بيسخن والبدلاء كمان  وناس بتنادي  وسع  وسع لسليمان... ايه اللي جيبك  أنت كمان  أنا جاي  على رغبة  جمهوري اللي فيا عشمان  جمهورك ولا محاسيبك  ولا  فكر  المدرب عسكران  وهو كله في مصلحة الأمريكان ...  بقى بعد الجدعان  ما ماتت في الميدان  جايين تقولوا عايزين كمان
فعلاً اللي أختشوا ماتوا من زمان
<<  شالوا  الشاطر جابوا مرسي المرشد قال  مش هنسيب الكرسي  والكل يتصارع على السلطة وحق الشهيد  دايما منسي  ولا حد يعرف يا مصر فين  راح ترسى

<<  طبقاً للخطة الموضوعة  بمساعدة العملاء  المزروعة  يفتتوا أصوات  المجموعة  اللي كلمتها مسموعة   وترسى عليهم الحكاية  بحجة تزويرهم أن  الباقي  خبرتهم محدودة و سمعتهم ملسوعة  ولا حد بيراعي قلوب الناس الموجوعة  اللي  أنكوت قلوبها  بالدمع و بالآهات المسموعة
 
<<  غير لونك وألبس ألف وش  الطبع هو الطبع والغش هو الغش  أقتل زور وقول معلش  يا اللي  تظن أن إرادتي  اندفنت  جوه حزني  دي الثورة لسه في قلبي ما اتقتلتش   والحرية لسه في وطني
ما تولدتش