مولد وصاحبه هايف

د.وفيق الغيطانى

الخميس, 17 أبريل 2014 23:12
بقلم - دكتور: وفيق الغيطاني

< عدي النهار.. والليل وراه.. وخلصت أغاني المولد.. وانطفت الشموع والفتة وهبر اللحمة اتخطفت.
< بياعين كل حاجة قفلوا وروحوا.. وبتوع الورد والفل رشوا الميه وطفوا النور .. والشارع بقي كحل.. بقالهم أسبوع وليلتين ناصبين المولد عمال علي بطال من غير نوم.
< خلاص.. خلاويص.. المولد خلص يا بلبل.. اتلمت الزينات.. وقبض الساحر.. ونام الأراجوز.. وشالوا صندوق الدنيا.. الكل روَّح.. وبتاع التاتوُّ ضحك ع العيال.. وصوت مكنة النور اختفت .. وقفلوا الديجيهات وخلصوا الرقص والفوريهات.

< وزعوا كل الورد.. وشربوا كل الكانز.. وكلوا كل الجاتوهات.. واتخطفت التورتات.. وقبضت العمال وجرشت العربيات وكل الموتوسيكلات.
< عين أمه شالته وحوطت عليه.. ما هو بيصرخ!!.. لسه جرحه جديد.. عم جمعة الحلاق هوه اللي عملها وحتة الجلدة هو اللي شالها.
< هس.. سدسد.. خلاص أنت بقيت راجل بجد وحسميك الريس بليه أصل أنا مشتاق أشوف ابني شايل عجلة ومفتاح.
< آه تروح المدرسة.. وماله.. ولكن ترجع بعدما تلعب مع العيال في الحوش وبرده تاخدلك كلمتين يقروك الجرنال لأبوك بدل الواد عبدالعال.. اللي عمال يتهته عمال علي بطال.
< يا حبيبي خلاص مش حقولك يا بلبل.. أنت الريس بليه.. ده ختم الميري اللي عندي في الورشة الاسم والعفريتة الزرقا اللي مقاسك وحفصلها لك برده روشه.
< هو أنا مصدق ابني عنده 6 سنين وطاهرته وعينته بليه قد الدنيا.
< الراجل الهايف لسه عايش في زمانه وفرحان ان ربنا عطاله ولد فوق الخمس بنات عشان يبقاله بليه في ورشته.
< حد بيفكر الوقت كده يا أبونبيل.. مراته صرخت في وشه.. حرام عليك بدل ما يبقي ضابط وإلا دكتور ع الخمس بنات يهز الحارة وتجري وراه كل الحلوين وزينة البنات.
< اسمعي يا وليه أنا راجل كبرت.. وما صدقت ان ربنا إداني الولد.. تقولي ضابط تقولي دكتور ما يلزمنيش.. ما هم ملقحين مفلسين.. أقل صبي عندي في الورشة بياخد ماهية قد الواحد منهم

عشر مرات.. اتنيلي وحطي لسانك جوه بقك لخلص عليكي وما يطلع عليكي نهار.
< يوه.. دنا خايفة علي ابنك من غدر الزمان.. لازم يتعلم ويتعلم كمان وكمان، وبعدما يتعلم قعده في ورشتك.. ده زمن غير زمنك كمان.
< هو أنا قلت مش حيتعلم.. حيروح السنة دي المدرسة وبعد الظهر يتعلم الصنعة كمان ده بلية حبيبي ونور عيني ودراعي اليمين كمان.
< الراجل طبطب عليها وقالها نامي يا أم البنات.. لأ خلاص ده كان زمان من النهاردة أنت أم نبيل والريس بليه كمان.
< يخليك يا خويا.. وغطوا دماغهم بعد ما كشفوا المستور وقالت له يا أبونبيل طول عمرك حمقي ومستعجل.. يخليك ليه يا خويا.. ما تطفي النور.. الفجر قرب يطلع وينكشف المستور.. طفي النور وهو بيضحك عشان خدها علي قد عقلها وقالها تصبحي علي خير يا أم بدور.
< عمر مصر ما حتتقدم.. طول ما فيها ناس بتفكر بالشكل ده.. صحيح هو محتاج امتدادا لعمله لكن لابد من تعليم الأطفال.. كفانا أطفال شوارع وسببه التسرب من التعليم في الأسر الفقيرة وما أكثرها في مصر.
< دور الدولة.. إن كان هناك دولة.. الاهتمام بالتعليم الإلزامي حتي انتهاء المرحلة الثانوية يتعلم فيها التلميذ العلوم مع الصناعة يخرج شاباً متعلماً ومؤهلاً ويختار طريقه والمجتمع في أمان من أطفال الشوارع وزيادة المجرمين والعاطلين.
< نبدأ بالقري والعشوائيات الأكثر فقرا نوفر لهم اللوازم الدراسية والغذاء غذاء صحي .. مش فطيرة مسممة.. كان أيامنا يقدم لنا وجبة ساخنة من خضار ورز ولحوم يوميا، أيام ما كان اسمها وزارة التربية والتعليم الله يرحمك يا وزير الوفد العظيم طه حسين مش وزارة التزويغ والدروس الخصوصية.
< الراجل الهايف أبوالريس بليه حيختفي من المجتمع لو بدأ السيسي صح بتوفير الأمن والقضاء علي الفساد وتحقيق العدالة الاجتماعية ونحن نرقب وننتظر لأن الشعوب لن ولم تتقدم إلا بإصلاح منظومة التعليم.

المنسق العام لحزب الوفد