فيها حاجه مش حلوه
• طبعاً في يوم من الأيام كنت طفل صغير .. وكانت الدنيا جميله والناس بتحب بعضها لأن مصر كانت حلوه فعلا... وكلمة حلوه أنا مصر عليها لأنها تحمل كل المعاني الجميلة .
• مصر أرض الخير.. كانت الشمس طول العام والنيل ببجري يغمر الغيطان فى كل مكان اللي دمرها العسكر وبنوا عليها العمارات والعشوائيات .
• مصر الزراعة.. كانت الشادوف الساقية والنورج والفأس وزهور القطن وعود القصب وسنبلة القمح وشجرة البرتقال وغيط الذرة وحبة الطماطم .
• مصر النيل.. كانت نهر النيل والمركب الشراعي وصندل البضاعة وبلاص العسل وفسحة الكورنيش وفلوكة عم صابر الصياد وجزيرة الدهب والمنيب والمنيل وكوبري قصر النيل ومعدية الباجور .
• مصر السياحة.. شط إسكندرية وقناة السويس وتمثال ديليسبس والترعة الحلوة وكوبري جميل وشاطئ بورسعيد وخير بحيرة المنزلة ومراسى البرلس .
• مصر الجمال.. أم وشوش مبتسمة وعيون كحيله ومشية الغزال ونخلة البلح وعمود السواري وقلعة إبراهيم وميدان المنشية والقله الساقعة على سور التراسينه .
• مصر الحضارة.. الهرم وأبوالهول ومومياء رمسيس وقناع نفرتيتي والبر الغربي وجزيرة النباتات وبحر أسوان .
• مصر عبق التاريخ.. الحلوه بشوارعها وحواريها وخان الخليلي وقهوة الفيشاوي وتحت الربع والفحامين والنحاسين والسبحة والشيشة وجامع الحسين والسيدة زينب وحلوة السيدة نفيسة ياعيني على شموخ الأزهر ودار الكتب والمتحف المصري والمجمع اللغوي والمرحوم المجمع العلمي .
• مصر العلم.. المدرسة والحوش وحصة الموسيقى وجماعة التمثيل والقسم المخصوص وملعب كرة السلة وترابيزة البينج بونج وجماعة الكشافة وساعة الفسحة ولما يضرب الجرس نقف طابور ونرفع العلم ونقول تحيا مصر .
• مصر الكفاح.. شباب معركة الإسماعيلية وفدائيين القنال وأبطال معركة بورسعيد 56 وهزيمة العسكر وكسر نفس المصريين فى 67 وعبور 73 وثورة 25 يناير 2011 .
• مصر الأمن.. كانت عسكري الدوريه أبو صفاره المحترم ، وكناس البلديه أبو عجله ومقشه وزمبيل ، وشيخ الحاره وحاوي القرية وصندوق الدنيا ودكان عم حسن بتاع العسليه ، وزريبة أبوجبل ، وحوش عيسى واللمبة الجاز وابور الجاز بريموس .
• مصر القرية.. كانت بلاص العسل وبنات القرية وهما حول حنفية الميه والساقية وناي الغلابة وزقزقة أبو فصاده وعصفور الجنة وريحة الفل والياسمين والتمرحنه والفراخ الفيومي البلدي أم دقه ودكر البط أبوعرف أحمر وفطير خالتي زنوبه وفتة كوارع أبوحسين .
• مصر الفن.. أم كلثوم والأطلال وجندول عبدالوهاب وسيد درويش والعشرة الطيبة.
• مصر المسرح.. يوسف وهبي وعطيل، أمينه رزق وعبدالمنعم إبراهيم وإسماعيل ياسين ومدبولي والمهندس وذكي طليمات .
• مصر الأدب.. نجيب محفوظ والحكيم والشرقاوي وجائزة نوبل وأولاد حارتنا وسي السيد وزقاق المدق بين القصرين وقصر الشوق والسكرية ، نعمان عاشور والناس اللي تحت .
• مصر الفكاهة.. الريحاني كشكش بك وأبو حلموس وماري منيب وعدلي كاسب وشرفنطح والقصري والقصبجي وفاطمة رشدي وكازينو بديعة .
• مصر ذكي رستم وحسين رياض وحليم وشاديه وطلب والأطرش وكمان شفيق جلال .
• مصر الرياضة.. الوحش وصقر والضظوي ومختار التنش
• مصر كانت أم الدنيا.. أم حسين وبهانه وعبدالموجود وإسماعيل بن ستوته ومرقص وبشاى وميخائيل والقمص بطرس مصر كانت كل الحب كل الفن كل الجمال كل الهنا .
• مصر الأمان.. كانت الحصن والملاذ والكلمة الحلوة وإبن البلد اللى خلف ولد وطار فى الهوى شاشى يا جدع من روح سيد مكاوي وصلاح جاهين والليلة الكبيرة .
• كل اللى فات راح وإنقضى من خلال ممارسات العسكر لمدة ستون سنة ، ضاعت الأرض وإختفى الزرع وإتسرطن الأكل وخربت المدارس وضاعت التلامذة وتاه المواطن بين المستشفيات بلا فاعلية وغرقت الطرقات بالمجارى وفقدت الأخلاق وزادت البلطجيه .
• إنكسرت عجلة كناس البلدية وغرقت فلوكة عم صابر وتلوثت البحار والأنهار وسرقت الآثار وكثرت العشوائيات وجاعت الغلابة ونهبت الميزانيات وكثرت العمولات وإغتنت الحرامية وإغتنى لصوص أموال الشعب المصرى الطيب .
• بكت التماثيل في المتاحف والميادين على حال مصر.. وكان الشعب المصرى يئن صامتا تحت وطأة الأمن المركزي وظلم وأمن الدولة وجبروت وعملاء النظام فكان يهرب إلى الجامع والزاوية ليدعوا الله أن يرحمه من ظلم البشر .
• فجأة مصر الثورة.. قالت كلمتها فى 25 يناير وطردت الطاغية والطغاة وفرحت وفرحنا معاها ولكن للأسف أجهضت الثورة وضاعت وتاهت الثوار وصال وجال الحرامية والبلطجية وزبانية الكله والبنزين وزاد الخراب بفعل اللهو الخفي .
• مصر تبات وتصحى على إجتماعات وقرارات ولجان ووزرات وطوب وزجاجات مولوتوف وقنابل ورصاص.. وبعد كده تلاقى تصريحات ومشاورات فشنك .
• مصر تبات وتصحى على آهات وكلام الطاغية المخلوع..!!.. يدور في دماغها عندما قال يا أنا يالفوضى .
• ياخوفى عليكى يا مصر... ياحته من عقلى وقلبى.. يا طفولتى وشيخوختى.. ياعينى عليكى يابنتى!!.. عايشة فى سواد ودخان وآلام وعدم أمان.. كان نفسي تعيش طفولة وشبابي أيام مصر الحلوة .
• خايف أموت قبل مصر ما ترجع حلوه من تانى... ويغور في ستين داهية حكم العسكر واللهو الخفى .
-----------
المنسق العام لحزب الوفد