سلام رئيسا لاتحاد الكرة بمساعدة وديع وتهامي !
جلس تهامي باشا أبو غيده على مكتبه، وهو في حالة عصبية شديدة جدا ، وأخذ يفكر جديا في مستقبله بعدما تلقى خبرا كالصدمه باستبعاده من انتخابات اتحاد الكرة في بلاده.
قرر تهامي باشا جمع جميع أعضاء قائمته ومؤيديه لأخذ أفكارهم في كيفية حل هذا المأزق والسيطرة على اتحاد الكرة من جديد ، خاصة وأنه كله مميزات من برستيج إلى نفوذ ، إلى سبوبه أيضا
أخذ تهامي باشا يفكر قائلا: "الأمور كلها كانت في ايدينا ، وكنا مسيطرين على أعضاء الجمعيه العموميه كلهم من خلال علاقاتنا ، وضامنين النجاح باكتساح في الانتخابات"
وأضاف تهامي وهو يتنفس رائحة دخان سيجاره الفخم "منها لله لجنة الطعون ، قولولي نعمل ايه دلوقتي"
قال الحاج عبود النامي وهو يضع يده على شعر ذقنه "احنا نرفع قضية في القضاء الاداري ، ونقول ان أسباب استبعادك مش صحيحه ، وناخد حكم محكمه برجوعك للانتخابات ، والحكم واجب النفاذ"
فرد خبير اللوائح محمد ماجد "ماينفعش ، لأن الفيفا بيمنع اللجوء للمحاكم وهيرفض الخطوه دي ، ومش هيقبل بتدخل المحكمة في القرار"
يتدخل ضيف سامر أصغر الأعضاء سنا ونجل شقيق أمير سامر رئيس اتحاد الكرة الأسبق قائلا "يبقى خلاص نتصل بالاندية نخليها تبعت جوابات تطلب عقد اجتماع جمعية عمومية عاجلة ، وفي الاجتماع ده يطلبوا عودة أبو غيده ، ويقولوا انهم مش موافقين على استبعاده ، ويرجعوه تاني، وأنا ممكن من خلال برنامجي (التلاعب اليوم) أدعو أعضاء الجمعية العمومية انهم يبعتوا الجوابات دي"
فيرد المخضرم حسين حميد رئيس نادي الفكسانه وهو يضع يده على رأسه "الوقت ضيق جدا قبل الانتخابات ، ومش هنلحق نعمل جمعيه عموميه ، الوقت هيسرقنا"
تدخلت سمر الكواري في الحوار وقالت "طيب ما تكلم انت بتوع الفيفا يا تهامي باشا وكلهم حبايبك هناك ، وانا هخلي اخويا حاتم يكلمهم برضه ، وتقولولهم يبعتوا جواب رسمي يقولوا انك لازم تدخل الانتخابات والا هيوقفوا نشاط الكره هنا ، وطبعا الناس كلها هتخاف"
يقوم هرم شردي بتعديل نظارته ويقول "الموضوع صعب جدا ، حتى لو الفيفا عمل كده ماتنسوش ان الالتراس رافضين تماما وجود أبو ريده في الانتخابات وهيقلبوا الدنيا"
يضيف الحكم الدولي حسام عبد الفتاح "والمشكله ان الحكومه كمان مش عايزين أبو غيده يكسب ، وخصوصا الوزير السامري فاروق"
بدأ تهامي باشا أبو ريده يزداد عصبية ونظر إلى الجميع بصوت عالي قائلا "حرام عليكوا هتضيعونا ، شوفوا لي حل بسرعه ، اتحاد الكرة هيطير مننا"
أثناء الاجتماع سمع الحاضرين صوت طرقات على الباب ليدخل الاعلامي الشهير وديع شوفير المرشح على منصب نائب الرئيس ومعه شخص غريب أسمر البشره لم يعرفه الحاضرون ، وقال شوفير "صباح الفل يا تهامي باشا".
تهامي "فيه إيه يا شوفير .. اخلص ، ومين الراجل ده كمان اللي انت جايبه معاك ده؟"
فيرد شوفير قائلا "ده رئيس اتحاد الكره القادم يا تهامي باشا"
يرد تهامي بعصبية "نعم يا أخويا ، رئيس مين
يبتسم شوفير ابتسامه صفراء ويقول "اصبر بس يا باشا واسمعني ، أنا هفهمك القصه كلها ، دلوقتي مش معقول هنسمح للمهندس مُهاب فالح انه يبقى رئيس اتحاد الكره ، ولا طبعا الكابتن حمامه جميل لأنهم لو مسكوا هيسيطروا على كل حاجه"
تزداد عصبية تهامي قائلا "مممممممم ، وبعدين ، خلص يا وديع"
يرد شوفير "الراجل الطيب اللي معايا ده بقى اسمه جلال سلام، كان مرشح نفسه كده لمنصب رئيس اتحاد الكره لمجرد الشهره مش اكتر ، ومكانش في دماغه أي حاجه خالص ، احنا هنسانده ونديله أصواتنا ، ولما يكسب هيبقى الراجل بتاعنا ، وطبعا انت برضه هتكون موجود في اتحاد الكره بصفتك عضو في الفيفا واحنا اللي هندير الاتحاد برضه ، ومتقلقش هو مش هيعترض"
تهامي: "أيوه كده يا وديييييييييييييع .. أخيرا فهمت يا وديع".
يضيف وديع "وطبعا أنا هستضيف جلال سلام في برنامجي الكره مع شوفير ، ونخلي حمدي عبد النبي برضه يستضيفه في برنامجه السابعه مساء ، ونلمعه شويه في الاعلام عشان الناس تقتنع بيه"
يقوم تهامي أبو غيده من على مكتبه ويتجه إلى وديع شوفير ويقول له "طيب اسمع دي بقى كمان ، سيادتك هتعلن انسحابك من الانتخابات"
يبدي شوفير اندهاشه قائلا "ازاي يا تهامي باشا ، ده انا الراجل بتاعك ، ودراعك اليمين ، وانا اللي بخططلك واظبطلك كل حاجه"
يرد تهامي "اسمع بس للاخر متتسرعش، دلوقتي الالتراس مش عايزينك انت كمان وهيقلبوا الدنيا وممكن يلغوا الانتخابات ، انت بس هتنسحب دلوقتي ، ولما سلام يكسب هو والقايمه بتاعتنا يبقوا يعينوك مستشار او مدير تنفيذي لاتحاد الكره ، وهتبقى معانا برضه ، بس تكون الدنيا هديت شويه"
وديع: "أستاااااااااااااذ".
ملحوظة أخيرة:
جميع الشخصيات في هذه القصة هي من وحي خيال المؤلف وليس لها أي علاقة بالواقع .. وأي تشابه في الأسماء أو الشخصيات أو الأحداث هو من قبيل الصدفة فقط.
https://www.facebook.com/Khaled.Tala3t