معلومة قانونية.. أضواء على قانون التصالح
للناس الكتير اللى بتسأل على موضوع التصالح فى المبانى نقولها ببساطة وسهولة:
أولا: اللى بانى بدون ترخيص قبل ٢٠٠٨ وتحديداً قبل ١١/٥/٢٠٠٨ مفيش عنده أى مشكلة «لا غرامة ولا إزالة» وفقا للقانون ١٧ لسنة ٢٠١٩ والمعدل بالقانون ١ لسنة ٢٠٢٠.
ثانياً: اللى بانى بدون ترخيص بعد ١١/٥/٢٠٠٨ حتى ٢٢/٧/٢٠١٧ هو ده اللى هينطبق عليه التصالح «هيدفع غرامة ومفيش إزالة» والغرامة بتبقى حسب سعر المتر يعنى سعر المتر فى مساحة المسطح فى عدد الادوار المخالفة وسعر المتر حدده القانون بحد أدنى خمسين جنيه وبحد أقصى ألفين جنيه.
ثالثاً: اللى بانى بدون ترخيص بعد ٢٢/٧/٢٠١٧ هو ده للأسف اللى هيلبس فى «مفيش غرامة لكن فيه إزالة حتى لو ساكن».
طب إيه إجراءات التصالح؟
طبعا اللى هينطبق عليه التصالح هما الفئة التانية اللى بانى بعد ١١/٥/٢٠٠٨ ولحد ٢٢/٧/٢٠١٧ يعمل الآتى قبل يوم ٣٠/٩/٢٠٢٠.
١- يقدم طلب تصالح بالحى الذى يقع به العقار المخالف على النموذج المعد لذلك مرفق به حافظة مستندات بها رسم هندسى للعقار المخالف معتمد من مهندس استشارى «واوعى تلعب فى الرسم ده أو تزوره لأن ساعتها هتبقى جناية تزوير فى محرر رسمى.. خلى بالك اعمل معروف» وباقى المستندات الأخرى الخاصة بالعقار وبتدفع جدية تصالح مع الطلب ٥٠٠٠ جنيه وكسور يعنى خد فكة معاك.
٢- بعد ما تسلم الطلب وتدفع الفلوس اطلب شهادة من الحى انك قدمت على طلب تصالح للعقار بالتاريخ عشان لو فيه قضايا عليك أو أحكام بسبب المخالفة دى توقفها.
٣- بعدها الطلب بيتعرض على لجنة لفحصه فنيا ولما يقبل بيتحدد ميعاد للمعاينة الميدانية للعقار وبعد المعاينة بتقوم اللجنة بكتابة تقرير يتحدد فيه المخالفات
٤- بعدها يبقى ليك الحق انك تدفع الغرامة مرة واحدة أو تدفع ٢٥% منها وتقسط الباقى على ثلاث سنوات بدون فوائد «واحد يقولى طب أنا دفعت غرامات قبل كده على ذات المخالفة هقوله اطمن أى غرامة دفعتها على ذات المخالفة بتتخصم من قيمة الغرامة الجديدة».
٥- بعدها بتاخد شهادة بالمصالحة من الحى ودى بتبقى زى رخصة المبانى يعنى تقدر تقدم بيها على دخول المرافق كهرباء وماء وغاز وخلافه لو ماكنتش مركبهم وليك بعد كده حق التعلية والتشطيب وغيره وغيره ما انت معاك رخصة بقى، وفى حال رفض الطلب بتتظلم من الرفض ده خلال شهر من تاريخ الرفض.
من أجمل ما قرأت
سهرت أعين ونامت عيون.. فى شئون تكون أو لا تكون.. فدع الهم ما استطعت.. فحملانك الهموم جنون.. إن ربا كفاك ما كان بالأمس.. سيكفيك فى غد ما يكون.