شريف عبدالغني يكتب:معارضو «مرسي» يلتقون «مبارك» سراً!
في سرية تامة، عقد سياسيون من معارضي الرئيس المصري محمد مرسي وجماعة «الإخوان المسلمين» لقاء يضعون فيه الخطوط العريضة للفترة المقبلة، وذلك بعد اندماجهم في كيانات وتحالفات استعدادا للانتخابات البرلمانية.
المشهد الأول:
سياسي 1: إحنا بالصلاة ع النبي اتجمعنا كلنا مع بعض.. «فلول» على ثوريين.. رجعيين على تقدميين.. «ناصريين» على «ساداتيين».. «مباركيين» على «صباحيين».. ليبراليين على متشددين، عشان نزيح الجماعة اللي ما يتسموا دول من الحكم.. ولازم نكون مخلصين و «إيد واحدة».. وطبعا كل تحركنا عشان مصلحة الوطن..
سياسي 2 يهمس لزميله: صاحبك عامل فيها قائد.. وبيتكلم كأنه خايف على مصلحة البلد صحيح.. وهو مالوش ملة ولا عنده مبدأ وطول عمره بتاع كل الأنظمة، ولو «الإخوان» رموا له فتفوتة منصب كان قال فيهم شعر.
سياسي 1 يلتفت إليه ويسأله: بتقول حاجة يا نمرة 2؟
سياسي 2: طبعا بتكلم.. هو أنا هخاف منك.. ولاّ يعني هخاف منك.. إحنا كلنا عارفين بعض ولازم نتكلم بوضوح مع نفسنا.. كل واحد فينا لا مؤاخذة اتحالف مع التاني عشان مصلحته.. فينا اللي عاوز يبقى رئيس جمهورية.. ومنا اللي نفسه يكون رئيس وزراء.. واللي عاوز يبقى وزير.. واللي ينام ويصحى وهو بيحلم يكون مدير عام..
سياسي 1 مقاطعا: طبعا يا زميل.. عندك حق.. بس عشان الإعلام وكلام الناس لازم نذوق كلامنا بـ «بقين» عن حب الوطن.. وعشق تراب مصر.. والهيام في الدولة المدنية ضد الدولة الدينية.. لازم نتعلم سياسة يا اخوانا..
سياسي 2: إذا كان كده معلهش.. بس يعني نكون واضحين.. وطبعا اللي أوله شرط آخره نور.. وأنا عاوز أعرف دلوقتي تقسيمة «التورتة»..
سياسي 1 ضاحكا: تورتة إيه.. لو كان نفسك في تورتة ممكن نعمل لك عيد ميلاد دلوقتي.. ههههههههه.
سياسي 3 يقطع الضحكة: ما تلفش وتدور.. الزميل نمرة 2 عنده حق.. وانت فاهم كويس يعني إيه تقسيمة «التورتة».. «تورتة» السلطة يا حبيبي بعد ما نقبض على «مرسي» ونزيح جماعته من الحكم..
سياسي 1 يعود لهدوئه: طيب يا سيدي ما تستعجلش على رزقك.. إحنا لسه بنقول يا هادي.. ولو هنتخانق من دلوقتي «مرسي» هيبلعنا كلنا.. وبعدين الحاجات دي منظورة.. داري على شمعتك تقيد يا أخينا منك له.. وإن شاء الكل هيتراضى ويحلي خشمه بحتة «تورتة» كويسة..
سياسي 2: بس لازم برضه نعرف راسنا من رجلينا.. التقسيمة هتكون إزاي عدم المؤاخذة..
سياسي 1: هو من حيث المبدأ الرئيس لازم يكون «أحمد شفيق» أو «عمرو موسى» أو حد من فلول كبيرنا مبارك الله يمسيه بكل خير ويفك سجنه قادر يا كريم.. وبعدين نوزع باقي المناصب وكل واحد ومقاسه..
سياسي 4 يهب واقفا: حيلك انت وهو.. قاعدين تتكلموا وتوزعوا المناصب براحتكم ولا عاملين اعتبار لأي واحد فينا.. وكأن مصر دي العزبة اللي ورثتوها عن «دادي».. الريس طبعا معروف ومفيش غيره..
سياسي 5 مقاطعا: مين ده إن شاء الله؟
سياسي 4: حمدين صباحي طبعا.. واحد مننا..
سياسي 5 غاضبا: علي الطلاق ما يحصل.. على جثتي.. ساعتها هنجيب عاليها واطيها وهنقاطع الانتخابات ونرجّع الفوضى وقطع الطرق.. البلطجية على قفا من يشيل.. ومستنيين مني مجرد إشارة ويولعوا في البلد.. الرئيس لازم وحتما يكون ابن بلد ومجدع وفاهم الأصول.. وطبعا أنا أرشح «توفيق عكاشة».. راجل زينا كلامه عادي وبسيط ومالوش في الثقافة..
سياسي 4: نعم!! أهو دا اللي ناقص.. يعني نصوم نصوم ونفطر على «عكاشة»..
سياسي 6 يتدخل مهدئا الجميع: يا جماعة صلوا على اللي هيشفع فيكوا.. طيب بدل الخناق ده نجيب واحد عليه توافق وبعيد عن الخلافات وهو الدكتور محمد البرادعي..
الجميع في صوت واحد: كله إلا ده.. ده مش بتاع صفقات وحسابات وترضيات.. ولو مسك الحكم مش هنشوف منه ولا «فتفوتة تورتة» لأنه عارفنا وفاهم أغراضنا «الدنيئة»..
سياسي 1: أنا رأيي نؤجل موضوع الرئيس ده.. ونراجع جدول الأعمال.. كل واحد يتفضل يقول عمل إيه عشان نقضي على محمد مرسي و «الإخوان»..
سياسي 7: إحنا يا جماعة دورنا معروف.. كل يوم بنحاول نعمل أزمات معيشية، وزملاؤنا في «مافيا» السوق بيحتكروا سلع كتيرة عشان الأسعار تولع..
رجل أعمال 1: وأنا رجالتي في الصحافة والإعلام شغالين الله ينور.. كل يوم تربص وترصد لأي حاجة من «مرسي» والجماعة ويعملوا منها قضية أمن قومي.. والحمد لله كل الناس دلوقتي بتتكلم عن «أخونة الدولة» كأنهم بيتكلموا عن ماتشات الأهلي والزمالك..
سياسي 9: وأنا الحزب بتاعي قام بدور كبير
سياسي 10: وما تنسوش يا جماعة إن أنا وزمايلي شغالين من خلال حبايبنا في المصانع والشركات عشان تحصل إضرابات فئوية كل يوم والدولة تعطل والحال يقف..
سياسي 11: وأنا بلا فخر صاحب الفكرة العبقرية إن الإضرابات تكون قدام القصر الرئاسي.. وكمان فكرة قلع الهدوم في الاعتصامات من بنات أفكار العبدلله عشان تدي إثارة أكتر..
سياسي 1: الله ينور عليكم جميعا ويكثر من أمثالكم.. ومصر لن تنسى لكم هذا الأعمال الوطنية الرائعة..
سياسي 2 يعود للمقاطعة: مصر برضه؟!
سياسي 1: يا أخي إحنا قلنا قبل كده «تذويق» الكلام شيء مهم..
سياسي 3: لكن برضه لازم نحسم مين اللي هيقطع «التورتة» ويكون الرئيس عشان نعرف هيكون أمين في التوزيع على الباقيين ولا لأ..
«يسود القاعة هرج ومرج وأصوات متداخلة، وكل طرف يحاول فرض اسم بعينه.. ولا يقطع الفوضى سوى صوت أنثوي ناعم»..
فنانة 1: يا جماعة اسمعوني.. أنا وقفت ضد اللي بيسموها ثورة من أول يوم.. ودافعت عن «مبارك» حتى آخر نفس، ووقفت ضد «البرادعي» و «الإخوان».. وأيدت أحمد شفيق في الانتخابات بقلبي وروحي.. ودفعت التمن غالي.. وأكيد شفتوا وسمعتوا الراجل اللي قعد يشتمني بكلام قبيح..
الجميع: كلنا وقفنا ضد الراجل الظلامي ده.. ومحدش ينكر دورك الوطني العظيم.. وقطع لسانه اللي يقول كلمة بطالة عنك..
فنانة 1: اسمعوني بس.. أنا رأيي إن اللي ما لوش كبير يشتري له كبير.. واحنا ما لناش غير كبيرنا وحبيبنا «مبارك»..
«همهمات بين الحضور، ومناقشات انتهت جميعها بالاقتناع بفكرة الفنانة، والذهاب إلى مبارك»..
المشهد الثاني:
يذهب الجميع إلى مبارك في سجن طرة.. يتزاحمون على باب غرفته.. يدخلون.. يلقون التحية ويسلمون عليه واحدا تلو الآخر بينما هو جالس على سريره وينظر إليهم بتأفف..
سياسي 1: إحنا يا سيادة الريس جايين في مهمة وطنية.. ومش هنطول على سيادتك.. إحنا لينا طلب واحد: نخرج سعادتك من السجن ونذهب بيك إلى القصر الجمهوري تحكمنا سنتين أو تلاتة تقضي فيهم على «الإخوان» وترجّعهم السجون تاني وتوريهم النجوم في عز الضهر.. انشالله تولع فيهم بجاز..
مبارك: واشمعنى أنا اللي أقوم بالمهمة دي؟
سياسي 2: لأن سيادتك الوحيد اللي تنفع معاهم.. وبعدين كنا معتمدين على تلامذتك «طنطاوي» و «عنان» وغيرهم لكن «مرسي» منه لله قضى عليهم في لحظة وقعدهم في البيت..
مبارك: طيب وبعد ما أحكم سنتين ولا تلاتة إيه اللي يحصل بعد كدة؟
سياسي 3: نحكم إحنا بقى بدون منغصات ولا وجع دماغ..
مبارك ساخرا: لأ فالحين قوي.. طيب والله ما اتزحزح من مكاني ولا أحكم ساعة واحدة إلا بشرط..
سياسي 4: إيه هو سيادتك؟
مبارك: إن اللي يحكم بعد مني يكون واحد بس مفيش غيره.. وهو موجود دلوقتي معانا وقاعد تحت السرير ده؟
نظر الحضور أسفل السرير فوجدوا.. جمال مبارك!!
نقلا عن صحيفة العرب القطرية