جمهورية بورينجا.. رابعة سابقا

طويل العمر يطول عمره ويزهزه عصره وينصره على مين يعاديه هاى هيئ طويل طويل مش عارف ليه دايما كل ما شوف اللى بيحصل فى اشارة رابعة والمنصة اللى عملينها الاخوان المسلحين هناك واسمع عصام العريان أو صفوت حجازى أو البلتاجى أفتكر الفنان الكبير فؤاد المهندس فى فيلم صاحب الجلالة لما كان فريد شوقى شيال وعملوه سلطان بورينجا مارينجوس الأول وكل ما حد ينطق اسمه ينتفض عسكرانى اللى هو فؤاد المهندس ويقول الكلمتين دول مع الهاى هيئ.

فما يحدث فى رابعة مولد سيدى العريان أكل وفتة وشوية هتافات على طريقة طويل العمر هاى هيئ وسلطانهم مرسى زى مارينجوس الأول بالظبط كلامه كله هرتلة وهبل ورغم ذلك قاعد عسكرانى العريان يقول عنه طويل العمر يزهزه عصره ولكى يكتمل المولد فقد نصبوا سيرك مجلس الشورى كمان هناك وجابوا لأحمد فهمى نسيب مرسى منصة كده قال وشاكوش يخبط بيه ويفتتح الجلسة هبل فى هبل وقال ايه احنا البرلمان المنتخب نطلب من برلمانات العالم تقف معانا والا هنروح نحاصر السفارات وخصوصا سفارة ماما أمريكا اللى هى وعدتنا تقف معانا على طول الخط وتنصرنا ظالمين ومظلومين ولا يستحى هؤلاء المقاطيع من الاستنجاد بأمريكا لا ويقولوا إن أمريكا هى اللى بتشجع ضدهم رغم أنهم ممسوكين آداب متلبسين بممارسة الدعارة السياسية مع أمريكا وإسرائيل وأنهم انبطحوا وخلعوا كل هدومهم ورقصوا استربتيز كمان عشان يرضى عنهم الأمريكان والإسرائيليون وعلى رأى الست أطاطا مش عاوزين نفسر بقى.   
ولكن الشىء اللافت للنظر أن الجماعة فى مولد العريان فى رابعة مش عاوزين المولد ينفض أبدا ليه لأن الأكل بلاش والشرب والنوم واليومية ماشية وكل واحد يجيب مراته وحماته وأمه واخواته البنات وولاده حتى الرضع عشان نحطهم دروع بشرية يحمونا ونقول للعالم اهم بيضربوا الأطفال والنساء واهى يومياتهم محسوبة والفلوس بالهبل بس منين  ده اللى لازم يقولولنا عليه أو تفضحهم الحكومة وتعلن للشعب الفلوس دى كلها منين وفلوس الذخيرة والسلاح منين وتأجير الارهابيين فى سيناء منين وايه المقابل لازم حد

يقول لنا وبعدين  كل ده كوم وضرب الناس بالرصاص والمولوتوف والشوم والجنازير كوم وواضح أن هم عاوزينها حرب أهلية أو بيتلككوا أن الجيش يضربهم ويقدموا العيال الغلابة يموتوا فى سبيل أهدافهم الخبيثة عاوزين مصر تبقى سوريا أو العراق ويحصل تدخل أجنبى وتبوظ الدنيا مش مهم عندهم مصر ولا شعب مصر طظ المهم تخرب الدنيا ويقعدوا على تلها، وفاكرين نفسهم فعلا فى جمهورية رابعة برئاسة محمد مرسى زى ما قالت لهم آن باترسون ومش عارفين أن جمهورية رابعة زى جمهورية بورينجا حاجة تموت من الضحك والغريب أن جمهورية رابعة أو بورينجا أعلنت الحرب على كل الدنيا على الجيش والشعب والبوليس والاعلام والقضاء وعلى محلات الكشرى.
ولكن اللى لازم يفهموه الإخوان المسلحين اللى ناصبين مولد سيدى مارينجوس مرسى فى رابعة أن شعب مصر وجيش مصر لن يسمح بتنفيذ مخططهم القذر المكشوف مهما كان الثمن ودايما مصر كانت مقبرة الغزاة هنا كانت نهاية التتار اللى غزوا العالم وهنا إن شاء الله ستكون نهاية الإخوان المسلحين اللى كل يوم بيفقدوا أى تعاطف شعبى أو حتى دولى معاهم لأن الله يفضحهم بقتلهم الأبرياء وبإرهابهم لشعب مصر فهم خطر جدا على الحضارة تماما كما كان التتار اللى حرقوا مكتبة بغداد لأنهم جهلة وبهايم زى الإخوان بالظبط.

فكرة للتأمل
أوعى تتجوز واحدة منقبة أحسن تطلع بديع

جهاد عبدالمنعم

‏[email protected]