رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

الخوف صديقي ...شعر 

ثقافة

الثلاثاء, 16 أبريل 2019 02:21
الخوف صديقي ...شعر 

شعر _ مصطفى محمود
الخوف صديقي.. مع إني مبطقهوش
والضعف شرْحُه.. ملازمني مهما بروح
البُن صاحبي.. والشاي دا ماعاشرتوش
والصمت كيَفي.. ملعون أبوه البوح
.
مدّيَت عينيا لنورها.. صرت كفيف
مدّيَت ايديا لإيدها، بترتها
إزاي مازالتي فـ نظري حد عفيف
وازاي يا قلبي راضي قسوتها
.
مجروح يا قلبي م الصحاب والأهل
مجبور يا خاطره م الغريب أكتر
منبوح يا صوتي والغنا مش سهل
مضطّر اغنّي حتى لو منظر
.
يا عينيا شايفة خرم إبره براح
وحياتي أضيق من مسام الجلد
مبقاش ف جعبة طيري أي جناح
ولا حتى رجلي.. بيها أعرف أمد
.
الهم بؤجه.. خدّلت كتفي
خلّاني مطفي شاحب الصورة
لو جيت ف مرة خدت يوم سيلفي
هلقاني بضحك ضحكة مكسورة

أهم الاخبار