أنا مش هناقش ضحتك..شعر
أنا مش هناقش ضحكتِك
مش هاعترض
على وش لما بيبتسم
يفرش حدود الشمس .. ضى !
و لا هاشتكى من سكتك ..
اللى بذاته - المُنتهىَ - زاده .. انتهى
و لا جابش اخر سكتِك رايح .. و جى!
فازاى تقولى زيى حد ؟
و حدّى فى هواكى .. السما
هو اللى واصل للسما فيه زييه زَى ؟
احلف عليكى باللى خلقك فتنتى
و جعل ف نارِك جنتى ..
و رمانى فى أرض الهوى ميت و حَىّ ..!
و ارمى عليكى السحر و اقرا لك عِدد
و اطلب على بابك .. مَدَد
و اسوق عليكى الأوليا والى و ولىّ
و احلف عليكى تكونى على اد التعب
و تصونى قلب اللى لا يوم وعدِك
بقصر و لا دهب ..!
و لا حيلته غير شِعر و أدب ..
و كُتب بيقراها اللى دابوا
و يهتفوا ميت آااااه و آىّ ..! ،
مش برضو مين داق لوعتِك
من حقه يرتاح فى اللى جَىّ ؟
شعر: أحمد عويس