أنساكي ليه...شعر

أنساكى ليه؟
و انتى القمر وقت الكمال
و اكتمال الحلم لما
عدى حد العقل و حدود الخيال
انساكى ليه
و انتى انتشلتى جثتى
م البحر وقت العاصفة
ايوة ما كونتيش مُنصفة
و حاجات كتير
ف هواكى كانت مؤسفة
بس برضو
كنت احلى من خيالى
لما حب ف مرة يشرح رأيه ف علم الجمال
كنتى السؤال اللى مالوش رد عندى
بس حبك هو كان رد السؤال
اللى معرفتش انا اجاوب عليه
انساكى ليه؟
*
انساكى؟
ممكن..
عادى يعنى..
فيه حاجات حواليا ممكن
تمحى ياما ذكريات :
الكتابة..
القراية..
الخروج..
النقاش الحاد
او حتى السفر ويا البنات..
عادى يعنى
ممكن انسى كل حاجة
زى ما بانسى بمزاجى _ عامدا_
كل اللى فات..
بس انا عايزك ف قلبى
جوه ف العمق البعيد
اللى لا يمكن تلمسه و تطوله ايد
اللى لا يمكن يهزمه لا بعاد و لا طول السكات
عايزك تكونى نشوتى المكبوتة
و الثورة على كل الامانى..
و المعانى.. و اللغات..
و الثورة على مُجمل حياتى
المستحيلة المقرفة
ايوه ما كنتيش مُنصفة
و نهايتى ويا هواكى كانت مؤسفة
بس برضو
كنتى احلى من خيالى
لما حب ف مرة يشرح رأيه فى علم الجمال
كنتى السؤال اللى مالوش رد عندى
بس حبك هو كان رد السؤال
هافضل احبك..
حتى لو قالوا ان حبك
ذنب هاتحاسب عليه..
هانساكى ليه.


شعر _ أحمد عويس