سبب بكاء هيثم شاكر في حفل جدة بالسعودية

قال الفنان هيثم شاكر، إن سبب بكائه أثناء حفله في مدينة جدة بالمملكة العربية السعودية، يرجع لأسباب عدة، من بينها وأولها الفرحة.

أقرأ أيضًا: هيثم شاكر: وفاة والدتي كسرني وحياتي كانت سودة

وأضاف الفنان هيثم شاكر، في تصريحات متلفزة، "أنا اتولدت في السعودية وكنت بحلم لما مشيت إني أرجع وأبقى مطربًا كبيرًا ومشهورًا وأغني فيها وطول الرحلة بتاعتي من أول أغنية أحلف بالله سنة 2001، راسم لليوم اللي أغني فيه في المملكة".

وأوضح: "من أول ما الناس استقبلتني وأنا بغني كإني شايف شريط حياتي بيعدي قدام عيني وبكيت من الفرحة لدرجة الانهيار، رغم ان بقالي كتير بغني ومعنديش رهبة الخوف من المسرح".

وتابع: "عشت في السعودية 14 عامًا، وحلم طفولتي وأنا في جدة اتحقق بعد صبر وتعب اتحقق بعد 20 سنة".

وكشف الفنان هيثم شاكر، تفاصيل إصابته بمرض سرطان في القولون، قائلًا: "مش بحب أشارك مشاكلي الشخصية مع حد".

وكان الفنان هيثم شاكر، قد صرح في إحدى البرامج المتلفزة، في وقت سابق: "بحب اتحمل مسؤولية لوحدي، ومش بحب أصعب على حد، ووالدتي توفت من غير ما تعرف مرضي، بحمد ربنا على كل حاجة حصلتلي، اكتشفت إني عندي سرطان في القولون، واستسلمت زي أي حد، وسافرت اتعالج بره".

وتابع: "كنت شايف حياتي سودة، ومستني قدر ربنا، وحسيت إن حياتي هتنتهي، وفي دكتور نفساني متابع معايا، وقالي عيش اليومين اللي فاضلين دول، محدش عارف الغيب، بدأت أتعلق بالحياة أكتر، وكنت شغال في ألبوم أحلى قرار، إلا أن ربنا منّ عليا بالشفاء، وربنا عالم بكل حاجة، ومش بيبعت حاجة وحشة، ومن حوالي 10 سنين أو أكثر، عملت عملية في معدتي، واكتشفت المرض بالصدفة، كانت قرح في البداية، وتحولت إلى سرطان".

واستكمل: "ووالدتي كانت بالنسبة ليا كل حاجة، علشان كده مرضتش أقولها، ومكنتش هتستحمل تعرف كده، ووفاتها كسرني".

وأضاف هيثم شاكر: "المواقف بتبين الناس على حقيقتها، قولت للناس القريبين علشان يبقوا جنبي، ملقتهمش، وناس عرفتهم بالصدفة وفضلوا جنبي، أتغير في حياتي كتير جدًا، الحياة مش مستاهلة أي حاجة".

للمزيد من الأخبار طالع alwafd news