رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

فيديو.. د.زين الشيخ يكتب: خواطر رئاسية

فن

الاثنين, 14 مايو 2012 20:08
فيديو.. د.زين الشيخ يكتب: خواطر رئاسيةد. زين الشيخ
خاص-بوابة الوفد:

أكد الدكتور زين الشيخ أن الخواطر الخاصة بمرشحي سباق رئاسة الجمهورية التي انتهى من كتابتها مؤخراً رؤية شخصية للعملية الانتخابية التي تشهدها مصر، معرباً عن تفاؤله وثقته في قدرة المصريين علي التحول الديمقراطي.

وطالب دكتور زين المصريين بأن يعبروا عن آرائهم بحرية دون تدخل من أحد لأن لكل مواطن الحق في الاختلاف مع الآخر دون تجريح ليتولي أمر المصريين من يصلح.

خواطر رئاسية :
إنتخابات

يا أول انتخابات ب ١٣13  اسم و مرشح
الشوك إبر طويلة حوالين أمل بائس وبيفتح
والغدر لسه واقف بضحكة غش بيصبح
الثورة يا عينى عليكى من ضربة الشومة على دماغها
واقفة بتتطوح
أنماط كتيرة من بشر طمعى وفجعانة
سلفى إخوانجى ليبرالى
فئوى وفلول بلطجية  وحزب قديم
مسيلمة الكداب وراسبوتين
واللى جاى أصعب
ونيل مصرنا باصص ومستغرب
و أبو الهول ينادى على خوفو ياللا بنا نهرب
وبكرة خايف عليكى يامصر
و الجو مشحون و متكهرب
شياطين و مردة في حوارينا سارحة و بتلعب
وأعداء ع الحدود جاهزة
وناس مش عارفة لها مهرب
إدعو لمصر فى أول اختبار  أصعب
يجنبها رب العباد شر اللئيم و سطوة الملعب
بس فيه ملحوظة
القايمة لا فيها ست و لا صعيدى و لا قبطى
أنا بس مستغرب

http://www.youtube.com/watch?v=4g2Skdf3bRw

١1- موسى
======
عصاك ياموسى
مع السحرة وللا مع الناس الغلابة
ولا ابن ابن عمنا عمران
هتعدى بالمؤمنين لشط العدل والإيمان
وتنشر الحق ويا العدل بالميزان
خايف عليك خوف أم موسى على ضناها
شمسك  يا رمز الشمس هالة و محلاها
اربعين سنة تانى لطفك يا لطيف بينا
آمانة قول الحق يا دبلوماسى رسينا
سياسى محنك صحيح
راجل دولة
٢2- الاشعل
======
سلفى و شرقاوى يا سفير
البلطة رمزك يا اشعل
علمك وفير و غزير
بس فيه شئ محيرنى
إنت بجد فى الجماعة أمير ؟
الفكر علمى الرأى دينى
دى ( أصالة ) يا مشعللها
ولا حساب وشطارة
نازل رياسة ومرشح الإخوان بتشجع
ياريت الاقى للأمور تفسير


٣3- الحريرى
=======
يا اسكندرانى يا مناضل
إنت فين
تمثيل مشرف
من ورا نظارة البحر
مش شايفك
ياحريرى إصحى دى معركة
مش استجواب فى المجلس
إفهم كلامى أرجوك ركز
تحالف تنازل مع زميل ثورة
و الحر ويا الحر بإذن الله ننجز
ونغلب الوطاويط
وتحيا مصر يا مناضل
و الله عارفينك
مصرى أصيل راجل فاضل
حريرى م الحرية
و من حرير وقطن بلدنا اللى اتحرق
بإيد الندل والسافل
لكن معاك بالعرق و الجهد
بلدنا تعلى لفوق تفوق الحد
وتبنى بكرة زى امبارح
لما بنينا الهرم و السد

٤4- محمد مرسى
==========
شرقاوى و ميزان
حرية وعدالة
طبعا زعيم إخوان
ونهج دينى صريح
شريعة و استعلاء بفكرة الأديان
والمصرى ياباشمهندس عمره ماكان كافر
و الدين فى قلبه قبل الزمان بزمان
دستورنا قرآننا جوه جوانا
العدل والحرية و العلم والإيمان
فاهم يامرسى ... العلم والإيمان
ماترجعوش الزمن
ماتكفروش الوطن
مافيش خلاص عبدة للأوثان
غسيل القلوب أهم من طهارة الأبدان
والطب مش فى العشب يا أخينا
وفتوي الرضيع ومضاجعة الموتى
وحرمة قعدة البنت مع أبوها
والست عورة  وتحرير الوطن
ما يجيش بعد إغتيال الفن و قهر حرية الإنسان


٥5- أحمد شفيق
========
يا سلم  .... يارب سلم
نكته  ولا بجد .... الله أعلم
الثورة قامت صحيح
أنا كنت بحلم
يا ربى ... صورة طبق الأصل
وكمان طيار
زميل ورحلة كفاح ومثل أعلى
رئيس وزارته الاخيرة و مظبط الاوراق
بونبونى وكنتاكى لشباب الثورة و الأحرار
رئيس ديوانك اللى جاى مين ؟ زكريا
نائب الرئيس عمر سليمان ؟
إنجازك إنك بنيت لمصر مطار
بالنهج ده رئيس مطار دبى يحكم العالم
بلاها ثورة بلاها حرية
والشعب جوه السجن داخل الأسوار
ياه  .... ده بجد يااخواننا
السنة وكام شهر اللى عدو
شوية هزار فى هزار

٦6- عبد المنعم أبو الفتوح
==============
يا حصان كان جامح
يا أبو أشهر خناقة مع رئيس دولة
يا وطنى حتى النخاع
أنا بالى فيك سارح
إحترت فى أمرك النهارده و امبارح
إخوانجى مرة ألاقيك
فى زى ليبرالى
ويسارى مافيش مانع
من قلب الجماعة صحيح
لكن لك رأى بيعارض
إحساسى إن ده تمثيل
ماتقوللى يا ابن النيل
يا دعوى يا سلفى
قرضاوى وقطرى
وللا صحيح مصرى
قالوا رائد التجديد جوه الجماعة
قلت مافى جديد ولا خطاب عصرى
الدقن مش باينة ولا العمة
وانطس فى نظرى


٧7- خالد على
=======
يا ثورى يا شجرة
يا أصغر مرشح يا ابن ميت غمر
ياللى اتنشلت فى عز النهار
إنت وأخواتك الثوار
بكرة ييجى أحلى نهار
و تضلل الشجرة
وتطرح الثمرة
و تشعلل الفكرة
أما النهارده يا ابو خالد
من قلبى و الدموع أنهار
صعب قوى تلعب مع كبار أشرار
جيلك ياصاحبى واقف له جيل جبار
عسكرى و فلول و متأسلم
خايف يكون زى جيل موسى
حكم عليه ربنا بالتيه
و يوم البراءة بعد أربعين سنة
لما يخلصوا الأشرار
يارب هون عليكى يا مصر
نصيحة يا صاحبى تتحالف مع زميل ثورة
تحت راية هدف واحد
و بعد العسر ييجى اليسر

٨8- -محمد فوزى عيسى
============
يا كاميرا يا فيديو
يا ابن ميت غمر
ليبرالى  قانونى و مأمور بوليس سابق
لا تحب فوضى و لا حاكم دكتاتور طاقق
ما فيش فروق عندك ما بين مصرى و أخوه مصرى
حرية الشعب مش نزوة ولا لعبة
ده حق واجب تنفيذه الفورى
يا منادى بهيبة الدولة
اسمك أوله محمد و آخرته عيسى
و مؤمن بحرية الأديان
ونصير شديد فى دفاعك عن كرامة الانسان
و ضد فرض ملة على ملة
ولا إكراه فى الدين و الدعوة بالحكمة و الموعظة الحسنة
بتشجع النظام وو اقف مع جيشنا
وفى النهاية برده لى معاك كلمة
إسمعها منى نصيحة يا ابن" الجيل"
لو كنت مش كومبارس انت ويا الحزب
و يبقى الكلام عليك انك فلول ده كدب
نتفق على شخص واحد
يا حبيبى
يا ابن الشعب

٩9- أحمد حسام خير الله
==============
يا فريق يا سيارة
حزب السلام رشحك
من حضن الأمن و جسارة
إسمك فى الجهاز معروف
وكل اللى بيشجعك
واقف معاك م الخوف
وكيل جهاز حساس
معاك ملفاتك
مانتش خاتم سليمان
ولا من الوطاويط
نموذج الميدان
قالوا عليه تخطيط

١٠10- محمد سليم العوا
=============
بالعدل تحيا مصر
يا مظلة
اسكندرانى صحيح و متأّصّل
بحراوى وابن النيل
وشريان الشام مع مصر متوصل
مشروع حضارة ووسط
على شريعة متفصّل
قاضى قانون وفقه إسلامى
إخوانجى هادى رزين
قالوا عليك شيعى
مع العسكر و بتهادن
صورة و مقلوبة
ولاد مصر مش أفغان
ولا أتباع بن لادن


11- محمود حسام جلال
==============
يا نجمة
يا غزال إسكندرانى
حزب البداية وبداية القصة
ضابط بوليس سابق و العدل بيك يرسى
و حق البشر عندك كما الرسول أوصى
رزقك يا كريم واسع
خيول فى مزرعة بترمح
وطير فى السما سارح
والبحر مليان خير
لا يعد ولا يحصى
ركز معايا و النبى لأجل البلد تنجى
ونعدى  بيها المحن
والله دى فرصة
على واحد مننا لابد نتوافق
ويبقى لشطنا مرسى

12- هشام البسطويسى
=============
ساعة الإيد مضبوطة
لا بتقدم ولا تأخر
والنعمة يا جماعة تجمع حزب مش منظر
و المستشار له مواقف
بس الغدر كان أشطر
و مجلس رئاسى فكرة تتبلور
فشل تانى زى البرلمان
مش عاوزينه يتكرر
بسطويسى حريرى صباحى وخالد
مواقف رجولة
بها نكبر
روح الفريق اللى بيها مصر تتطور
يا بو إيد عفيفة و النبى فكّر

١٣13- حمدين صباحى
============
يا ابن بلدنا
يا واحد مننا
يانسرنا
أنا صوتى ليك
واضحة وصريحة أملنا فيك
بسيط زينا مش لابس عباية حد
وشك باسم بشوش
فى الحق وحش الوحوش
أبو خالد ملهمك
فى نصرة الفقرا
وسطية الاسلام وسماحته
لا جبروت ولا قهر
ابن مصر أصيل
هاتعدى بينا النهر
فتحت كتاب الأمل
قريته صباحى
العدل هو النور
العلم ده سلاحى
لا دروشة ولا مجاذيب
يتحكموا فينا
دى مصر أول سطر
منقوشة فى التاريخ
مينا و أحمس
قطز وناصر و صلاح الدين
ريحانى ومحفوظ جابولنا نجيب
يا شيخ سيد ،  يا ثومة
زويل و برادعى
محمد يا عبده يا شيخ
إنت وسلامة حجازى
أيه اللى حصل يامصر لولادك
ظلام وفكر غريب
برده عندى ليك كلمة
علشان مانفتتش في الأصوات
ونبدد الضلمة
وميتكررّش اللي فات
مجلس رئاسي الحل
ونوحّد الكلمة
ونعدى م الأزمة
وتنور الشمعة

 

أهم الاخبار