شاهد.. مفجر تسريب بيانات عملاء فودافون يعتذر للشركة ووزارة المالية ويكشف تفاصيل الأزمة
اعتذر محمد عبد الباسط، المؤسس والرئيس التنفيذي لشركة SEEKURITY لحلول أمن المعلومات، لشركة فودافون لما نشره عبر حسابه الشخصي حول تسريب بيانات عملاء شركة فودافون مصر.
عاجل.. وزير الاتصالات يكلف بالتحقيق في تسريب بيانات عملاء فودافون
نشر عبد الباسط، الاعتذار عبر حسابه على فيسبوك، تحت عنوان" توضيح و اعتذار رسمي لشركة فودافون مصر ووزارة المالية، مشيرًا إلى أنه لم يقصد التشهير بفودافون، نقل الخبر بشكل شبه حرفي من إحدى المنتديات المعروفة بتسريب البيانات.
قال في منشوره: "طيب يا جماعة، الكل لاحظ إنى شيلت البوست الخاص بإدعاء شخص لتسريبه بيانات لشركة فودافون مصر ووزارة المالية، اللى قمت بنشرهم إمبارح، الخبرين كانوا عبارة عن نقل بشكل شبه حرفى من منتدى أقل ما يعرف عنه إنه من المنتديات المعروفة جداً فى تسريب البيانات، الموقع بيحظى بشهرة كبيرة وحصل قبل كدا واتسربت فيه بيانات لجامعة مصرية".
أضاف: "اللى حصل إن فى شخص حب يشترى البيانات المزعومة الخاصة بشركة فودافون المعروضة للبيع مقابل 300 دولار على أن يتم الدفع على مرحلتين 150 دولار قبل الحصول على البيانات و 150 دولار أخرى بعد الحصول عليها، بعد ما تمت أول عملية دفع اختفى الشخص المدعو Cyber Anony لأسباب غير معروفة، ومردش على الشخص اللى حب يشترى التسريب المزعوم وبالتالى أبلغ الشارى عن الشخص اللى بيبيع البيانات لمدراء المنتدى وبالتالى قام المدراء بوضع "claim" أو "إدعاء" إن البائع دا "محتال" وإداله مهلة 24 ساعة علشان يقدر يدافع عن نفسه، إما يكمل عملية بيع البيانات اللى المفروض كان هيبيعها أو يتم حظره بشكل كامل من المنتدى والتحذير منه، فكون إن حركة زى دى تحصل، دا يضرب مصداقية الموضوعين بالكامل".
تابع: "دا إعتذار رسمي منى لشركة فودافون مصر ووزارة المالية بإنى تسرعت فى نشر خبر عن موضوعي التسريب المزعومين ودا حرصاً منى على مصلحة الشركة لكونها شركة تعمل داخل مصر والوزارة لكونها كيان حساس وأنا دايما أى مشكلة بشوفها ببلغ عنها الجهات الخاصة بالبيانات دى وسبق ليا التواصل مع أكتر من جهة فى مصر ومساعدتهم على حماية بيانتهم بالتواصل معاهم بشكل مباشر إن وجدت وسيلة تواصل أو من خلال سؤال العموم إن لم تتواجد وسائل اتصال
قال أيضًا: "لم أقصد الإساءة والتشهير بالعكس، أنا بنفسى كنت فى مقر شركة فودافون مصر فى القرية الذكية فى عام 2014 وكان الهدف من الزيارة هى إبلاغهم بشكل شخصى ببعض الثغرات الأمنية الخطيرة واللى استقبلوها بصدر رحب وتم حل الثغرات الأمنية جميعها بدون أي مشاكل".
أضاف: "تساؤولات كتيرة جايز تتداول فى ذهن الكثيرين من نوع: إنت غيرت أقوالك، الشركة أو الوزارة ضغطت عليك، انت تملكك الخوف، انت اتهددت، أبدا مفيش أى شئ من دا حصل، وأنا بقول دا بكامل طاقتى وحريتى وقوايا العقلية، أنا متابع الموضوع جدا فى المنتدى نفسه محل الواقعة وعن قرب وأى تحديث كان واجب الإعلان لأن دى مسؤوليتى تجاه أى شخص عندى على أى من حساباتى على السوشيال ميديا، دا حقكم عليا، وإلا ساعتها هبقى بضللك وهبقى فعلا زى ما اتقال طالب شهرة واللى الحمد لله أنا فى غنى عنها".
اختتم منشوره، قائلًا: "أنا متوقع شتائم طبعا وهعذر أى شخص هتخرج منه بس محتاجك تتفهم شئ مهم جداً، لو إنت فى مكانى هتحس بالمسؤولية، أخيراً، أى شخص مهما كانت خبرته وارد انه يخطأ بشكل غير مقصود لأن المقصود والهدف فى الأساس هو المساعدة وليس التشهير وأنا بكرر إعتذارى مرة أخرى، جل من لا يخطئ وشكراً جزيلاً لكل اللى بيحبوا يساعدوا".