الأقوال المستباحة في النقد والصراحة

 

* إلي الكابتن حسني مبارك اللي كان رئيس جمهورية

لو كنت أعلم خاتمتي

ما كنت بدأت..!! مع الاعتذار

لنزار قباني..!!

* إلي نادي الزمالك

طول عمرك وانت متحمص

ومتقرطص ومن الحكام بتعاني..!!

والأهلي ع القمة وانت في المركز التاني..!! »بس كده«..!!

* إلي زعيم حزب الوفد دكتور السيد البدوي

بعد الانتخابات الوفدية..!

افتح جامعة أهلية..!!

لمحو الأمية البرلمانية..!!

وتدريس الديمقراطية..!! »ياريت«

* إلي الشاعر الأستاذ فاروق جويدة

لأنك شاعر كبير

أسلوبك كالحرير

كتبت عن الوزير العاشق

ورفضت تكون وزير..!!

تستاهل كل خير..!!

* إلي ماما أمريكا

بتلبسي العالم برانيط

وتلبسي العرب زعابيط

وحبساهم في خانة إليك

وعلي مزاج اللوبي بتحركي القواشيط..!! »معلّمة«

* إلي السيدة الفاضلة المرحومة نعيمة أحمد إبراهيم

ابنك اللي انتي دعيتي عليه..!!

عشان رفض زمان يدفع لك نفقة

شرعية ستة جنيه!!

لعلمك دعوتك استجابت

وربنا فضحه وفرج العالم كله عليه!! »يستاهل«

* إلي الكابتن حسام وإبراهيم حسن نادي الزمالك

الكورة مش كلام في الهوي

الكورة صبحت علم وفن ومستوي

ومش كفاية الكلام والحماس والفهلوة »صراحة«!!

* إلي نتنياهو رئيس الوزراء الاسرائيلي

خطابك في الكونجرس يا ويكا

كذب ودجل وبوليتيكا..!!

نابع من سياسة اللوبي

اليهودي اللي حاكم أمريكا..!!

* إلي الصحفي الكبير الاستاذ محمود صلاح »أخبار اليوم«

سيبك من الهواجس

الدنيا جميلة

مش زي م انت حاسس

انت ستظل قيمة صحفية هايلة

في دولة الحوادث!! »صراحة« !!

* إلي الموهوبة المطربة غادة رجب

بيقولك عم الحاج جمعة..!!

لو كنتي اتولدتي في الزمن الجميل

قبل عصر الموسيقي الأونطة والسرعة!!

كان زمانك انتي وآمال ماهر نجوم

في السما السابعة..!!

* إلي الرئيس السوري بشار الأسد

ولعتها يا فالح..!!

يا تري حتلعب الماتش النهائي

مع القذافي واللا مع علي عبدالله صالح..!!

* إلي الاعلامية مني الحسيني

يا حلو صبح..

يا حلو طل..

كرابيجك زي الفل

وملكيش حل.. »صراحة«

* إلي الفريق القومي المصري

الحاتا

باتا كاتا..!!

مش حنقلب في اللي فاتا..!!

صلوا يا كباتن

من أجل حسن شحاتة