الأقوال المستباحة في النقد والصراحة

 

* إلي كمال الشاذلي اللي كان رئيس المجالس القومية

خلعت قبل اللي جري

للنظام اللي افتري

وإلا كان زمانك لسان الحكومة

في ليمان طره..!! يا بختك!!

* إلي الدكتور نبيل العربي أمين عام جامعة الدول العربية

مهمة تقيلة

ربنا يقدرك علي الشيلة

وتلم شمل العيلة..!!

* إلي الإعلامية هالة سرحان

يا دكتورة

يا مشهورة

أشور عليكي شورة

سيبك من براح التوك شو

وعلقي علي ماتشات الكورة!!

* إلي نادي الزمالك

من غير كاني ولا ماني

ولا دكان الزلباني

لو طلع الأهلي علي القمة

مش حينزل تاني..!!

* إلي اللواء زكي بدر اللي كان وزير داخلية مصر

انت الوزير الوحيد

اللي كان ينفع في المرحلة الحالية

كنت حتلم الحرامية والبلطجية

وتوريهم النجوم في عز الضهرية..! »صراحة«

* إلي مانويل جوزيه المدير الفني للنادي الأهلي

كان بالمرة يا خواجة

وانت جاي م البرتغال

تجيب مع المساعد مساعد

ومع مدرب الاحمال شيال

وبالمرة تجيب العيال وأم العيال

والبركة في رجال الأعمال..!! »يا خرابي«

* إلي المستشار مرتضي منصور

بعد اللي حصل

حقولك الخلاصة

عين علي نفسك حراسة!!

علشان تضمن الوصول بالسلامة إلي كرسي الرئاسة!! »نصيحة«

* الي سوزان ثابت حرم الرئيس السابق مبارك

المحكمة الإلهية

احكامها فورية

لا يمنعها ملايين ولا مليارات ولا بلطجية!!

* الي مستشفي دار الشفا العباسية

اسم علي مسمي

وخدمة عامة

بنزاهة وهمة

وادارة بذمة

وتشرفي الحكومة

واسمك علي القمة..!! »صراحة«

* إلي الإعلامي الكبير حمدي قنديل

واصل الصمود والكفاح

ولا تلقِ السلاح

ولا تترك ماسبيرو للبوم والغربان

واعداء النجاح..!!

* إلي اللواء محمد نجيب رئيس جمهورية مصر سابقاً

الزمن كان عامل حسابه

علشان إنت من احبابه

ثورة تطلعك

بره التاريخ

وثورة تدخلك التاريخ

من أوسع أبوابه..!! »حظك«

* إلي فلول النظام السابق

محمد عبد المطلب بيقول لكم

ودع زمان وانساه انساني..

عمر اللي فات ما حيرجع تاني..!!

مع تحياتي