الأقوال المستباحة في النقد والصراحة

بخيت بيومي

الثلاثاء, 05 أبريل 2011 07:23
للشاعر بخيت بيومي

 

إلي الدكتور فتحي البرادعي وزير الإسكان

أحلف لك بدمياط ورأس البر

وميدان التحرير

مصر محتاجة من أمثالك عشرين وزير »يا ريت«

إلي صاحبة الجلالة الصحافة

يا بريئة

يا رقيقة

يا أم عيون جريئة

ربنا يقدرك الأيام دي وتقولي الحقيقة..!! »صعب«..!

إلي أيوب الإذاعة الأستاذ إسماعيل الششتاوي رئيس الإذاعة

كرسي الإذاعة مسكون من عشر سنين

عشان ربنا يوفقك يا عم الحاج إسماعين

بخرو واقري عليه آية الكرسي وسورة ياسين.. و»وقول يارب«

إلي المجلس الأعلي للقوات المسلحة

بعد أكثر من شهرين

ودستور

وحكومتين

والحرامية الكبار في الشوارع ما شيين

تعالوا نعمل استفتاء

عشان نعرف مصر رايحة علي فين..!! »فكرة«

إلي مصور النجوم فاروق إبراهيم »أخبار اليوم«

يا مهارة يا شطارة

يا إدارة

رحيلك خسارة

الكاميرا بتبكي عليك بحرارة »وداعا«

إلي الحكومة الفلسطينية وعباس وشركاه

علي رأي واحد سياسي مش عبيط

حيث ان موضوع الأسير الإسرائيلي

مهم جدًا جدًا ومش بسيط

رأيك أيه لو تستنسخوا شوية

عساكر من »جلعاد شاليط« »ثروة«

إلي صديقي الصحفي المشاغب حمدي حمادة

لسانك حصانك

بيزعل عشانك

ويفرح لفرحك

ويطول رقابتك.. ويشد في ودانك »شقاوة«

إلي ثورة 25 يناير

الثورة اللي من غير حماية

يبقي شعبها مجروح

وبتطلع في الروح

وهيه نايمه في الرعاية »الحقوها«!!

إلي الدستور المصري الجديد

أنا عايز أقولك كام حاجة

مش فاكر منهم ولا حاجة

ولا حد في الشعب فاهم

حاجة..!! »دوشة«..!

إلي نادي الزمالك

حتلاقيها منين واللا منين يا مقهور

من الاتحاد الأفريقي واللا للجمهور المأجور..!!

واللا من مجلس الإدارة..!!

واللا من حبيبك مرتضي منصور..!! »مأزوم«

إلي الرئيس السوري بشار الأسد

سياسة أخوك ماهر

غلط من أصلها

وسوريا حيهدها

وحيخربها وتقعدوا انتم لتنين

علي تلها..!! »اصحه«

إلي عبدالله المصري الغلبان مجهول العنوان

المذكور أعلاه فقير

بيحب مصر بضمير..!!

مالوش سند

في البلد ولا نصير..!!

من يوم 25 يناير

مازال نايم في ميدان التحرير..! »عايز حرية«

إلي اللواء منصور العيسوي وزير الداخلية

علي رأي شاعر بيحب الوطنية

اللي مينفذش أوامر الداخلية

ويحافظ علي المسئولية الأمنية

يتحاكم محاكمة عسكرية..! »فورية«..!

كلام صورة:

فتحي البرادعي - مصطفي أمين - عم إسماعيل - المشير طنطاوي - فاروق إبراهيم - محمود عباس - حمدي حمادة - وائل غنيم - مرتضي منصور - بشار الأسد - وزير الداخلية