مهما طال الهروب والزوغان..!!
إلى رجل الأعمال أحمد بهجت
على رأى عم أيوب
كل شيء محسوب
إن كان مال عام واللا أطيان
ولابد من الحساب
مهما طال الهروب والزوغان..!!
إلى الدكتور سعد الكتاتنى رئيس مجلس الشعب
على رأى شاعر ماشى حافي
آه من حصيرى ومن لحافي
فابعتراف الشعب وبعترافي
مرتب النواب وصل الرقم الخرافي..!!
إلى الأستاذ الفنان سمير خفاجي
يا صاحب الفنانين المتحدين
ومكتشف النجوم
ورائد المسرح فى القرن العشرين
قولى اللى بيسأل عليك مين..!؟
إلى الرئيس الفرنسى نيكولا ساركوزى
الشعب الفرنساوى
شعب خواجات
مالوش فى تزوير الانتخابات
قبل ما يفتحوا دوسيه
الغراميات
اخلع م الأليزيه من سكات..!!
إلى الدكتور كمال الجنزورى رئيس وزراء مصر
اللى رافع سيفه
وعايز يغير الوزارة
ويعمل وزارة
يعين فيها معاريفه
يروح دولة سكافونيا
ويشكل حكومة على كيفه..!!
إلى الإعلامى سعد عباس رئيس شركة صوت القاهرة
عايز اقولك
واللا أقولك مش حقولك
م انت عارف قصدى إيه
من غير ما أقولك..!!
إلى الزعيم الفنان عادل إمام
أم سمارة بتاع الفول والطعمية
والبصارة
ضربت لك الرمل
وعملت لك استخارة
بتقولك اوعى تخاف
حتطلع براءة فى الاستئناف
بس ابقى روح لسمير خفاجى زيارة..!!
إلى الصحفية بنت بنت العمدة حنان مفيد فوزي
القلم الصحفى الموهوب صحافة
وفوق الخيال والجمال
يبقى شارب إعلام فني
من منبع مفيد وآمال..!!
إلى المعلم حسن شحاتة المدير الفنى لفريق
خالى بالك
دور التمانية
حيبقى حاجة تانية
الفرق تقيلة
وهجمة مرتدة
تلاقى الكورة فى الشبكة
فى ربع ثانية..!!
إلى الدكتور محمد محمدين رئيس جامعة قناة السويس
ناس بتاكل سمك وجمبري
من المال العام
بـ14 ألف جنيه كل أسبوع
وناس مش لاقية الرغيف
وحتموت من الجوع..!! ايه الموضوع..!!
إلى الكابتن أحمد حسام ميدو نادى الزمالك
لو رجعت لمستواك
حتاخد حقوقك
والكل حيجرى وراك..!!
إلى الأخ الدكتور محمد بديع المرشد العام لجماعة الإخوان
ولاد البلد بيقولوا
على القهاوي
الدنيا ياما فيها فتاوي
بتسعد أصحابها وفتاوي
تجيب المصايب والبلاوي..!!
إلى الشعب المصرى الغلبان فى كل ميدان
فى نبأ عاجل
عاد إليكم الرئيس العاجل
الذى سيفجر المشاكل
على رأى محمد نجم
شفيق يا راجل..!!
إلى الإعلامية انتصار شلبى اللى كانت رئيس إذاعة
على رأى أبوربابة
عمدة الغلابة
دنيا زى السحابة
فيها الكراسى القيادية
زى السواقى القلابة..!!
-----
لبخيت بن بيومى صاحب المساحة