رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

الأقوال المستباحة في النقد والصراحة

خلاصة الكلام

بخيت بيومي

الثلاثاء, 24 أبريل 2012 09:08
بقلم: بخيت بيومي

* إلي فضيلة الشيخ علي جمعة مفتي الديار المصرية
حقول لحضرتك
خلاصة الكلام
صلاتك في المسجد الأقصي
إثبات حق
وتقدير واحترام
ودعوة لكل الأديان

بالمحبة والسلام..!!!
* إلي حازم صلاح أبو اسماعيل المرشح اللي كان محتمل
اسمع كلام العبد الفقير
علشان تراضي الجماهير
اللي ماشيين وراك طوابير
بفلوسك الكتير
ابني لهم قصر جمهوري
في ميدان التحرير..!!!
* إلي الإعلامية الكبيرة نجوي أبو النجا
أصحاب المقامات العالية
لا يحالون الي المعاش
لأن مشوار السنين
لسه ماشي ومنتهاش..!!!
* إلي محمود أبو دنيا سفير مصر في قطر
سفير الحق والضمير
الجريء اللي مابيخاف
من أمير ولا وزير
يستحق التحية والتقدير..!!!
* إلي المطرب محمد منير
بيقولوا في المثل الشعبي
لسانك حصانك
إن صنته صانك
وإن هنته هانك
وان طلعته للجماهير يقل بمقامك..!!!
* إلي الدكتور سيد عبدالخالق رئيس جامعة المنصورة
كلمتين في السر حقولهم لحضرتك
الحفاظ علي مركز غنيم العالمي..
من السلوك غير الآمي..
مسئوليتك..!!!
* إلي الكاتب المبدع محفوظ عبدالرحمن
عم بيرم سيرة ذاتية
وطنية شعبية غير عادية
خللي بالك
ياصاحب العبقرية الدرامية..!!
* إلي الكاتب السعودي الكبير عبدالرحمن الراشد صحيفة الشرق الأوسط
كلامك لذيذ وموزون
وفي المضمون
فعلاً مصر في حاجة
الي حاكم فرعون
وليس فرعون
كالذي اتباعه في السجون..!!
* إلي سيادة اللواء المحترم صلاح المعداوي محافظ الدقهلية
علي رأي الحاج عبدالحفيظ
الأوامر والكلام
حلو ولذيذ
بس زي مابيقولوا ولاد البلد
ياصديقي العزيز
الرك ع التنفيذ..!!!
* إلي المستشار مرتضي منصور
بيقولك عم الحاج منسي
صاحب مسمط  التوانسي
ماذا استفيد إذا كسبت
كل الكراسي القيادية
وخسرت نفسي..!!

* إلي المستشار حاتم بجاتو أمين اللجنة العليا للانتخابات
عشان حضرتك تكشف ألاعيب
انتخاب الأموات في أي يوم
اصدر قرار بتفتيش الناخب المرحوم
جايز يكون طالع م القبر ينتخب ويرجع تاني
ولابس الكفن تحت الهدوم..!!!
* إلي الرئيس المخلوع حسني مبارك
خير.. ايه  اللي جري
أنا سمعت أن صحتك متدهورة
والحالة متأخرة
سلامتك متخفش
مش حينقلوك مستشفي
ليمان طرة..!!!
* إلي الدكتور جودة عبدالخالق وزير التموين والتجارة الداخلية
بيقولك المعلم برهومة
حضرتك بتنفخ في قربة مخرومة..!!
الجماهير مظلومة
والرقابة علي الأسعار
في سابع نومة..!!!
* إلي المطرب العربي الكبير / صفوان بهلوان
ابقي تعالي مبتجيش ليه
انت هوانا وانت قمرنا
لما تزورنا بتنورنا
حتي تراب مصر الفني بيفرح
لما يشوفك ماشي عليه.!!!

لبخيت بن بيومي صاحب المساحة