المطبخ السياسي
إلى السياسى الجرىء عمرو موسى المرشح المحتمل لرياسة الجمهورية
المطبخ السياسي
محتاج طباخ دبلوماسي
ومش أى حد يطبخ
ويتاجر فى الكراسي
بصراحة يا ابن بلدي
أنت الأجدر بالكرسى الرئاسي!!
إلى وزير المالية ممتاز السعيد
حقه صحيح
الفلوس القديمة
اللى بتفرموها
عشان م الأبواب الخلفية تسلكوها
كاميرات المراقبة بيعطلوها..!!
إلى المطرب سعد الصغير المرشح المحتمل للرياسة
بيقولك المعلم سمارة
لو نجحت حنعمل لك غارة
وزفة فى الحارة
بس تعمل النائب بتاعك شعبان عبدالرحيم
وبعرور يشكلك الوزارة..!!
إلى الألتراس الأهلاوي
يا عباد الله
اتقوا الله
ما تسيبوا القضاء ياخد مجراه
وبلاش النوم فى الشوارع
وكل واحد يروح يشوف
الشغل اللى وراه..!!
إلى المخرج الكبير عمر عبدالعزيز
بيقولك عم وفائي
أنت كنز اخراج
الكوميديا اللى باقي
فى مخازن الانتاج السينمائي..!!
إلى الرئيس صاحب الإعلان مجهول الاسم والعنوان
على رأى الدكتورة بهية
ولا عنده ثقافة ولا تربية
وبيصرف ملايين على الدعاية الانتخابية
ومكسوف يقول اسمه
وقال عايز يبقى رئيس جمهورية..!!
إلى المطرب عمرو دياب
حتهاجر
رايح دبى ياللا
بكل سرور
يمكن تتحل أزمة الأنابيب
وأزمة المرور..!!
إلى اللواء صلاح الدين المعداوى محافظ الدقهلية
مبروك الأرض الزراعية
فى منية النصر مفيش فيها
مبانى ولا طوبة
واتحلت مشكلة الأنبوبة
بس المرور فى المنصورة
لازال فى غيبوبة..!!
إلى النجم الفنان سيد عبدالكريم «ليالى الحلمية»
وداعا زينهم السماحي
ابن البلد
المتحدث الرسمي
باسم أولاد البلد..!!
إلى حازم أبوإسماعيل المرشح المحتمل لرئاسة
المبالغ الكبيرة اللى بتصرفها
على الدعاية الانتخابية
ممكن تعمل بيها دولة دينية
وتبقى أنت رئيسها
ورئيس وزرائها بالتزكية..!!
إلى عمر سليمان المرشح المحتمل لرئاسة الجمهورية
ما احنا كنا طلعنا
ع البر وبقينا حلوين
ولا رئاسة ولا سياسة
الشيلة تقيله يا بوسليمان
وتهديد بالقتل كمان..!!
حتجيب لهم صحة منين
واللى زقك عشان تترشح مين؟!!
إلى الأستاذة بنت الأصول صفية مصطفى أمين
الأهم والمهم
تعظيم سلام يا عم
للحارسة الأمينة
على أمجاد الأب والعم..!!
إلى الشعب المصرى الغلبان فى كل مكان
على رأى واحد كفتجي
بكره نعقد جنب الحيطة
ونسمح الزيطة
وتبان الخباسة
فى السياسة
واللى مستخبى ومتداري
فى انتخابات الرئاسة..!!
إلى الدكتور معتز عبدالفتاح عضو اللجنة التأسيسية للدستور
بيقولك الحاج حسنين
عمدة البدرشين
لو فى مصر من أمثالك
خمسة وعشرين
كنا عملنا عشر دساتير
فى جمعتين
إلى كابتن نادى الزمالك شيكابالا
الزمالك كسب
بمشيئة الله تعالى
حتودى وشك فين
من جمهور الزمالك ياشيكابالا..!!