أضرب دماغي في الحيطة..!!

إلي المهندس عبدالله غراب وزير البترول
اسمع كلامك اصدقك
وأعمل زمبليطة
أشوف أزمة السولار والبنزين
أضرب دماغي في الحيطة..!!

إلي لجنة الشئون العربية بمجلس الشعب
علي رأي الحاج مناع
ازاي عايزين تطردوا السفير
الإسرائيلي
وإحنا علي أعتاب ثورة الجياع
علي رأي المثل
إذا أردت أن تطاع
فأمر بما يستطاع..!!
إلي العندليب عبدالحليم حافظ في ذكراه
رغم الغياب الطويل
لازال يعيش فينا
صوتك الجميل لجيل بعد جيل
ولم يصل إلينا بعد الصوت البديل..!!
إلي الدكتور السيد البدوي زعيم حزب الوفد
المركب اللي فيها أر
وشد وجذب وجر
تتوه في البحر
ومتوصلش البر..!!
إلي فلول حسني مبارك الرئيس المخلوع
يا حرامية السولار والبنزين
ومدوخين الملايين
حتروحوا من ربنا فين..!!
إلي الدكتور سعد الكتاتني رئيس مجلس الشعب
العمدة بيقول في المندرة
قال إيه لسه لا باع ولا اشترا
ويركبوه عربية جديدة
بمليون جنيه لزوم الغندرة
الفلوس دي من الميزانية
واللا منين يا هل تري..؟!!
إلي كابتن حسن شحاتة المدير الفني لنادي الزمالك
احلف لك بالعظيم
بعد ما شفت ماتش
افريكا سبورت والجون اليتيم
الزمالك قبل ماتش العودة يا أبو كريم
محتاج تصليح وترميم..!!
إلي أحمد عز اللي كان الرجل الحديدي
شفت الدنيا
عملت إيه فيك
اتكعبلت في السجادة
وفرجت طوب الأرض عليك
ربنا يصبرك ويقويك
علي بلاويك..!!
إلي لجنة الدستور
علي رأي الحاج منصور
إذا أردتم العبور
وبدون تعقيد الامور
وإتقاء شر الجمهور
صلوا ركعتين من أجل
إنقاذ حضرة جناب الدستور..!!
إلي الكاتب الصحفي الكبير الأستاذ محسن محمد
وداعاً للأستاذية
وفي الرحمة الأبدية
لنجم من نجوم صاحبة الجلالة
والأعمدة الصحفية..!!
إلي شعب بورسعيد
بقول لكم إيه
اللي يجيله ضيف في أراضيه
مفروض عليه يحميه
مش يشوفه ينضرب ويتفرج عليه
طب بالذمة دي عندكم بتسموها إيه..؟!!
إلي الدكتور هشام قنديل وزير الموارد المائية
نمضي علي الاتفاقية
منمضيش علي الاتفاقية
خللي بالك من العملية
أصابع الصهيونية
بتلعب في منابع المية..!!
إلي الدكتور المحترم منصور حسن المرشح اللي كان محتمل للرياسة
ياللا
أنا مالي ومال الرياسة
والسياسة
ووجع الدماغ والشوشرة
واللي نايمين لبعض
في القصب في المجالس والدرة..!!
إلي فريق النادي الأهلي
علي رأي عبدالله النوبي
الفريق اللي من غير هداف
في ماتش البن الاثيوبي
ينام ويشد اللحاف يا محبوبي..!!

---

لبخيت بن بيومي صاحب المساحة