رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

الأقوال المستباحة في النقد والصراحــــة

بخيت بيومي

الثلاثاء, 29 نوفمبر 2011 12:44
بخيت بيومي

< إلي الدكتور عصام شرف اللي كان رئيس وزراء مصر:
بعد اللي جري واللي كان
يا ريتك مارحت الميدان
وكنت غلطت في العنوان
ولا شالوك علي أكتافهم الشبان!!

< إلي فلان الفلاني الرئيس المحتمل:
عندكش علاج للعلل؟
والملل.. والكسل؟
وللبلد اللي مصابة بالخلل؟
اوعي تقوللي مفيش أمل!!
تبقي رئيس غير محتمل!!

< إلي الكاتب الصحفي ممدوح الولي نقيب الصحفيين:
مطلوب منك حاجات ومحتاجات
حماية الصحافة من البهلوانات
وترشيد اصدار الجرايد والمجلات!!

< إلي الفنانة العظيمة ليلي مراد في ذكراها:
والعيش والملح وعشرتنا
صوتك مازال مالي حياتنا!!

< إلي المجلس الأعلي للقوات المسلحة:
علي رأي الحاج زلط
هما كلمتين فقط
بلدنا فيها
حجات كتير غلط!!
إحموها م الناس اللي ف طرة!!
والبلطجية والعالم اللبط!!

< إلي الدكتور كمال الجنزوري الغني عن

التعريف:
عايز أقولك
واللا أقولك
مش حقولك
م انت عارف قصدي إيه
من غير م أقولك!.. (مبروك)

< إلي الشاعر الكبير الأستاذ فاروق جويدة:
صوت العقل وبُعد النظر
وأحاسيس الشاعر المعتبر
اللي غير أحاسيس كل البشر
تنقذو من إبهار كراسي الوزارة!!
والإحراج والخطر.. موهبة!!

< إلي كل الأحزاب المصرية:
كلنا في المركب سوي
نغرق حنغرق سوي
نوصل حنوصل سوي
علي رأي عالم عالي المستوي
انما الاعمال بالنيات ولكل امرئ ما نوي!!!

< إلي الملحن محمد سلطان مدير جمعية المؤلفين:
عشان إيه وليه وازاي
متشتغلش ياللاـ باي
التفاصيل الاسبوع الجاي!!

< إلي الدكتور عماد أبو غازي اللي كان وزير ثقافة:
الوزير المناسب
اللي مقدرشي يحقق مكاسب
خلع من الوزارة
في الوقت المناسب!.. (وطنية)!!

< إلي الخواجة بوب برادلي المدير الفني للمنتخب المصري:
قدمك بني يا جميل
وقفنا الدوري!
وغرقنا الأمل في النيل!!
والمليونيات علي ودنه
واتغلبنا من البرازيل!!!

< إلي ورثة محمد محمود باشا صاحب الشارع:
ارفعوا قضية باسم الباشا المرحوم
واطلبوا تعويض للشارع المهموم
وللشباب المصري المظلوم
اللي قتلوهم بقنابل الدخان المسموم!!!

< إلي الدكتورة رتيبة الحفني رئيس مهرجان الموسيقي العربية:
لحد امته حتفضلي رئيس
مهرجان الموسيقي والاغاني
كفاية عليكي المطربة نوسة
وسلمي راية المهرجان لحد تاني!!!

< إلي شركة صوت القاهرة للصوتيات والمرئيات:
بعدما فلسوها
وشحتوها
وعلي باب زويلة وقفوها
وكانوا خلاص حيخصخصوها
تعظيم سلام للي أنقذوها
وللانتاج الفني تاني رجعوها!!!.. وفرحوها!!

إلي الأستاذ وجدي زين الدين رئيس التحرير التنفيذي للوفد:
علي رأي شاعر
دايب صبابا في حبكم
أشكركم
كلكم
ولولا فنكم
ما كنت عشقت
الكتابة عندكم.. ازيكم!!!

< إلي الدكتور توفيق عكاشة صاحب قناة الفراعين:
مبروك عليك مليونية
ميدان العباسية
لو عملت كمان مليونية
تبقي الرئيس المحتمل
لرياسة الجمهورية!!!

---------
لبخيت بن بيومي صاحب المساحة